ຜະລິດຕະພັນຫັດຖະກໍາຈັກສານ ມວຍຫນຶ່ງເຂົ້າ ທີ່ບ້ານບັງຄາ, ເມືອງວາປີ ແຂວງສາລະວັນ ແມ່ນເປັນອີກຜະລິດຕະພັນຫນຶ່ງ ທີ່ມີຊື່ສຽງໂດ່ງດັງ ແລະ ເປັນທີ່ຍອມຮັບຂອງສັງຄົມ, ເມື່ອບໍ່ດົນມານີ້, ທີ່ບ້ານບັງຄາ ເມືອງວາປີ ທ່ານ ກາດໍາ ບຸນປະເສີດ ນາຍບ້ານບັງຄາ ໄດ້ເລົ່າສູ່ທີມງານລາຍການ ຂອງພວກເຮົາວ່າ: ກ່ອນຈະມີການຕັ້ງກຸ່ມຜະລິດ ມວຍຫນຶ້ງເຂົ້າ ຈຸດເລີ່ມຕົ້ນແມ່ນເລີມມາຈາກຄອບຄົວ ທ່ານນາງ ແວວຄໍາ ອໍາພອນ ປະຊາຊົນພາຍໃນບ້ານບັງຄາ ໃນເບື້ອງຕົນຄອບຄົວຂອງເພີ່ນຜະລິດພຽງແຕ່ໃຊ້ໃນຄອບຄົວ ແລະ ໄດ້ວາງຂາຍສ່ວນຫນຶ່ງ, ມື້ລະ 2-3 ຫນ່ວຍ, ເຊີ່ງລາຄາຂາຍໃນຕອນນັ້ນ ມີພຽງ 3-4 ພັນກີບ, ກາຍເປັນທີ່ຕ້ອງຕາ-ຕ້ອງໃຈຂອງຊາວບ້ານ ກໍ່ຄືຜູ້ທີ່ສັນຈອນ ກາຍໄປ-ກາຍມາ ຕາມເສັ້ນທາງ ເລກທີ 15 ເອ. ( ສາລະວັນ - ນາປົ່ງ ) ຈາກການວາງຂາຍໃນເມື່ອກ່ອນ ເຫັນວ່າມີລາຍຮັບດີ, ຫລາຍຄົນ ຫລາຍຄອບຄົວໄດ້ໃຫ້ຄວາມສົນໃຈ, ຫລັງຈາກນັ້ນ ປະຊາຊົນ ໄດ້ພາກັນເຂົ້າມາຮໍ່າຮຽນນໍາ ທ່ານນາງ ແວວຄໍາ ແລະ ເພີ່ນກໍ່ຍິນດີຖ່າຍທອດບົດຮຽນໃຫ້ ແລະ ໄດ້ເລີ່ມສ້າງຕັ້ງກຸ່ມການຜະລິດຂື້ນ ນັບແຕ່ປີ 2014 ເປັນຕົ້ນມາ. ມາເຖິງປະຈຸບັນ ມີສະມາຊິກຢູ່ໃນກຸ່ມ 100 ກວ່າຄອບຄົວ, ມີຄອບຄົວທີ່ໄດ້ຜະລິດເປັນປະຈໍາ ຈໍານວນ 70 ຄອບຄົວ, ສະເລ່ຍລາຍຮັບ ຈາກການຂາຍມວນຫນຶ້ງເຂົ້າ ບໍ່ຫລຸດ 4 ລ້ານກີບ/ປີ.
ທ່ານນາງ ແວວຄໍາ ອໍາພອນ ຫົວຫນ້າກຸ່ມຜະລິດ ຍັງໄດ້ເລົ່າສູ່ຟັງວ່າ: ການສານມ້ວຍຫນຶ້ງເຂົ້າ ແມ່ນບໍ່ມີຄວາມຫຍຸ້ງຍາກປານໃດ, ຂໍພຽງແຕ່ມີຄວາມອົດທົນພະຍາຍາມ, ດຸໝັ້ນຂະຫຍັນພຽນ ແລະ ບວກກັບຄວາມມັກຮັກໃນອາຊີບ ກໍ່ສາມາດເຮັດໄດ້ ຈົນສໍາເລັດ. ສໍາລັບຕົນເອງ ສາມາດສານໄດ້ມື້ຫນຶ່ງ 1-2 ຫນ່ວຍ, ຟດຍໃຊ້ໄມ້ໃຜ່ບ້ານ ທີ່ປູກເອງ ແລະ ບາງຄັ້ງກໍ່ຊື້ມາຈາກບ້ານໃກ້ຄຽງ. ໃນລາຄາ 20 ພັນກີບ/ລໍາ.
ຍ້ອນເຫັນໄດ້ເຖິງຄວາມດຸຫມັ້ນຂະຫຍັນພຽນ, ຄວາມສະໝານສາມັກຄີ ເປັນຈິດຫນື່ງໃຈດຽວຂອງຊາວບ້ານ, ດັ່ງນັ້ນ ທາງອໍານາດການປົກຄອງເມືອງວາປີ ຈິ່ງໄດ້ລົງຊຸກຍູ້ສົ່ງເສີມການຜະລິດເປັນສິນຄ້າ ທ້ອງຖິ່ນ ໂດຍໄດ້ໃຫ້ທຶນສະຫນັບສະຫນູນ ຈໍານວນຫນຶ່ງ ມອບໃຫ້ແກ່ກຸ່ມຜະລິດ ເພື່ອເປັນຕົ້ນທຶນໃນການນໍາໃຊ້ເຂົ້າໃນການຜະລິດ ໂດຍສະເພາະການຈັດຊື້ວັດຖຸດິບ, ອຸປະກອນເຄື່ອງມື ແລະ ອື່ນໆ. ຕໍ່ກັບຜົນໄດ້ຮັບດັ່ງກ່າວ ໄດ້ເຮັດໃຫ້ກຸ່ມຜະລິດຈັກສານ ບ້ານບັງຄາ ເມືອງວາປີ ໄດ້ມີກ້ອນທຶນຫມູນວຽນຈໍານວນຫນຶ່ງ ເພື່ອແກ້ໄຂໃຫ້ກັບສະມາຊິກຄອບຄົວພາຍໃນກຸ່ມຜະລິດ ໃນເວລາ ຈໍາເປັນ. ສ່ວນການຈໍາຫນ່າຍຂາຍ ແມ່ນໄດ້ວາງຂາຍຕາມເສັ້ນທາງ, ບາງຄັ້ງກໍ່ມີແມ່ຄ້າມາຮັບຊື້ເຖິງທີ່ ເຊັ່ນ: ແມ່ຄ່າຈາກເມືອງສາລະວັນ, ແມ່ຄ່າຈາກເມືອງຄົງເຊໂດນ, ແລະ ແມ່ຄ້າ ທີ່ມາຈາກແຂວງຈໍາປາສັກ ແລະ ສະຫວັນນະເຂດ. ສໍາລັບລາຄາຂາຍສົ່ງ ຫນ້ວຍນ້ອນ ລາຄາ 13 ພັນກີບ, ຫນ່ວຍໃຫຍ່ ລາຄາ 15 ພັນກີບ. ແຕ່ຖ້າຂາຍຍ່ອຍ ຫນ່ວຍນ້ອຍ ລາຄາ 15 ພັນກີບ ແລະ ຫນ່ວຍໃຫຍ່ ລາຄາ 20 ພັນກີບ.
ປະຈຸບັນ ປະຊາຊົນກຸ່ມຜະລິດ ບ້ານບັງຄາ ເມືອງວາປີ ໄດ້ມີລາຍຮັບເສີມຈາກການຈັກສານ ມວຍຫນຶ້ງເຂົ້າ ແລະ ຜະລິດຕະພັນອື່ນໆ ຈາກການຈັກສານ ເຮັດໃຫ້ລະດັບຊີວິດການເປັນຢູ່ ນັບມື້ນັບດີຂື້ນເລື້ອນໆ.
Editor: ກຳປານາດ ລັດຖະເຮົ້າ
