ນັບແຕ່ບໍລິສັດ ສະໂຕຣາ ເອັນໂຊລາວ ຈຳກັດ, ນຳໂຄງການປູກໄມ້ວິກ ລົງສູ່ປະຊາຊົນຫຼາຍໝູ່ບ້ານ ໃນເຂດເມືອງນອງ ແລະ ເມືອງເຊໂປນ, ແຂວງສະຫວັນນະເຂດ ແລະ ເມືອງຕະໂອ້ຍ, ແຂວງສາລະວັນ, ເມື່ອປີ 2007 ຕາມນະໂຍບາຍແບບ ສອງບວກສາມ 2+3 ຂອງລັດຖະບານ ບວກກັບນະໂຍບາຍການສົ່ງເສີມປູກໄມ້ວິກຂອງບໍລິສັດ ໄດ້ສ້າງຄວາມພໍໃຈໃຫ້ກັບປະຊາຊົນ ທີ່ຊ່ວຍພັດທະນາຊີວິດການເປັນຢູ່ຂອງເຂົາເຈົ້າດີຂື້ນ ຫຼາຍບ້ານມີໄຟຟ້າ, ນ້ໍາສະອາດຊົມໃຊ້ ແຖມເສັ້ນທາງເຂົ້າບ້ານກໍໄດ້ຮັບປົວແປງໄປ-ມາໄດ້ສະດວກ.
ເພື່ອເປັນການຂະຫຍາຍພື້ນທີ່ປູກໄມ້ຫຼາຍຂື້ນ ທັງບັນລຸໄດ້ຕາມເປົ້າ 35 ພັນເຮັກຕາ ກ່ອນຈະສ້າງໂຮງງານ ຜະລິດແປຮູບໄມ້ເພື່ອສົ່ງອອກ, ມາຮອດປັະຈຸບັນ ເນື້ອທີ່ປູກໄມ້ຂອງບໍລິສັດ ບັນລຸພຽງແຕ່ 3.500 ເຮັກຕາເທົ່ານັ້ນ ໃນໄລຍະເວລາ 12 ປີ, ເນື່ອງຈາກສະພາບຄວາມຫຍຸ້ງຍາກ ຂອງພື້ນທີ່ດິນທີ່ມີລະເບີດບໍ່ທັນແຕກຕົກຄ້າງຈຳນວນຫຼາຍ ຈຶ່ງໄດ້ໃຊ້ທຶນຢ່າງມະຫາສານ ເພື່ອເກັບກູ້ລະເບີດອອກ ກ່ອນຈະປູກໄມ້, ສະເພາະພື້ນທີ່ປູກໄມ້ໄປແລ້ວ ໃຊ້ທຶນເກັບກູ້ລະເບີດ 3 ລ້ານກວ່າໂດລາສະຫະລັດ ແລະ ທຶນສຳລັບການສົ່ງເສີມປູກໄມ້ 8 ຕື້ກວ່າກີບ.
ປັດຈຸບັນ ມີປະຊາຊົນເຂົ້າຮ່ວມໂຄງການ ທັງໝົດ 52 ບ້ານ. ເຊິ່ງປະຊາຊົນ ສາມາດເຂົ້າໄປທຳການຜະລິດປູກພືດກະສິກຳສັບວ່າງ ເປັນຕົ້ນການປູກເຂົ້າ, ສາລີ, ມັນຕົ້ນ, ໝາກນັດ ແລະອື່ນໆ ຕາມຄວາມເໝາະສົມ, ໂດຍການໄດ້ຮັບເບ້ຍລາຍວັນ ໃນການບົວລະບັດຮັກສາ ຖາກຖາງ. ທ່ານນາຍບ້ານປະຫຼ່ຽງໃຫຍ່, ເມືອງນອງ ແລະ ບ້ານຕະກໍ ເມືອງນອງ ຕ່າງກໍ່ເວົ້າເປັນສຽງດຽວກັນວ່າ: ພວກເຮົາໄດ້ເອົາດິນລວມບ້ານ ໃຫ້ບໍລິສັດເຊົ່າ ໂດຍບໍລິສັດຈະໃຫ້ທຶນພັດທະນາບ້ານ ຄື: ເອົາໄຟຟ້າເຂົ້າບ້ານ, ສ້າງບໍ່ນ້ຳສະອາດ. ສ່ວນບ້ານອື່ນໆກໍໄດ້ຮັບການຊ່ວຍພັດທະນາເສັ້ນທາງ, ນ້ຳປະປາຊຸມຊົນ, ໄຟຟ້າເຊັ່ນດຽວກັນ. ແນວໃດກໍ່ຕາມ ປະຊາຊົນຊົນຕ່າງກໍມີຄວາມພໍໃຈກ່ຽວກັບໂຄງງານນີ້ ທີ່ມີວຽກເຮັດງານທຳ ມີລາຍຮັບລາຍວັນ ແກ້ໄຂຄວາມຈຳເປັນໃນຊີວິດການເປັນຢູ່ໄດ້ລະດັບໃດໜຶ່ງ.
ທ່ານ ແກ້ວໂອໃດ ສຸວັນແນ, ຮອງເຈົ້າເມືອງ-ເມືອງນອງ ໃຫ້ສຳພາດວ່າ: ບໍລິສັດນີ້ໄດ້ເຮັດແທ້ທຳຈິງ,ໄດ້ລົງເລິກກັບປະຊາຊົນ ໂດຍມີນະໂຍບາຍຫຼາຍຢ່າງທີ່ຕອບແທນປະຊາຊົນໃນລະບົບສອງບວກສາມ 2+3, ມາຮອດປະຈຸບັນ ຊີວິດການເປັນຢູ່ຂອງປະຊາຊົນດີຂື້ນເປັນກ້າວໆ ຍ້ອນວ່າບ້ານທີ່ບໍລິສັດເຂົ້າໄປເຮັດໂຄງການ ແມ່ນໄດ້ທຳການສຳຫຼວດເກັບກູ້ລະເບີດ, ບຸກເບີກ ເຮັດໃຫ້ປະຊາຊົນໄປມາງ່າຍຂື້ນໃນການທຳມາຫາກິນ, ນອກຈາກນີ້ ກໍໄດ້ທຳການຜະລິດ ສັບບ່ອນວ່າງຂອງການປູກໄມ້ວິກ ໂດຍບໍ່ຕ້ອງລົງທຶນຫຍັງຫຼາຍ ແຕ່ຜົນຜະລິດຍັງເປັນຂອງປະຊາຊົນ ພ້ອມທັງໄດ້ຮັບຄ່າທົດແທນທີ່ເໝາສົມໃຫ້ກັບປະຊາຊົນ. ນອກຈາກນີ້ ບໍລິສັດຍັງໃຫ້ທຶນພັດທະນາສັງຄົມ, ພັດທະນາບ້ານ ແລະ ພັດທະນາເມືອງ ເປັນການປະກອບສ່ວນເຮັດໃນການແກ້ໄຂຄວາມທຸກຍາກຂອງປະຊາຊົນຢູ່ເມືອງນອງ ແຂວງສະຫວັນນະເຂດ ນັບມື້ນັບ-ນັບຫຼຸດລົງ.
ມີສຽງສຳພາດທ່ານ ແກ້ວໂອໃດ ສຸວັນແນ, ຮອງເຈົ້າເມືອງ-ເມືອງນອງ ມາໃຫ້ຮັບຊົມ

Editor: ຕະວັນ ແສງສະຫວັນ