ງານວາງສະແດງສິນຄ້າ ລາວ-ຫວຽດນາມ ຄັ້ງທີິ 11 ປະຈໍາປີ 2018 ແມ່ນຈະໄດ້ເປີດຂື້ນໃນລະຫວ່າງວັນທີ 28 ມີຖຸນາ ຫາວັນທີ 2 ກໍລະກົດ 2018 ທີ່ຈະມາເຖິງນີ້ ທີ່ສູນການຄ້າ ລາວ-ໄອເຕັກ, ນະຄອນຫລວງວຽງຈັນ. ເຊີ່ງມີຫ້ອງວາງສະແດງທັງໝົດ 320 ຫ້ອງວາງສະແດງ ໃນນັ້ນຫົວຫນ່ວຍທຸລະກິດ ຈາກ ສສ ຫວຽດນາມ 120 ຫ້ອງ. ດັ່ງນັ້ນ ມາໃນວັນທີ 25 ມີຖຸນາ 2018 ນີ້ ທີ່ກະຊວງອຸດສາຫະກໍາ ແລະ ການຄ້າ ໄດ້ຈັດພິທີຖະແຫລງຂ່າວ ກຽມຈັດງານນີ້ຂື້ນ, ໂດຍການເປັນປະທານຮ່ວມ ມີ ທ່ານ ໄຊສົມເພັດ ນໍລະສິງ ຮັກສາການຫົວຫນ້າກົມສົ່ງເສີມການຄ້າ ກະຊວງອຸດສາຫະກໍາ ແລະ ການຄ້າ, ມີ ທ່ານ ພົນຈັດຕະວາ ຄໍາມ່ວນ ເລື່ອງວັນຫລ້າ ຮອງຫົວຫນ້າຫ້ອງວ່າການ ກະຊວງປ້ອງກັນປະເທດ, ແລະ ທ່ານ ບຸ໋ຍ ວັນຕຽນ ຫົວຫນ້າສູນວາງສະແດງສິນຄ້າ ແລະ ສົ່ງເສີມການຄ້າ, ກົມເສດຖະກິດ ກະຊວງປ້ອງກັນປະເທດ ແຫ່ງ ສສ ຫວຽດນາມ. ມີບັນດາພາກສ່ວນທີ່ກ່ຽວຂ້ອງ ແລະ ສື່ມວນຊົນ ລາວ-ຫວຽດນາມເຂົ້າຮ່ວມ.
ໃນພິທີຖະແຫລງຂ່າວ ດັ່ງກ່າວ ທ່ານ ໄຊສົມເພັດ ນໍລະສິງ ຮັກສາການຫົວຫນ້າກົມສົ່ງເສີມການຄ້າ ໄດ້ກ່າວວ່າ: ກົມສົ່ງເສີມການຄ້າ ກະຊວງອຸດສາຫະກໍາ ແລະ ການຄ້າ ສປປ ລາວ ຮ່ວມກັບກົມເສດຖະກິດ ກະຊວງປ້ອງກັນປະເທດ ສສ ຫວຽດນາມ ຈະໄດ້ຈັດວາງສະແດງສິນຄ້າ ລາວ-ຫວຽດນາມ ໂດຍສົມທົບກັບກະຊວງປ້ອງກັນປະເທດ ສປປ ລາວ ແລະ ກະຊວງອຸດສາຫະກໍາ ແລະ ການຄ້າ ສສ ຫວຍດນາມ. ງານວາງສະແດງ ຄັ້ງນີ້ ແມ່ນເປັນຄັ້ງທີ 11 ປະຈໍາປີ 2018 ເຊີ່ງຈະເລີ່ມຂື້ນໃນລະຫວ່າງວັນທີ 28 ມີຖຸນາ ເຖິງ ວັນທີ 2 ກໍລະກົດ 2018, ທີ່ສູນການຄ້າລາວ-ໄອເຕັກ ( ຕຶກເກົ່າ) ນະຄອນຫລວງວຽງຈັນ, ການຈັດງານດັ່ງກ່າວເພື່ອເປັນການສຶບຕໍ່ຜັນຂະຫຍາຍການຮ່ວມມື, ເພີ່ມທະວີການພົວພັນມິດຕະພາບ ຄວາມສາມັກຄີແບບພິເສດ ລະຫວ່າງປະຊາຊົນ 2 ຊາດ ລາວ-ຫວຽດນາມ ແລະ ຍັງເປັນການເພີ່ມທະວີສາຍພົວພັນດ້ານການຄ້າ ລາວ-ຫວຽດນາມ ໃຫ້ນັບມື້ນັບກວ້າງຂວາງຂື້ນ, ເປັນການເປີດໂອກາດໃນການແລກປ່ຽນບົດຮຽນ ແລະ ແນະນໍາຄຸນະພາບຂອງສິນຄ້າ ເຊີ່ງກັນ ແລະ ກັນ.
Editor: ກຳປານາດ ລັດຖະເຮົ້າ
