ເນື່ອງໃນໂອກາດສະເຫຼີມ - ສະຫຼອງ ວັນສາກົນຕ້ານຢາເສບຕິດ ຄົບຮອບ 31 ປີ ( ວັນທີ 26 ມິຖຸນາ 1987 – 26 ມິຖຸນາ 2018 ) ຄະນະພັກ - ອໍານາດການປົກຄອງແຂວງ ໄຊຍະບູລີ ໄດ້ຈັດພິທີທໍາລາຍຢາເສບຕິດຂື້ນ. ຢູ່ທີ່ເດີ່ນກິລາຂອງແຂວງ ໃນຕອນເຊົ້າວັນທີ 26 ມິຖຸນາ 2018 ນີ້. ໂດຍການໃຫ້ກຽດເຂົ້າຮ່ວມເປັນປະທານຂອງ ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ; ມີບັນດາທ່ານພະນັກງານການນໍາຂອງແຂວງ, ການນໍາເມືອງໄຊຍະບູລີ , ພະນັກງານຫຼັກແຫຼ່ງຈາກບັນດາພະແນກການ , ອົງການ, ກົມກອງ, ສະຖາບັນການສຶກສາ, ໂຮງຮຽນ, ລັດວິສາຫະກິດ, ພ້ອມດ້ວຍຕາງໜ້າຈາກ 15 ບ້ານ ເທດສະບານແຂວງເຂົ້າຮ່ວມ ຢ່າງຫຼວງຫຼາຍ.
ທ່ານ ພົງສະຫວັນ ສິດທະວົງ ຕາງໜ້າຄະນະພັກ - ອໍານາດການປົກຄອງ ແລະ ປະຊາຊົນບັນດາເຜົ່າພາຍໃນແຂວງ ໄດ້ໃຫ້ກຽດຂື້ນກ່າວຄໍາປາໄສຕໍ່ພິທີໂຮມຊຸມນຸມ ໂດຍຍົກໃຫ້ເຫັນຄວາມ ໝາຍຄວາມສໍາຄັນຂອງວັນສາກົນຕ້ານຢາເສບຕິດ, ສະພາບການແຜ່ຂະຫຍາຍຂອງຢາເສບຕິດ; ມາດຕະການປ້ອງກັນ ແລະ ປາບປາມຢາເສບຕິດໃນໄລຍະຜ່ານມາ ທ່ານກ່າວວ່າ: ບັນຫາຢາເສບຕິດແມ່ນບັນຫາກວມລວມຂອງໂລກທີ່ເປັນໄພອັນຕະລາຍຮ້າຍແຮງຕໍ່ມວນມະນຸດ; ເປັນອຸປະສັກໃນການກົດໜ່ວງຖ່ວງດຶງແກ່ການສ້າງສາພັດທະນາເສດຖະກິດ - ສັງຄົມ; ທັງເປັນບໍ່ເກີດແຫ່ງການກໍ່ອາຊະຍາກໍາ ແລະ ຍັງໄດ້ນໍາເອົາຄວາມຫາຍຍານະມາສູ່ຊີວິດ ແລະ ຄອບຄົວຂອງຜູ້ທີ່ຕົກເປັນທາດຂອງຢາເສບຕິດ
ຈາກນັ້ນ, ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ພ້ອມດ້ວຍຄະນະປະທານ ແລະ ພາກສ່ວນຕ່າງໆ ໄດ້ຮ່ວມກັນຕັບແຖບຖ້າ ແລະ ຕັດຊອງຂອງກາງຢາເສບຕິດ, ພ້ອມທັງຈູດ ແລະ ທໍາລາຍຢາເສບຕິດທີ່ຍຶດໄດ້ຈາກຄະດີຢາເສບຕິດ ໃນປີ 2018 ໂດຍສານໄດ້ຕັດສິນແລ້ວ. ເຊິ່ງຢາເສບຕິດ ທີ່ນໍາມາຈູດ - ທໍາລາຍຖີ້ມໃນປີນີ້ມີຢາບ້າ 60.760 ເມັດ, ຫຼື ເທົ່າກັບ 6.445,2 ກຼາມ ແລະ ຢາຝິ່ນ ຈໍານວນ 219,5 ກຼາມ. ທ່ານ ເຈົ້າແຂວງໄຊຍະບູລີ ຍັງໄດ້ຮຽກຮ້ອງບັນດາອົງການຈັດຕັ້ງສັງຄົມ ຈົ່ງຮ່ວມໃຈກັນ ເພີ່ມທະວີໃນການສະກັດກັ້ນ ແລະ ປາບປາມຢາເສບຕິດຢ່າງເຂັ້ມງວດ, ເຮັດໃຫ້ສິ່ງເສບຕິດທຸກປະເພດໝົດໄປຈາກສັງຄົມເຮົາຢ່າງສີ້ນເຊີງ.
Editor: ກຳປານາດ ລັດຖະເຮົ້າ
