ແຂວງສາລະວັນ ຮັບປະກັນໃນການຄໍ້າປະກັນສະບຽງອາຫານ ແລະ ກຸ້ມກິນ, ໂດຍສະເພາະການຜະລິດເຂົ້າແມ່ນມີສ່ວນເຫລືອ ແລະ ແຮໄວ້ ສະເລ່ຍໄດ້ 800-1000 ຕໍ່ຄົນ/ປີ, ທັງຜະລິດສິນຄ້າສົ່ງອອກ. ທ່ານ ອານຸສັກ ຈໍາປາຄໍາ ຫົວຫນ້າພະແນກກະສິກໍາ ແລະ ປ່າໄມ້ ແຂວງສາລະວັນ ໄດ້ເປີດເຜີຍເມື່ອບໍ່ດົນມານີ້ວ່າ: ໃນລະດູປູກເຂົ້ານາປີ 2018 ນີ້, ເປັນປີທີ 3 ຂອງແຜນການ 5 ປີ, ໃນການຈັດຕັ້ງປະຕິບັດແຜນພັດທະນາເສດຖະກິດສັງຄົມ. ທົ່ວແຂວງສາລະວັນ ມີແຜນສູ້ຊົນ 84 ພັນກວ່າເຮັກຕາ, ຄາດຄະເນສະມັດຕະພາບ 4,5 ໂຕນ/ເຮັກຕາ, ຄາດຜົນຜະລິດ ທັງໝົດ 375,000 ກວ່າໂຕນຂື້ນໄປ, ໃນນັ້ນມີຈຸດສຸມຍົກສະມັດຕະພາບ 2 ພັນ ເຮັກຕາ ແລະ ຈະສູ້ຊົນໃຫ້ໄດ້ 6 ໂຕນ/ເຮັກຕາ ໂດຍສະເລ່ຍ. ຊື່ງນອນໃນ 4 ເມືອງ ຄື: ເມືອງລະຄອນເພັງ, ເມືອງຄົງເຊໂດນ, ເມືອງວາປີ ແລະ ເມືອງສາລະວັນ ໂດຍຜ່ານຂະບວນການວິຊາການ ໄອດີພີ ເຊີ່ງໃນຈຸດສຸມແມ່ນໄດ້ນໍາໃຊ້ເຕັກນິກ ເຄື່ອງມືເຂົ້າຊ່ວຍໂດຍມີການວິເຄາະ, ວິໄຈ ແລະ ທົດລອງແນວພັນຕ່າງໆ ໃຫ້ໄດ້ຄົນນະພາບ ແລະ ໃຫ້ຜົນຜະລິດ ໄດ້ດີ.
ສໍາລັບຜົນຜະລິດເຂົ້ານາແຊງໃນປີ 2017 ຕາມແຜນຄາດຫມາຍ 13 ພັນກວ່າເຮັກຕາ ປະຕິບັດໄດ້ 7,500 ກວ່າເຮັກຕາ ເທົ່າກັບ 60 ສ່ວນຮ້ອຍ. ຂອງແຜນການ. ສາເຫດຍ້ອນຈາກສະພາບອາກາດ, ໂຄງການຈັກສູບນໍ້າເຊື່ອມໂຊມ ຍ້ອນອາຍຸການນໍາໃຊ້ຍາວນານ ແລະ ຍັງມີການສ້ອມແປງຫລາຍໂຄງການ ເຮັດໃຫ້ການປະຕິບັດບໍ່ໄດ້ຕາມແຜນ. ແຕ່ສິ່ງທີ່ພົ້ນເດັ່ນແມ່ນສາມາດຈັດຕັ້ງກຸ່ມຜະລິດເຂົ້າ ມີ 500 ກວ່າຄອບຄົວ ທີ່ເຂົ້າຮ່ວມ. ແລະ ສາມາດຜະລິດເຂົ້ານາແຊງ ແລະ ນາປີ ສົ່ງໄປຍັງປະເທດ ຈີນ ຫລາຍກວ່າ 10 ພັນໂຕນ/ປີ. ເປັນເຂົ້າທີ່ມີຄຸນນະພາບ ແລະ ປະຊາຊົນມີສ່ວນຮ່ວມໃນການຜະລິດເຂົ້າເພີ່ມຂື້ນເລື່ອຍໆ. ທ່ານ ຫົວຫນ້າພະແນກກະສິກໍາ ແລະ ປ່າໄມ່ ແຂວງຍັງກ່າວຕື່ມວ່າ: ເພື່ອບັນລຸເປົ້າຫມາຍຕໍ່ຜົນໄດ້ຮັບ ແລະ ການຜະລິດໃຫ້ໄດ້ຕາມແຜນການວາງໄວ້ນັ້ນ, ແມ່ນໄດ້ມີການປະສານສົມທົບກັບທຸກຂະແຫນງການທີ່ກ່ຽວຂ້ອງ ໃນການຕ້ານໄພແຫ້ງແລ້ງ ແລະ ນໍ້າຖ້ວມ ເຊີ່ງໄດ້ມີການກະກຽມລະບົບຊົນລະປະທານ, ຢາສະຫມຸນໄພ ປາບສັດຕູພຶດ ແລະ ສິ່ງສໍາຄັນແນວພັນເຂົ້າ ຕ້ອງມີຄວາມທົນທານ, ທັງໄດ້ຮັບຜົນດີ ໃນດ້ານອື່ນໆ.
Editor: ກຳປານາດ ລັດຖະເຮົ້າ
