ທ່ານ ນາງ ພິມປະໄພ ສຸຂະລາດ, ຄະນະປະຈໍາພັກເມືອງ, ຮອງເຈົ້າເມືອງ-ເມືອງປາກລາຍ, ແຂວງໄຊຍະບູລີ, ປະທານຄະນະກໍາມະການປ້ອງກັນ, ຄວບຄຸມພະຍາດໄຂ້ຍຸງລາຍ ຫລື (ໄຂ້ເລືອດອອກ) ພ້ອມດ້ວຍບັນດາຫົວໜ້າຫ້ອງການ, ພະນັກງານລັດຖະກອນ, ອໍານາດການປົກຄອງບ້ານອ້ອມຂ້າງເທດສະບານເມືອງ ໄດ້ເຂົ້າຮ່ວມ ພິທີເປີດຂະບວນການ ຕ້ານໄຂ້ເລືອດອອກ, ໃນເຊົ້າວັນທີ 26 ມີຖຸນາ 2018 ນີ້ ທີ່ສະໝາມກິລາເມືອງປາກລາຍ ແຂວງໄຊຍະບູລີ, ເພື່ອເປັນການປ້ອງກັນ ແລະ ຫຼີກເວັ້ນຈາກພະຍາດທີ່ມັກລະບາດໃນລະດູຝົນ ກໍຄືພະຍາດໄຂ້ເລືອດອອກ ຫຼື ໄຂ້ຍຸງລາຍ. ສະນັ້ນ, ຫ້ອງການສາທາລະນາສຸກເມືອງປາກລາຍ ຈິ່ງໄດ້ຈັດກິດຈະກໍານີ້ຂື້ນມາ.
ຈຸດປະສົງ ຂອງການຈັດພິທີຄັ້ງນີ້ ແມ່ນແນໃສ່ປຸກລະດົມຂະບວນການປ້ອງກັນພະຍາດໄຂ້ເລືອດອອກໃຫ້ບັນດາພໍ່ແມ່ປະຊາຊົນ, ພະນັກງານລັດ-ຖະກອນໄດ້ຮັບຮູ້ ເຂົ້າໃຈ ແລະ ມີສ່ວນຮ່ວມໃນການປ້ອງກັນກໍາຈັດຮອບດ້ານ ບໍ່ໃຫ້ພະຍາດໄຂ້ເລືອດອອກມີການລະບາດ ດ້ວຍການກຳຈັດແຫລ່ງເພາະພັນຂອງຍຸງລາຍຢ່າງຕໍ່ເນື່ອງເພາະວ່າໃນປັດຈຸບັນ ໄວຣັດໄຂ້ເລືອດອອກມີການພັດທະນາ ແລະ ຍັງບໍ່ມີວັກແຊງ ເພື່ອເສີມພູມຕ້ານທານຕໍ່ພະຍາດນີ້ໄດ້ ພ້ອມນັ້ນ ພະຍາດນີ້ ກໍບໍ່ໄດ້ເກີດສະເພາະແຕ່ເດັກເທົ່ານັ້ນ ຜູ້ໃຫຍ່ທຸກຄົນກໍສາມາດຕິດພະຍາດນີ້ໄດ້ເຊັ່ນກັນ, ການເປີດຂະບວນການໃນຄັ້ງນີ້ ແມ່ນໄດ້ພ້ອມກັນເຮັດອານາໄມຕາມທະໜົນຫົນທາງ, ສະຖານ
ທີ່ບໍລິການ, ບ້ານເຮືອນຂອງປະຊາຊົນ, ເພື່ອເປັນການສ້າງຂະບວນການຕ້ານ ປ້ອງກັນສະກັດກັ້ນ ແລະ ຄວບຄຸມພະຍາດໄຂ້ຍຸງລາຍໃນຕົວເມືອງ ໂດຍສະເພາະແມ່ນທຳລາຍແຫຼ່ງເພາະພັນຂອງຫນອນນ້ຳຍຸງລາຍ ບໍ່ໃຫ້ມີໂດຍເລັ່ງໃສ່ 13 ບ້ານໃນເຂດເທດສະບານ. ເພື່ອຕ້ານ ແລະ ສະກັດກັ້ນການລະບາດ ຂອງພະຍາດໄຂ້ຍຸງລາຍ ບໍ່ໃຫ້ມີການຂະຫຍາຍຢ່າງ ກ້ວາງຂວາງ ໂດຍປະຕິບັດຕາມ 6 ປ ຄື: ປິດຝາພາຊະນະທີ່ມີນ້ຳ ເພື່ອບໍ່ໃຫ້ຍຸງລາຍໄຂ່ໃສ່, ປ່ຽນນ້ຳໃນພາຊະນະຕ່າງໆທຸກໆ 7 ມື້, ປ່ອຍປາຫາງນົກຍຸງໃສ່ໃນພາຊະນະ ເພື່ອກິນຫນອນນ້ຳ, ປັບປຸງສະພາບແວດລ້ອມ ໃຫ້ສະອາດງາມຕາ, ປະຕິບັດເປັນປະຈໍາ ກາຍເປັນນິໃສ ເວລາເຈັບເປັນ ໃຫ້ໄປຫາແພດໝໍ ແລະ ປະກາດຕິດປ້າຍໃສ່ຄົວເຮືອນທີ່ພົບຫນອນນ້ຳຍຸງລາຍໃນຄົວເຮືອນ ແລະ ນອກເຮືອນ. ການສ້າງຂະບວນການໃນຄັ້ງນີ້ຍັງໄດ້ພ້ອມກັນປ່ອຍປາຫາງນົກຍຸງໃສ່ອ່າງນ້ຳ ຕື່ມອີກ.
ທ່ານ ນາງ ພິມປະໄພ ສຸຂະລາດ ຍັງໄດ້ຮຽກຮ້ອງມາຍັງຄະນະຮັບຜິດຊອບ, ພະແນກການທີ່ກ່ຽວຂ້ອງ, ສໍານັກງານ, ກົມກອງ, ຫ້ອງການ, ໂຮງຮຽນ, ໂຮງໝໍ, ບໍລິສັດ, ຕະຫຼອດຮອດອົງການປົກຄອງບ້ານ ແລະ ຫົວໜ່ວຍຄອບຄົວຕ້ອງເອົາໃຈໃສ່ປ້ອງກັນພະຍາດໄຂ້ຍຸງລາຍ ດ້ວຍການປະຕິບັດ 5 ປໍ. ເນັ້ນໝັກໃຫ້ເອົາໃຈໃສ່ໃກ້ຊິດຕິດແທດໃຫ້ປະຊາຊົນມີສ່ວນຮ່ວມ ໃນການສະກັ້ດກັ້ນ ຫຼີກເວັ້ນຈາກພະຍາດດັ່ງກ່າວ ເຊັ່ນ: ປຸກລະດົມໃຫ້ພໍ່ແມ່ປະຊາຊົນແຕ່ລະບ້ານທໍາລາຍແຫຼ່ງເພາະພັນຂອງຍຸງລາຍ ອະນາໄມຖາງປ່າອອ້ມບໍລິເວນເຮືອນ ທໍາລາຍກະໂປະກະປ໋ອງບ່ອນທີ່ມີນໍ້າຂັງ, ນໍ້າຄ້າງ ແລະ ອື່ນໆ.
Editor: ນັກຂ່າວເມືອງປາກລາຍ
