ສະຖານທູດ ອິນເດຍ ປະຈໍາ ສປປ ລາວ ຮ່ວມກັບອໍານາດປົກຄອງແຂວງຈໍາປາສັກ, ແລະ ເມືອງຈໍາປາສັກ ຈັດງານສະເຫລີມສະຫລອງວັນໂຍຄະສາກົນຂື້ນ ທີ່ບູຮານສະຖານ ຜາສາດຫິນວັດພູຈໍາປາສັກ ມໍລະດົກໂລກ, ໂດຍການເຂົ້າຮ່ວມຂອງ ທ່ານ ເບີລິນ ວົງພະຈັນ ຮອງເຈົ້າແຂວງຈໍາປາສັກ, ມີ ທ່ານ ຊູບເບຣຍ ຊິດດຣາ ເລຂາທູດ 2 ຫົວຫນ້າຫ້ອງການສະຖານທູດ ອິນເດຍ ປະຈໍາ ສປປ ລາວ, ພ້ອມນີ້ເຂົ້າຮ່ວມ ຍັງມີພະແນກການທີ່ກ່ຽວຂ້ອງ ພາຍໃນແຂວງ, ເມືອງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ຊູບເບຣຍ ຊິດດຣາ ຕາງຫນ້າໃຫ້ ສະຖານທູດອິນເດຍ ປະຈໍາ ສປປ ລາວ ໄດ້ກ່າວວ່າ: ການຈັດງານສະເຫລີມສະຫລອງວັນໂຍຄະສາກົນ ທີ່ ສປປ ລາວ ແມ່ນເປັນ ຄັ້ງທີ 4 ແລ້ວ ໂດຍໄດ້ຮັບການສະຫນັບສະຫນູນ ຈາກສະຖານທູດ ອິນເດຍ ປະຈໍາ ສປປ ລາວ, ກິດຈະກໍາໂຍຄະ ເປັນການປະຕິບັດທາງກາຍ, ຈິດໃຈ ແລະ ຈິດວິນຍານ ໂດຍມີຕົ້ນກໍາເນີດ ມາຈາກປະເທດອິນເດຍ, ນັບແຕ່ສະໄຫມບູຮານ ຫລາຍພັນປີ. ການຝຶກໂຍຄະເປັນການຍຶດຫນ່ຽວກ້າມຊີ້ນ ທີ່ສອດຄ່ອງກັບອາລົມພາຍໃນ, ສົ່ງຜົນໃຫ້ສຸຂະພາບຈິດ, ສຸຂະພາບກາຍແຂງແຮງ. ສໍາລັບຜູ້ທີ່ໄດ້ຮັບການຝຶກໂຍຄະເປັນປະຈໍາ ປົກກະຕິຕໍ່ເນື່ອງ ຈະເຮັດໃຫ້ມີສຸຂະພາບແຂງແຮງສົມບູນ, ມີອາຍຸຢືນຍາວ. ປະຈຸບັນການຝຶກໂຍຄະ ໄດ້ແຜ່ໄປທົ່ວໂລກ ແລະ ມີການພັດທະນາທ່ວງທ່າຕ່າງໆທີ່ຫລາກຫລາຍ, ການຈັດກິດຈະກໍາໂຍຄະ ຍັງເປັນການສົ່ງເສີມໃຫ້ຜູ້ທີ່ມັກຝຶກໂຍຄະ ຫລື ສັງຄົມທົ່ວໄປ ເຫັນໄດ້ເຖິງຄວາມສໍາຄັນຂອງການຝຶກໂຍຄະ ເພື່ອເຮັດໃຫ້ສຸຂະພາບຈິດ, ສຸຂະພາບກາຍ ດີຂື້ນ.
ນອກຈາກ ມີການຈັດສະເຫລີມສະຫລອງ ທີ່ວັດພູຈໍາປາສັກ ແລ້ວ ຢູ່ທີ່ນະຄອນຫລວງວຽງຈັນ ຍັງໄດ້ມີການຈັດກິດຈະກໍາສະເຫລີມສະຫລອງວັນໂຍຄະ ຂື້ນເຊັ່ນດຽວກັນ.
Editor: ກຳປານາດ ລັດຖະເຮົ້າ
