ໃນວັນທີ 25 ມິຖຸນາ 2018 ນີ້ ທ່ານ ໄຊສະໝອນ ເພນພະຈັນ ອໍານວຍການໂຮງຮຽນ ມສ ທ່າແຕງ ຕາງໜ້າຜູ້ປົກຄອງ, ບໍລິສັດພາຍໃນເມືອງທ່າແຕງ ພ້ອມດ້ວຍສອງນາງສາວແຂວງເຊກອງ ຄື: ນາງ ເອະດາວັນ ພັນທະວົງ, ໝາຍເລກ S18 ໄດ້ຮັບຕຳແໜ່ງນາງສາວເຊກອງ ປະຈຳປີ 2018 ແລະ ນາງ ສຸກທະວີ ສີລິພັນ ຮອງອັນດັບທີ 3 ທັງສອງນາງສາວ ເປັນຕົວແທນສາວງາມຈາກເມືອງທ່າແຕງ ຕາງໜ້າສາວເຊກອງ ໄດ້ນໍາເອົາກະຕ່າຂອງຂັວນມອບໃຫ້ການນໍາເມືອງທ່າແຕງ ທີ່ໄດ້ປະກອບສວ່ນຊຸກຍູ້ນາງສາວງາມ ບັນດາເຜົ່າພາຍໃນເມືອງເຂົ້າການປະກວດນາງສາວເຊກອງ ປະຈໍາປີ 2018 ໃນເດືອນ ເມສາຜ່ານມາ, ເພື່ອສົ່ງເສີມຄວາມສາມາດຂອງແມ່ຍິງ ຕິດພັນກັບການອະນຸລັກມູນເຊື້ອວັດທະນະທຳ, ຮີດຄອງປະເພນີອັນດີງາມຂອງຊາດ, ຂອງເຜົ່າໃຫ້ຍືນຍົງຄົງຕົວ ຄຽງຄູ່ກັບຊາດລາວ-ຄົນລາວຕະຫຼອດໄປ.
ພິທີມອບ-ຮັບຂອງຂັວນຄັ້ງນີ້, ຈັດຂຶ້ນຢູ່ທີ່ຊັ້ນສອງຫ້ອງວ່າການປົກຄອງເມືອງ ທ່າແຕງ ໂດຍມີ ທ່ານ ຄໍາສອນ ກອນເຍີ ເຈົ້າເມືອງ-ເມືອງທ່າແຕງ ພ້ອມດ້ວຍຄະນະນໍາຂອງເມືອງ, ຕາງໜ້າສາວເຊກອງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມເປັນສັກຂີ່ພະຍານ. ຂະນະດຽວກັນ ຍັງໄດ້ນໍາເອົາກະຕ່າຂອງຂັວນມາມອບໃຫ້ຫ້ອງການຖະແຫຼ່ງຂ່າວ, ວັດທະນະທໍາ ແລະ ທ່ອງທ່ຽວເມືອງທ່າແຕງ ໂດຍກ່າວຮັບຂອງ ທ່ານ ພູວົງ ກອງຊັບ ຫົວໜ້າຫ້ອງການຖະແຫຼ່ງຂ່າວ,ວັດທະນະທໍາ ແລະ ທ່ອງທ່ຽວເມືອງ ພ້ອມດ້ວຍຄະນະ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນຕອນທ້າຍພິທີ ເຈົ້າເມືອງ-ເມືອງ ທ່າແຕງ ແລະ ຫົວໜ້າຫ້ອງການຖະແຫຼ່ງຂ່າວ,ວັດທະນະທໍາ ແລະ ທ່ອງທ່ຽວເມືອງ ທ່າແຕງ ໄດ້ສະແດງຍ້ອງຍໍຊົມຊົມມາຍັງ ນາງສາວເຊກອງ ປະຈໍາປີ 2018 ກໍ່ຄື ນາງສາວບັນດາເຜົ່າທີ່ເປັນຕົວແທນຂອງເມືອງທ່າແຕງ ທີ່ສົ່ງເຂົ້າການປະກວດໃນໄລຍະຜ່ານມາມີ 5 ນ້ອງນາງສາວ, ສາມາດຮັບຕຳແໜ່ງນາງສາວເຊກອງປີ 2018, ຂະນະທີ່ຮອງຊະນະເລີດອັນດັບທີໜຶ່ງ ແລະ ຮອງຊະນະເລີດອັນດັບທີສາມແມ່ນ ເມືອງທ່າແຕງ, ສ່ວນຮອງຊະນະເລີດອັນດັບສອງ ແມ່ນນາງສາວທີ່ເປັນຕົວແທນຈາກເມືອງ ລະມາມ ແຂວງເຊກອງ. ພ້ອມຮຽກຮ້ອງໃຫ້ນາງສາວເຊກອງ ກໍ່ຄືນາງສາວເມືອງທ່າແຕງ ຈົ່ງສືບຕໍ່ປະຕິບັດໜ້າທີ່ຂອງຕົນໃຫ້ມີຜົນສໍາເລັດຢ່າງສູງ ເພື່ອທອດຖອນບົດຮຽນໃຫ້ກັບນາງສາວງາມບັນດາເຜົ່າຂອງເມືອງໃນຕໍ່ໜ້າ, ສົ່ງເສີມຄວາມສາມາດຂອງແມ່ຍິງຕິດພັນກັບການອະນຸລັກມູນເຊື້ອວັດທະນະທຳ, ຮີດຄອງປະເພນີ ອັນດີງາມຂອງຊາດ ກໍ່ຄືຂອງເຜົ່າໃຫ້ຍືນຍົງຄົງຕົວ ຄຽງຄູ່ກັບຊາດລາວ-ຄົນລາວ ເວົ້າສະເພາະ ຊາວເມືອງທ່າແຕງ ເຊິ່ງເປັນເມືອງໜຶ່ງທີ່ມີເອກະລັກຂອງຊົນເຜົ່າ ທີ່ມີຫຼາກຫຼາຍສີສັນ ແລະ ສວຍສົດງົດງາມ
ຂອບໃຈ ແຫລ່ງຂ່າວ ທີມຂ່າວເມືອງທ່າແຕ່ງ
Editor: ກຳປານາດ ລັດຖະເຮົ້າ
