ຂະແໜງປູກຝັງ, ພະແນກກະສິກໍາ ແລະ ປ່າໄມ້ ແຂວງຄໍາມ່ວນ ລາຍງານໃຫ້ຮູ້ວ່າ: ລະດູ ການຜະລິດເຂົ້ານາປີນີ້ ທົ່ວແຂວງມີແຜນການສູ້ຊົນໃນ ເນື້ອທີ່ທັງໝົດ 84.300 ເຮັກຕາ, ຄາດຄະເນສະມັດຖະພາບ 3,60 ໂຕນ/ເຮັກຕາ, ຄາດຄະເນຜົນຜະລິດ 303.550 ໂຕນ, ຄາດຄະເນໝົດແນວປູກ 5.058 ໂຕນ, ໃນນັ້ນ, ເນື້ອທີ່ແຜນການນາດຳໃນທົ່ວແຂວງ ມີ 70.106 ເຮັກຕາ, ແນວປູກ 4.206 ໂຕນ, ແຜນນາຫວ່ານ 14.194 ເຮັກຕາ, ແນວປູກ 851,6 ໂຕນ, ຊຶ່ງໃນນັ້ນໄດ້ ແຜນການຜະລິດ ອອກເປັນສອງລະບົບ ຄື: ຜະລິດ ເປັນສະບຽງອາຫານ ແລະ ການຜະລິດເປັນສິນຄ້າ.
ສ່ວນຜະລິດ ເປັນສະບຽງອາຫານ ມີເນື້ອທີ່ 68.830 ເຮັກຕາ, ສະມັດຖະພາບ 3,53 ໂຕນ/ເຮັກຕາ, ຜົນຜະລິດ 242.480 ໂຕນ, ຜະລິດເປັນສິນຄ້າເນື້ອທີ 15.470 ເຮັກຕາ, ສະມັດຖະພາບ 3,92 ໂຕນ/ເຮັກຕາ, ຜົນຜະລິດ 61.070 ໂຕນ. ການຕົກກ້າ ຂອງຊາວກະສິກອນໄດ້ເລີ່ມ ລົງມືມາແຕ່ກາງເດືອນພຶດສະພາ ມາຮອດກາງເດືອນມິຖຸນາ 2018 ສາມາດຕົກກ້າໄດ້ 3.747 ໂຕນ, ກວມເອົາ 74,09 ສ່ວນຮ້ອຍ ຂອງຈຳນວນແນວປູກທັງໝົດ, ສ່ວນການປັກດຳແມ່ນໄດ້ເລີ່ມລົງມືປັກດຳມາແຕ່ຕົ້ນເດືອນພຶດສະພາ ມາຮອດກາງເດືອນມິຖຸນາ ສາມາດປັກດຳໄດ້ 5.575 ເຮັກຕາ, ກວມເອົາ 6,61% ຂອງ ເນື້ອທີ່ແຜນການ. ສຳລັບນາຫວ່ານ ໃນຕົ້ນເດືອນມິຖຸນາ ຊາວກະສິກອນໃນ 4 ເມືອງ ຄື: ເມືອງທ່າແຂກ, ເມືອງໜອງບົກ, ເມືອງຫີນບູນ ແລະ ເມືອງເຊບັ້ງໄຟ ໄດ້ຢຸດຕິການຫວ່ານ ໃນເນື້ອທີ່ປະຕິບັດໄດ້ 14.194 ເຮັກຕາ, ໃຊ້ແນວປູກ ທັງໝົດ 851,6 ໂຕນ, ເມື່ອທຽບ ໃສ່ແຜນການຂອງພະແນກກະສິກໍາ ແລະ ປ່າໄມ້ແຂວງ ວາງອອກແມ່ນສຳເລັດ 100 ສ່ວນຮ້ອຍ, ສະຫຼຸຸບແລ້ວນາດຳ ແລະ ນາຫວ່ານ ສາມາດປະຕິບັດໄດ້ ໃນເນື້ອທີ່ 19.769 ເຮັກຕາ, ເທົ່າກັບ 23,5 ສ່ວນຍຮ້ອຍ, ໝົດແນວປູກ 4.598 ກວ່າ ໂຕນ, ກວມເອົາ 90,93 ສ່ວນຮ້ອຍ ຂອງຈຳນວນແນວປູກ 5.058 ໂຕນ.
ການຜະລິດ ເຂົ້າເນີນສູງ ໄດ້ເລີ່ມລົງມືປູກ ມາແຕ່ກາງເດືອນພຶດສະພາ ມາຮອດກາງເດືອນມິຖຸນານີ້ ສາມາດປະຕິບັດໃນເນື້ອທີ່ 402,7 ເຮັກຕາ, ດ້ານການປູກພືດສຳຮອງ ຫຼື ປູກພືດລະດູຝົນປີນີ້ແຜນສູ້ຊົນເນື້ອທີ່ທົ່ວແຂວງໃຫ້ໄດ້ 5.300 ເຮັກຕາ, ຄາດຄະເນຜົນຜະລິດ 65.300 ໂຕນ, ມາຮອດຕົ້ນເດືອນພຶດ ສະພາ 2018 ຊາວກະສິກອນ ໄດ້ລົງມືປູກພືດລະດູຝົນໃນ ເນື້ອທີ່ 3.896 ເຮັກຕາ ເທົ່າກັບ 74 ສ່ວນຮ້ອຍ.
Editor: ກຳປານາດ ລັດຖະເຮົ້າ
