ເມື່ອບໍ່ດົນຜ່ານມານີ້, ທີ່ສະໂມສອນໃຫຍ່ປົກຄອງເມືອງພູຄູນ, ແຂວງຫຼວງພະບາງ ຫ້ອງການພາຍໃນໄດ້ ເປີດບັ້ນແຂ່ງຂັນ-ຍ້ອງຍໍຮັກຊາດ ແລະ ພັດທະນາຊຸກຍູ້ວຽກງານສາມສ້າງເຂົ້າສູ່ລວງເລິກ ໂດຍການເຂົ້າຮ່ວມຂອງ ທ່ານ ຄຳກາງ ຮ່ວງທະຈັນ ຮອງເລຂາພັກເມືອງ, ມີບັນດາຫົວໜ້າ, ຮອງຫົວໜ້າຫ້ອງການ,ຫົວໜ້າ ແລະ ຮອງກອງບັນຊາການປກຊ-ປກສ, ອໍານວຍການໂຮງຮຽນ, ໂຮງໝໍ, ຫົວໜ້າກຸ່ມພັດທະນາ, ບັນດາຫົວໜ່ວຍວິສະຫະກິດ, ຫົວໜ້າໜ່ວຍງານພາຍໃນເມືອງເຂົ້າຮ່ວມ.
ໃນພິທີຄະນະຈັດຕັ້ງກໍ່ໄດ້ຜ່ານຂໍ້ຕົກລົງຂອງທ່ານເຈົ້າເມືອງພູຄູນ ເລກທີ 146/ຈມ.ພຄ ວ່າດ້ວຍການແຕ່ງຕັ້ງຄະນະຮັບຜິດຊອບແຂ່ງຂັນ-ຍ້ອງຍໍຮັກຊາດ ແລະ ພັດທະນາຂັ້ນຫ້ອງການພາຍໃນເມືອງ. ຈາກນັ້ນ ທ່ານ ສົມພອນ ເຊຶ້ອໄຊຍະສິດ ຮອງຫົວໜ້າຫ້ອງການພາຍໃນເມືອງ ກໍ່ໄດ້ຜ່ານຂໍ້ແຂ່ງຂັນ-ຍ້ອງຍໍຮັກຊາດ ແລະ ພັດທະນາຊຸກຍູ້ວຽກງານສາມສ້າງໃຫ້ເຂົ້າສູ່ລວງເລິກ ເຊິ່ງໄດ້ກຳນົດ 5 ຂໍ້ແຂ່ງຂັນແຕ່ນີ້ຮອດປີ 2020 ພະນັກງານລັດຖະກອນທຸກຄົນຕ້ອງຕັ້ງໜ້າຝຶກຝົນຫລໍ່ຫລອມຕົນເອງໃຫ້ມີຄຸນສົມບັດສິນທຳປະຕິວັດ ແລະ ຄຸນທາດທາດການເມືອງທີ່ໜັກແໜ້ນ, ຍົກລະດັບຄວາມຮູ້,ຄວາມສາມາດ, ກໍາແໜ້ນນິຕິກໍາໃຫ້ເຂົ້າສູ່ລະບຽບກົດໝາຍ, ສຸມໃສ່ຜັນຂະຫຍາຍຈັດຕັ້ງປະຕິບັດບັນດາແຜນງານ, ແຜນການໃຫ້ບັນລຸຕາມວິໄສທັດ, ປະຕິບັດບັນດາຂໍ້ກໍານົດຂອງທ່ານເຈົ້າເມືອງຢ່າງເຂັ້ມງວດ, ອອກແຮງແຂ່ງຂັນກັນໃນແຕ່ລະໜ່ວຍງານຮັບຜິດຊອບໃຫ້ບັນລຸຕາມພາລະບົດບາດ ສິດແລະ ໜ້າທີ່. ຈາກນັ້ນ ບັນດາສະມາຊິກ ແລະ ບັນດາຫົວໜ້າໜ່ວຍງານກໍ່ໄດ້ຈັບມືແຂ່ງກັນກັນເພື່ອສ້າງຜົນງານຂອງຕົນໃຫ້ບັນລຸຕາມຄາດໝາຍທີ່ຫ້ອງການໄດ້ກຳນົດອອກ
Editor: ກຳປານາດ ລັດຖະເຮົ້າ
