ກອງປະຊຸມຄະນະກຳມະການຄຸ້ມຄອງການແກ້ໄຂບັນຫາລະເບີດບໍ່ທັນແຕກ ທີ່ຕົກຄ້າງແຂວງວຽງຈັນ ໄດ້ຈັດຂຶ້ນໃນວັນທີ 28 ມີຖຸນາ 2018 ຜ່ານມາ ຢູ່ທີ່ຫ້ອງວ່າການປົກຄອງ ແຂວງວຽງຈັນ ໂດຍການເປັນປະທານຂອງ ທ່ານ ຍົມສອນ ຄຳມາສີ ຮອງປະທານຄະນະກຳມະການຄຸ້ມຄອງການແກ້ໄຂບັນຫາລະເບີດບໍ່ທັນແຕກທີ່ຕົກຄ້າງ ແຂວງວຽງຈັນ ເປັນກຽດເຂົ້າຮ່ວມຂອງ ທ່ານ ພູຂຽວ ຈັນທະສົມບູນ ຫົວຫນ້າຫ້ອງການ ຄະນະກຳມະການເພື່ອແກ້ໄຂລະເບີດບໍ່ທັນແຕກທີ່ຕົກຄ້າງຂັ້ນສູນກາງ ມີບັນດາທ່ານຄະນະກໍາມະການແກ້ໄຂລະເບີດທີ່ບໍ່ທັນແຕກທີ່ຕົກຄ້າງ ແຂວງວຽງຈັນເຂົ້າຮ່ວມ.
ກອງປະຊຸມໄດ້ຮັບຟັງການຜ່ານບົດສະຫລຸບການເຄື່ອນໄຫວວຽກງານ ລະເບີດບໍ່ທັນແຕກ ທີ່ຕົກຄ້າງ ໃນໄລຍະ 3 ເດືອນຕົ້ນປີ 2018 ຜ່ານມາ, ແມ່ນໄດ້ເອົາໃຈໃສ່ໂຄສະນາສຶກສາຄວາມສ່ຽງຈາກ ລບຕ ເພາະ ແຂວງວຽງຈັນກໍເປັນແຂວງຫນຶ່ງທີ່ມີລະເບີດບໍ່ທັນແຕກທີ່ຕົກຄ້າງໃນປາງສົງຄາມ ຢ່າງຫລວງຫລາຍ ຜ່ານມາ ຫ້ອງການ ຄະນະກຳມະການຄຸ້ມຄອງແກ້ໄຂບັນຫາລະເບີດບໍ່ທັນແຕກທີ່ຕົກຄ້າງ ແຂວງວຽງຈັນໄດ້ສົມທົບກັບອຳນາດການປົກຄອງ ແລະ ພາກສ່ວນກ່ຽວຂ້ອງໄດ້ລົງເກັບກຳຂໍ້ມູນທີ່ເຫັນວ່າມີຮ່ອງຮອຍຂອງ ລບຕ ທີ່ຕົກຄ້າງຢູ່ໃນແຂວງວຽງຈັນໄດ້ 3 ເມືອງຄື ເມືອງ ກາສີ,ວັງວຽງ ແລະ ຫີນເຫີບ ມີທັງຫມົດ 21 ບ້ານ, ທີ່ເຫັນວ່າມີຜົນກະທົບຈາກ ລບຕ.
ໃນປີ 2016-2018 ແຂວງວຽງຈັນແມ່ນມີຜູ້ຖືກເຄາະຮ້າຍຈາກ ລບຕ ຈຳນວນ 17 ທ່ານ.ນອກນີ້ຍັງໄດ້ເພື່ອແກ້ໄຂບັນຫາດັ່ງກ່າວ ຫ້ອງການ ຄກລຂ ແຂວງວຽງຈັນ ໄດ້ເອົາໃຈໃສ່ສົມທົບກັບພາກສ່ວນກ່ຽວຂ້ອງເກັບກຳຂໍ້ມູນດ້ານຕ່າງໆເພື່ອສ້າງເປັນແຜນການ ແລະ ນຳສະເຫນີ ຄຊກລ ຂັ້ນສູນກາງ ເພື່ອວາງແຜນສຳຫລວດກວດກູ້ ລບຕ ຢູ່ແຂວງວຽງຈັນ ເຊິ່ງເປັນການສຳຫລວດໂດຍບໍ່ແມ່ນວິຊາການຢູ່ບັນດາເມືອງທີ່ເປັນຈຸດສຸມທີ່ເຫັນວ່າມີຮ່ອງຮອຍ ລບຕ ເປັນຈຳນວນ 36 ບ້ານ, ໃນ 3 ເມືອງຂອງແຂວງວຽງຈັນ ໃນປີ 2018 ນີ້ ຄືການປະຕິບັດການທໍາລາຍ ບົ່ມບີ່ 24 ຈຳນວນ 3 ຫນ່ວຍ ຢູ່ບ້ານ ໂພນເພັງ, ເມືອງວັງວຽງ, ລູກປືນອື່ນໆ ຢູ່ເມືອງໂພນໂຮງ ແລະ ເມືອງຫີນເຫີບ. ພ້ອມນີ້ ກອງປະຊຸມຍັງໄດ້ຮັບຟັງ ການຜ່ານຮ່າງຂໍ້ຕົກລົງຂອງທ່ານເຈົ້າແຂວງໆວຽງຈັນ ວ່າດ້ວຍ: ການແບ່ງຄວາມຮັບຜິກຊອບໃຫ້ຄະນະກຳມະການຄຸ້ມຄອງເພື່ອແກ້ໄຂ ລບຕ ຂັ້ນແຂວງ ເພື່ອເຮັດໃຫ້ບັນດາຄະນະກຳມະການ ຮູ້ຈັກທີ່ຕັ້ງ, ພາລະບົດບາດ, ຫນ້າທີ່, ຂອບເຂດສິດ, ໂຄງປະກອບການຈັດຕັ້ງ,ຫລັກການ ແລະ ແບບແຜນວິທີເຮັດວຽກ ເພື່ອແກ້ໄຂບັນຫາ ລ ບ ຕ ທີ່ຕົກຄ້າງຢູ່ໃນ ສ ປ ປ ລາວ ເວົ້າລວມເວົ້າສະເພາະກໍຄື ແຂວງວຽງຈັນ ໃຫ້ດຳເນີນໄປຢ່າງມີປະສິດຕິພາບ ແລະ ໄດ້ຮັບຜົນສຳເລັດຕາມລະດັບຄາດຫມາຍ.
Editor: ກຳປານາດ ລັດຖະເຮົ້າ
