ໃນທ້າຍອາທິດຜ່ານມານີ້ ຢູ່ທີ່ເມືອງ ອາດສະພັງທອງ ແຂວງສະຫວັນນະເຂດ ໄດ້ຈັດພິທີເຜີຍແຜ່ເອກະສານສະພາບການຊາຍແດນລາວ-ກໍາປູເຈຍ. ໂດຍການເຂົ້າຮ່ວມເປັນປະທານຂອງທ່ານ ລໍາທອງ ຂອບສີລາວົງ ເຈົ້າເມືອງອາດສະພັງທອງ, ແຂວງສະຫວັນນະເຂດ ມີຄະນະປະຈໍາພັກເມືອງ, ຫົວໜ້າ, ຮອງຫົວໜ້າຫ້ອງການ, ທະຫານ, ຕໍາຫຼວດ, ພະນັກງານ-ລັດຖະກອນຈາກກົມກອງຫ້ອງການອ້ອມຂ້າງເມືອງ ແລະ ຂັ້ນບ້ານໃນບ້ານເທດສະບານເມືອງເຂົ້າຮ່ວມຮັບຟັງ.
ໃນພິທີທ່ານ ລໍາທອງ ຂອບສີລາວົງ ກໍ່ໄດ້ນໍາເອົາເນື້ອໃນຈິດໃຈເອກະສານສະພາບການ ລາວ-ກຳປູເຈຍ ນໍາມາເຜີຍແຜ່ ໂດຍທ່ານໄດ້ຍົກໃຫ້ຮູ້ກ່ຽວກັບຄວາມເປັນມາທາງດ້ານປະຫວັດສາດແຫ່ງການພົວພັນ ລະຫວ່າງ ລາວ ແລະ ກຳປູເຈຍ, ການເສີມຂະຫຍາຍການພົວພັນ ແລະ ການຮ່ວມມືລະຫວ່າງລາວ-ກຳປູເຈຍ ແຕ່ລະໄລຍະ, ສະພາບການສຳຫຼວດ ແລະ ປັກຫຼັກໝາຍຊາຍແດນ ລະຫວ່າງ ສອງປະເທດຜ່ານມາເປັນຄືແນວໃດ, ຜົນສຳເລັດໃນການປັກຫຼັກໝາຍຊາຍແດນລະຫວ່າງ 2 ປະເທດ, ບາງເນື້ອໃນ. ໃນປີ 1933-1953 ໂດຍພະແນກແຜນທີ່ອິນດູຈີນ, ບົນພື້ນທີ່ຫຼັກການຕ່າງໆທີ່ສາກົນໄດ້ຮັບຮູ້ກ່ຽວກັບເສັ້ນຊາຍແດນ, ບົນພື້ນຖານຄໍານຶງເຖິງເຂດພື້ນທີ່ ເຊິ່ງປະຊາຊົນໄດ້ຄຸ້ມຄອງຕົວຈິງທີ່ສືບທອດກັນມາຫຼາຍເຊັ່ນຄົນ ແລະ ບົນພື້ນຖານຄວາມສະເໝີພາບ, ເທົ່າທຽມ, ສົມເຫດສົມຜົນ, ຜ່ອນສັ້ນຜ່ອນຍາວ ອີງຕາມຂໍ້ມູນປີ 2017 ຄະນະກຳມະການຊາຍແດນລາວ-ກຳປູເຈຍ ໄດ້ສຳຫຼວດຮ່ວມກັນສຳເລັດໄປແລ້ວ 465 ກິໂລແມັດ, ສາມາດປັກຫຼັກແດນໄດ້ແລ້ວ 121 ຫຼັກ ຍັງປະມານ 13% ຍັງບໍ່ໄດ້ ສຳຫຼວດ ເຊິ່ງລຽບຕາມແມ່ນ້ຳເຊກອງຂຶ້ນໄປແກ້ງຕໍມໍຄອຍຫ້ວຍຕະເງົາ ມີຄວາມຍາວປະມານ 24 ກິໂລແມັດ ແລະ ຈາກແກ້ງຕໍມໍຄອຍ ຫາ ແກ້ງກະຕູບ ອີກ 16 ກິໂລແມັດ ລວມມີເນື້ອທີ່ປະມານ 550 ກິໂລຕາແມັດ.
ສໍາລັບການເຜີຍແຜ່ເອກະສານສະພາບການຊາຍແດນລາວ-ກໍາປູເຈຍ ແລະ ເອກະສານກ່ຽວກັບຈຸດຄົງຄ້າງເສັ້ນຊາຍແດນລາວ-ກໍາປູເຈຍ ນີ້; ທາງເມືອງອາດສະພັງທອງແມ່ນໄດ້ອອກມະຕິຕົກລົງຂອງຄະນະປະຈໍາພັກເມືອງອາດສະພັງທອງ ວ່າດ້ວຍການເຜີຍແຜ່ເອກະສານສະພາບການຊາຍແດນລາວ-ກໍາປູເຈຍ, ໂດຍອີງຕາມແຈ້ງການແນະນໍາຂອງຄະນະປະຈໍາພັກແຂວງສະບັບເລກທີ 456/ຄອຂ ແລະ ອີງຕາມທິດຊີ້ນໍາຂອງຄະນະປະຈໍາພັກເມືອງອາດສະພັງທອງ, ກ່ຽວກັບໂຄສະນາເຜີຍແຜ່ເອກະສານສະພາບການຊາຍແດນ ລາວ-ກໍາປູເຈຍ ສະບັບເລກທີ 194/ປພມ.
Editor: ນັກຂ່າວເມືອງອາດສະພັງທອງ
