ຜ່ານການສໍາພາດ ທ່ານ ນວນໄຊ ພະໄຊສົມບັດ ຫົວໜ້າ ກອງຄຸ້ມຄອງພາຫະນະ ແລະ ການຂັບຂີ່ ນະຄອນຫຼວງວຽງຈັນ ໄດ້ ລາຍງານໃຫ້ຮູ້ວ່າ: ຈໍານວນພາຫະນະທີ່ມາຂຶ້ນທະບຽນຢູ່ ກອງຄຸ້ມຄອງພາຫະນະ ແລະ ການຂັບຂີ່ ນະຄອນຫລວງ ບໍ່ນັບພາຫະນະກຳລັງ ປກຊ-ປກສ ແຕ່ລະປີເປັນຈຳນວນຫຼວງຫຼາຍສົມຄວນ ສະເລ່ຍໃສ່ພົນລະເມືອງ ນະຄອນຫລວງວຽງຈັນ ເກືອບຜູ້ລະຄັນ ດັ່ງນັ້ນ, ຈຶ່ງເຮັດໃຫ້ເກີດມີສະພາບການສັນຈອນແອອັດ ເຊິ່ງມັນສະແດງໃຫ້ເຫັນຈຳນວນພາຫະນະ ໃໝ່ ບໍ່ລວມພາຫະທີ່ປ່ຽນໂອນໄດ້ມາຂຶ້ນທະບຽນຢູ່ ກອງຄຸ້ມຄອງພາຫະນະ ແລະ ການຂັບຂີ່ ໃນປີ 2017 ມີທັງໝົດ 57.118 ຄັນ, ແຕ່ທຽບໃສ່ປີ 2016 ຫຼຸດລົງ 2 ພັນກວ່າຄັນ, ໃນນັ້ນ ລົດຈັກ 34.907 ຄັນ, ລົດສາມລໍ້ 1 ຄັນ, ລົດເກງ 5.743 ຄັນ, ລົດກະບະ 10.089 ຄັນ, ລົດຈິບ 3.227 ຄັນ, ລົດຕູ້ 698 ຄັນ, ລົດບັນທຸກ 2.264 ຄັນ, ແລະ ລົດໂດຍສານ 189 ຄັນ.
ປະຈຸບັນໃນສະເພາະ 5 ເດືອນຕົ້ນປີ 2018 ນີ້, ມີພາຫະນະມາຂຶ້ນທະບຽນຢູ່ ກອງຄຸ້ມຄອງພາຫະນະ ແລະ ການຂັບຂີ່ ນະຄອນຫລວງວຽງຈັນ ທັງໝົດ 25.566 ຄັນ, ໃນນັ້ນ ລົດຈັກ 15.445 ຄັນ, ລົດເກງ 2.362 ຄັນ, ລົດກະບະ 5.052 ຄັນ, ລົດຈິບ 1.421 ຄັນ, ລົດຕູ້ 282 ຄັນ, ລົດບັນທຸກ 913 ຄັນ ແລະ ລົດໂດຍສານ 81 ຄັນ. ແລະ ນັບແຕ່ເດືອນ ມີຖຸນາ ໄປ ເຖີງເດືອນທັນວາ ຕົວເລກອາດຈະເພີ່ມຂື້ນ ຫລາຍກວ່ານີ້ເທົ່າຕົວ.
Editor: ກຳປານາດ ລັດຖະເຮົ້າ
