ໃນວັນທີ 26 ມີຖຸນາ 2018 ຜ່ານມານີ້, ຢູ່ທີ່ສະໂມສອນໃຫຍ່ ເມືອງວັງວຽງ, ແຂວງວຽງຈັນໄດ້ຈັດພິທີຮັບຮອງໜ່ວຍສະຫະພັນແມ່ຍິງ 17 ໜ່ວຍກົມກອງ ແລະ 6 ໜ່ວຍບ້ານອ້ອມຂ້າງເມືອງເປັນໜ່ວຍສະຫະພັນແມ່ຍິງ 3 ດີ. ຄັ້ງທີ 2 ແລະ 3 ສະໄໝທີ 7 ຂຶ້ນຢ່າງເປັນທາງການ, ໂດຍເປັນກຽດເຂົ້າຮ່ວມຂອງ ທ່ານ ບຸນປັນ ພົມມະວົງ ຮອງເລຂາພັກເມືອງປະທານແນວລາວສ້າງຊາດເມືອງທັງເປັນຜູ້ຊີ້ນຳອົງການຈັດຕັ້ງມະຫາຊົນເມືອງວັງວຽງ, ມີ ທ່ານນາງ ຂັນຄຳ ສີທານີ ກຳມະການພັກເມືອງ ປະທານສະຫະພັນແມ່ຍິງເມືອງ, ພະນັກງານທີ່ກ່ຽວຂ້ອງ, ອຳນາດການປົກຄອງ, ມີປະທານສະຫະພັນແມ່ຍິງທັງ 17 ໜ່ວຍກົມກອງ ແລະ 6 ໜ່ວຍບ້ານ. ສະມາຊິກສະຫະພັນແມ່ຍິງເຂົ້າຮ່ວມຢ່າງພ້ອມພຽງ.
ໃນພິທີ ທ່ານນາງ ບຸນມີ ສຸດທິພັກ ປະທານສະຫະພັນແມ່ຍິງໂຮງຮຽນປະຖົມໂພນຊູ ໄດ້ຕາງໜ້າໃຫ້ສະຫະພັນແມ່ຍິງທັງ 17 ໜ່ວຍກົມກອງ ແລະ 6 ໜ່ວຍບ້ານ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດຂໍ້ແຂ່ງຂັນ 3 ດີ ວ່າ: ໜ່ວຍສະຫະພັນແມ່ຍິງທັງ 17 ໜ່ວຍກົມກອງ 6 ໜ່ວຍບ້ານຄື: ໜ່ວຍໄຟຟ້າ,ສູນຝຶກອົບຮົມຜູ້ບໍລິຫານການສຶກສາ,ກະສີກຳ ແລະ ປ່າໄມ້ເມືອງ, ໄປສະນີໂທລະຄົມ ແລະ ສື່ສານ, ແຮງງານສະຫວັດດີການ-ສັງຄົມ ແລະ ແຜນການ, ຈັດຕັ້ງ-ກວດກາ-ໂຄສະນາ-ພາຍໃນ, ກຸ່ມໂຮງຮຽນປະຖົມທ່າເຮືອ, ໂຮງຮຽນປະຖົມວຽງໄຊ, ໂຮງຮຽນປະຖົມວັງວຽງ, ກຸ່ມໂຮງຮຽນປະຖົມນາມອນ, ໂຮງຮຽນ ມສ ນາມອນ, ໂຮງຮຽນປະຖົມໂພນຊູ, ໂຮງຮຽນປະຖົມປາກເປາະ,ໂຮງຮຽນປະຖົມໂພນເພັງ, ໂຮງຮຽນອະນຸບານໂພນເພັງ, ໂຮງຮຽນອະນຸບານເມືອງ, ໂຮງຮຽນປະຖົມນາດາວ, ບ້ານວັງໂພ, ບ້ານຊວ່າງ, ບ້ານໂພນເງີນ, ບ້ານນາເລົາ, ບ້ານທ່າເຮືອໃຕ້, ແລະ ບ້ານຫ້ວຍໝໍ້ ແມ່ນອົງການຈັດຕັ້ງມະຫາຊົນໜຶ່ງເຊິ່ງເປັນເສນາທິການໃຫ້ແກ່ ຄະນະໜ່ວຍພັກ ທີ່ຂຶ້ນກັບ, ໂດຍເຮັດໜ້າທີ່ສຶກສາອົມຮົມການເມືອງແນວຄິດ, ເຕົ້າໂຮມຄວາມສາມັກຄີແມ່ຍິງພາຍໃນໜ່ວຍປະຕິບັດແນວທາງນະໂຍບາຍຂອງພັກ-ລັດວາງອອກ. ເຊິ່ງທັງ17 ໜ່ວຍກົມກອງ ແລະ 6 ໜ່ວຍບ້ານ ມີສະມະຊິກແມ່ຍິງທັງໝົດ 963 ຄົນ, ມີ 3 ເຜົ່າ ຄື: ເຜົ່າລາວ 736 ຄົນ, ເຜົ່າມົ້ງ 106 ຄົນ. ເຜົ່າຂະມຸ 121 ຄົນ, ນັກຮຽນ 89 ຄົນ, ອາສາສະມັກ 8 ຄົນ, ຫົວໜ້າຈຸງານ 4 ຄົນ, ຮອງຫົວໜ້າຈຸງານ 3 ຄົນ, ເຂົ້າເປັນສະມະຊິກພັກ 108 ສະຫາຍ, ສໍາຮອງ 12 ສະຫາຍ, ສະມາຊິກຊາວໝຸ່ມ 371 ສະຫາຍ, ສະມາຊິກກໍາມະບານ 233 ສະຫາຍ, ມີຄະນະໜ່ວຍ 65 ຄົນ ແລະແບ່ງອອກເປັນ 86 ຈຸ.
ເພື່ອຈັດຕັ້ງປະຕິບັດຂໍ້ແຂ່ງຂັນ 3 ດີໃນຕໍ່ໜ້ານັ້ນສະຫະພັນແມ່ຍິງທັງ 17 ໜ່ວຍກົມກອງ ແລະ 6 ໜວ່ຍບ້ານ ຕ້ອງໄດ້ຈັດແບ່ງເວລາໃຫ້ເໝາະສົມເພື່ອຊຸກຍູ້ການເຄື່ອນໄຫວຂະບວນການຈັດຕັ້ງປະຕິບັດຂໍ້ແຂ່ງຂັນ 3 ດີຂອງສະຫະພັນແມ່ຍິງໃຫ້ເປັນຂະບວນຟົດຟື້ນກວ່າເກົ່າ, ຄະນະສະຫະພັນແມ່ຍິງຕ້ອງເພີ່ມທະວີຄວາມເອົາໃຈໃສ່ໃນການຕິດຕາມກວດກາ ແລະ ຊຸກຍູ້ຂະບວນດັ່ງກ່າວ, ສະມາຊິກສະຫະພັນແມ່ຍິງທຸກຄົນຕ້ອງເປັນເຈົ້າການປະກອບສ່ວນເຂົ້າໃນການຈັດຕັ້ງປະຕິບັດຂໍ້ແຂ່ງຂັນ 3 ດີຢ່າງຕັ້ງໜ້າ. ການຈັດຕັ້ງປະຕິບັດຂໍ້ແຂ່ງຂັນ 3 ດີ ຄື: ເປັນພົນລະເມືອງດີ, ພັດທະນາດີ ແລະ ສ້າງຄອບຄົວດີມີຄວາມຜາສຸກນັ້ນ ສະຫະພັນແມ່ຍິງທັງໝົດ ໃນ 17 ໜ່ວຍກົມກອງ ແລະ 6 ໜວ່ຍບ້ານ, ຜ່ານການສະຫລຸບ, ປະເມີນຜົນງານ ແລະ ຄັດເລືອກປະເພດດີເດັ່ນໃນການຈັດຕັ້ງປະຕິບັດຂໍ້ແຂ່ງຂັນ 3 ດີຄັ້ງທີ່ 2,3 ສະໄໝທີ 7 ສາມາດປະເມີນພົນລະເມືອງດີໄດ້ 963 ຄົນ, ພັດທະນາດີ 941 ຄົນ, ສ້າງຄອບຄົວມີຄວາມຜາສຸກ 963 ຄົນ, ແລະ ໄດ້ຢັ້ງຢືນສະມະຊິກສະຫະພັນແມ່ຍິງ 3 ດີທັງໝົດໄດ້ 949 ຄົນ, ໃນນັ້ນປະເພດ 1 ມີຈໍານວນ 773 ຄົນ, ປະເພດ 2 ໄດ້ ຈໍານວນ 176 ຄົນ.
ໃຫ້ກຽດຂຶ້ນມອບໃບຢັ້ງຢືນ ໜ່ວຍສະຫະພັນແມ່ຍິງທັງ 17 ໜ່ວຍກົມກອງ ແລະ 6 ໜ່ວຍບ້ານເປັນໜ່ວຍສະຫະພັນແມ່ຍິງ 3 ດີໂດຍ ທ່ານ ບຸນປັນ ພົມມະວົງ ປະທານແນວລາວສ້າງຊາດເມືອງວັງວຽງ ແລະ ກ່າວຮັບໂດຍປະທານສະຫະພັນແມ່ຍິງທັງ17 ໜ່ວຍກົມກອງ ແລະ 6 ໜ່ວຍບ້ານ, ຫລັງຈາກນັ້ນກໍ່ໄດ້ ພ້ອມກັບຈັບມືກັນແຂ່ງຂັນຮັບເອົາຂໍ້ແຂ່ງຂັນ 3 ດີ .
ໃນຕອນທ້າຍພີທີ ທ່ານ ປະທານແນວລາວສ້າງຊາດເມືອງວັງວຽງ ໄດ້ໃຫ້ກຽດຂຶ້ນໂອລົມ ແລະ ໃຫ້ທິດຊີ້ນຳ ໂດຍທ່ານໄດ້ເນັ້ນໜັກໃຫ້ເອື້ອຍນ້ອງແມ່ຍິງຈັດຕັ້ງປະຕິບັດເນື້ອໃນຂໍ້ແຂ່ງຂັນ 3 ຂອງສະຫະພັນແມ່ຍິງລາວ ໃຫ້ປະກົດຜົນເປັນຈິງ.
ທີມຂ່າວ ຈາກເມືອງວັງວຽງ
Editor: ກຳປານາດ ລັດຖະເຮົ້າ
