ບັນຍາກາດ ການເຂົ້າ-ອອກຜ່ານດ່ານພາສີ ສາກົນ ຂົວມິດຕະພາບລາວ-ໄທ ແຫ່ງທີ 1 ວຽງຈັນ-ໜອງຄາຍ ຄຶກຄັກພໍສົມຄວນ ໂດຍການຈັດຕັ້ງປະຕິບັດວຽກງານ ເກັບລາຍຮັບເຂົ້າງົບປະມານແຫ່ງລັດປີ 2018 ນັບແຕ່ຕົ້ນເດືອນມັງກອນ ຫາກາງເດືອນພຶດສະພາ 2018 (ເກືອບ 5 ເດືອນ) ຜ່ານມາ ສາມາດປະຕິບັດລາຍຮັບໄດ້ທັງໝົດ 1 ພັນ 80 ຕື້ກວ່າກີບ ເທົ່າກັບ 33,26 ສ່ວນຮ້ອຍ, ຂອງແຜນການປີ ຈໍານວນ 3.247 ຕື້ກວ່າກີບ, ຄາດຄະເນ 6 ເດືອນຕົ້ນປີ ຈະສາມາດປະຕິບັດລາຍ ຮັບໄດ້ທັງໝົດ 1.428 ຕື້ກີບ. ລາຍຮັບສ່ວນໃຫຍ່ ໄດ້ມາຈາກ ການນໍາເຂົ້າພາຫະນະເປັນຫລັກ, ຮອງລົງມາແມ່ນການນຳເຂົ້ານ້ຳມັນເຊື້ອໄຟ ແລະ ການນຳເຂົ້າສິນຄ້າເຄື່ອງຂອງຕ່າງໆ, ກວມ 44,27 ຂອງລາຍຮັບທັງໝົດ.
ທ່ານ ບຸນແອງ ພັນທະວົງ ຫົວໜ້າ ດ່ານພາສີສາກົນຂົວມິດຕະພາບ 1 ໃຫ້ສໍາພາດກັບທີມ ຂ່າວ ທີ່ກ່ຽວຂ້ອງວ່າ: ດ່ານແຫ່ງນີ້ປະກອບມີ 4 ໜ່ວຍງານ ຄື:
- ໜ່ວຍງານຄຸ້ມຄອງການ ແຈ້ງສິນ ຄ້າເສຍພາສີ-ອາກອນ ຮັບແຈ້ງສິນຄ້າງົດເກັບ, ຍົກເວັ້ນ ແລະ ຫລຸດຜ່ອນ;
- ໜ່ວຍຄຸ້ມຄອງສາງ ແລະ ເຂດປອດພາສີ, ຄຸ້ມຄອງສາງທ່ານາແລ້ງ, ສາງຊີວາຍ ແລະ ຮ້ານຄ້າປອດພາສີຢູ່ຂົວ 1
- ໜ່ວຍ ງານກວດກາສິນຄ້າ, ກວດກາສິນຄ້າຢູ່ສາງທ່ານາແລ້ງ, ຊີວາຍ, ຂົວມິດຕະພາບ 1
- ໜ່ວຍງານ ກວດ ກາພາຫະນະ ແລະ ຜູ້ໂດຍສານຢູ່ຂົວມິດຕະພາບ 1.
ລາຍຮັບດັ່ງກ່າວ, ແມ່ນໄດ້ມາຍ້ອນບັນດາພະນັກ ງານ ທຸກພາກສ່ວນທົ່ວ ຂົວມິດຕະພາບ 1 ໄດ້ພ້ອມກັນຈັດຕັ້ງປະຕິບັດວຽກງານ ວິຊາສະເພາະ ແລະ ໄດ້ມີການປັບປຸງແກ້ໄຂດ້ານ ການບໍລິການ ໃຫ້ມີຄວາມສະດວກວ່ອງໄວ ຂຶ້ນກວ່າເກົ່າ. ເພື່ອຮັບປະກັນ ການປະຕິບັດການຈັດເກັບລາຍຮັບ ໃຫ້ບັນລຸຄາດໝາຍທີ່ວາງໄວ້ ດ່ານພາສີ ສາກົນຂົວມິດຕະພາບ 1 ຕ້ອງໄດ້ເອົາໃຈໃສ່ ປະຕິບັດຕາມທິດທາງ ແລະ ມາດຕະການ ຢ່າງເຂັ້ມງວດ, ເພີ່ມທະວີຄວາມເປັນເຈົ້າການ ໃນການຊີ້ນໍາ-ນໍາພາ ການປະຕິບັດໜ້າທີ່ ວຽກງານຮອບດ້ານ ພາຍໃນດ່ານ ແລະ ໜ່ວຍງານຕ່າງໆ ຕ້ອງມີຄວາມຮັບຜິດຊອບສູງ ໃນການຄຸ້ມຄອງ-ກວດກາສິນຄ້າຂາເຂົ້າ-ອອກສາງ ແລະ ດ່ານ, ການແຈ້ງເສຍພາສີໃຫ້ສອດຄ່ອງ ຕາມຫລັກການຂອງແກັດ (GATT); ຕິດຕາມກວດກາຄືນ ກ່ຽວກັບວຽກງານງົດເກັບຍົກເວັ້ນ ແລະ ຫລຸດຜ່ອນກ່ຽວກັບໂຄງການ ແລະ ການລົງທຶນຂອງລັດ, ຫລີກລ້ຽງບັນຫາຊ່ອງວ່າງ ການລັກລອບຕ່າງໆ; ເອົາໃຈໃສ່ໃນການຄຸ້ມຄອງ, ການຈັດເກັບຄ່າທໍານຽມລົດ -ຄົນເຂົ້າ-ອອກດ່ານໃຫ້ຖຶກຕ້ອງ ແລະ ເຂັ້ມງວດຂຶ້ນ, ພະນັກງານທຸກຄົນ ຕ້ອງເອົາໃຈໃສ່ ຈັດຕັ້ງປະຕິບັດ ຂໍ້ຕົກລົງ ສະບັບເລກທີ 1224/ກງ ລົງວັນທີ 10 ເມສາ 2017 ວ່າດ້ວຍຂໍ້ຫ້າມ ແລະ ວິໄນຂອງພະນັກ ງານ-ລັດຖະກອນ ຂະແໜງການເງິນຢ່າງເຂັ້ມງວດ.
ທ່ານ ບຸນແອງ ພັນທະວົງ ຍໍ້າຕື່ມວ່າ: ນອກນີ້, ຍັງຕ້ອງໄດ້ປະຕິບັດຕາມ ບັນດາມາດຕະການ ເປັນຕົ້ນ ເພີ່ມທະວີເຂັ້ມງວດ, ຕິດຕາມ, ກວດກາສິນຄ້າ, ເຄື່ອງຂອງທີ່ນໍາເຂົ້າ ແລະ ສົ່ງອອກຜ່ານມາເສຍພາສີ-ອາກອນ, ຍົກເວັ້ນ, ງົດເກັບ, ຫລຸດຜ່ອນ ແລະ ການຄຸ້ມຄອງສິນຄ້າ ເຄື່ອນຍ້າຍ ໃຫ້ຖືກຕ້ອງຕາມ ການອະນຸຍາດຂອງຂັ້ນເທິງ ເພື່ອໃຫ້ນໍາໃຊ້ຖຶກເປົ້າໝາຍ, ບໍລິການ-ການປະຈໍາການ ໃຫ້ທ່ວງທັນເວລາ ເພື່ອອໍານວຍຄວາມສະດວກໃຫ້ແກ່ການຄ້າ, ການລົງທຶນ ແລະ ຜູ້ປະກອບການ, ປະຕິບັດມາດຕະການຢ່າງເຂັ້ມງວດ ຕໍ່ຜູ້ລະເມີດກົດໝາຍ ວ່າດ້ວຍພາສີ ແລະ ນິຕິກໍາຕ່າງໆທີ່ຂັ້ນເທິງວາງອອກ. ທັງໄດ້ຮຽກຮ້ອງມາຍັງ ຜູ້ປະກອບການທັງຫລາຍ ທີ່ນໍາເຂົ້າ-ສົ່ງອອກ ຜ່ານດ່ານພາສີສາກົນຂົວ ມິດຕະພາບ 1 ຈົ່ງພ້ອມກັນໃຫ້ຄວາມຮ່ວມມື ກັບເຈົ້າໜ້າທີ່ ເພື່ອຕ້ານ, ສະກັດກັ້ນການລັກລອບໜີພາສີ ແລະ ບໍ່ໃຫ້ມີຊ່ອງວ່າງໃນການຮົ່ວໄຫລ ຂອງລາຍຮັບ ແລະ ອຶ່ນໆ.
Editor: ກຳປານາດ ລັດຖະເຮົ້າ
