ເມື່ອບໍ່ດົນນີ້ ທ່ານ ບຸນເຕີຍ ຈັນທະລາສິນ ຮອງພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ແຂວງຈໍາປາສັກ ພ້ອມດ້ວຍຄະນະ ໄດ້ລົງຕິດຕາມກວດກາ ແລະ ຊຸກຍູ້ວຽກງານ ຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ທີ່ເມືອງປະທຸມພອນ ໂດຍໃຫ້ກຽດຕ້ອນຮັບຈອງ ທ່ານ ຄໍາເຝຶອກ ທອງຄໍາ ເລຂາຄະນະບໍລິຫານງານພັກເມືອງ-ເຈົ້າເມືອງປະທຸມພອນ, ພ້ອມນີ້ຍັງມີ ທ່ານຫົວຫນ້າ-ຮອງຫົວຫນ້າ, ພະນັກງານລັດຖະກອນຫລັກແຫລ່ງ ເຂົ້າຮ່ວມ.
ການພົບປະຄັ້ງນີ້ ໄດ້ຈັດຂື້ນທີ່ຫ້ອງວ່າການປົກຄອງເມືອງປະທຸມພອນ ກອງປະຊຸມພິປະ ດັ່ງກ່າວ ທ່ານ ບຸນຖອງ ສຸກຖາວົງ ຫົວຫນ້າຫ້ອງການ ຖວທ ເມືອງ ໄດ້ຂື້ນຜ່ານບົດລາຍງານ-ສະຫລຸບວຽກງານ ຖວທ ພາຍໃນເມືອງ ໃນໄລຍະ 1 ປີ ຜ່ານມາ, ໂດຍໄດ້ຍົກໃຫ້ເຫັນການເຄື່ອນໄຫວ ໃນການຈັດຕັງປະຕິບັດວຽກງານ ຖວທ ລວມທັງ ຈຸດີ-ຈຸດອ່ອນ ແລະ ຂໍ້ຄົງຄ້າງ, ລວມໄປເຖິງບາງວຽກງານທີ່ພົ້ນເດັ່ນ ອື່ນໆ. ໃນປີ 2017 ຜ່ານມາ ຖວທ ເມືອງສາມາດປະກາດກົມກອງພັດທະນາ ໄດ້ 5 ກົມກອງ, ລວມເປັນ 21 ກົມກອງ, ປະກາດບ້ານໃຫມ່ ເປັນຕົວເມືອງນ້ອຍໃນຊົນນະບົດໄດ້ 1 ບ້ານ ລວມເປັນ 3 ບ້ານ. ວຽກງານຖະແຫລງຂ່າວ ແມ່ນສາມາດເກັບກໍາຂ່າວ ຕອບສະຫນອງໃຫ້ວິທະຍຸ, ຫນັງສືພີມ ແລະ ໂທລະພາບ ໄດ້ທັງໝົດ 133 ຄັ້ງ, ໃນນັ້ນຂ່າວຈາກທ້ອງຖິ່ນ 38 ຄັ້ງ. ວຽກງານການທ່ອງທ່ຽວ ມີຕົວເລກ ເຖິງ 8,700 ກວ່າຄົນ ທີ່ເດີນທາງມາທ່ຽວເມືອງປະທຸມພອນ ໃນນັ້ນນັກທ່ອງທ່ຽວພາຍໃນ 3,173 ຄົນ ແລະ ຕ່າງປະເທດ ປະມານ 5,500 ກວ່າຄົນ, ຕໍ່ກັບວຍກງານດັ່ງກ່າວ ສາມາດສ້າງລາຍຮັບແກ່ຜູ້ປະກອບການທາງດ້ານທຸລະກິດ ໄດ້ ປະມານ 1,6 ຕື້ກວ່າກີບ. ໃນກອງປະຊຸມພົບປະ ດັ່ງກ່າວ ຍັງໄດ້ຜ່ານແຜນທິດທາງປະຈໍາປີ 2018 ອີກດ້ວຍ. ກອງປະຊຸມ ຄັ້ງນີ້ ຍັງໄດ້ມີການປະກອບຄໍາຄິດເຫັນ ແລກປ່ຽນຫາລື ເຊີ່ງກັນ ແລະ ກັນ ຢ່າງກົງໄປ-ກົງມາ ໃນນັ້ນໄດ້ຍົກໃຫ້ເຫັນການເກັບລາຍຮັບດ້ານວິຊາການ ເຂົ້າງົບປະມານຂອງເມືອງ, ລະບົບການສ້າງຂ່າວ-ຂຽນຂ່າວ, ການຕອບສະຫນອງຂ່າວໃຫ້ແຂວງ ແລະ ພາກສ່ວນຕ່າງໆ, ບັນດາໂຄງຮ່າງການຈັດຕັງ ແລະ ບັນດາສະຖານທີ່ທ່ອງທ່ຽວແຫ່ງຕ່າງໆ, ລວມທັງການອະນຸຍາດໃຫ້ຫົວຫນ່ວຍທຸລະກິດ ເຂົ້າມາພັດທະນາແຫລ່ງທ່ອງທ່ຽວ ຕາມເງື່ອນໄຂຄວາມເປັນຈິງ ເຊີ່ງເຮັດໃຫ້ວຽກງານ ຖວທ ເມືອງ ໄດ້ບັນລຸຕາມເປົ້າຫມາຍ ແລະ ແຜນການທີ່ກໍານົດໄວ້ ເປັນຢ່າງດີ.
Editor: ກຳປານາດ ລັດຖະເຮົ້າ
