ເມື່ອບໍ່ດົນມານີ້ ແຂວງອຸດອນທານີ (ປະເທດໄທ) ຮ່ວມກັບ ນະຄອນຫຼວງວຽງຈັນ ແລະ ບໍລິສັດ ບີຢອນ ຈຳກັດ ໄດ້ຮ່ວມກັນເປີດໂຕ 4 ແອັບພລິເຄຊັນ ຄື: ບີຢອນອຸດອນຊິຕີ້; ບີຢອນຂອນແກ່ນຊິຕີ້; ບີຢອນໜອງຄາຍຊິຕີ້ ແລະ ບີຢອນເມືອງລາວ (BEYON MUANG LAO) ເຊິ່ງເປັນແອັບທີ່ລວບລວມເອົາສະຖານທີ່ທ່ອງທ່ຽວ, ໂຮງແຮມ, ເຮືອນພັກ, ຮ້ານຄ້າ ແລະ ຮ້ານອາຫານມາໄວ້ໃນບ່ອນດຽວ ເພື່ອຊ່ວຍໃຫ້ທ່ານຊອກຫາຂໍ້ມູນດັ່ງກ່າວສະດວກ, ວ່ອງໄວແຖມຍັງໄດ້ລາຄາຖຶກ ທັງເປັນການສົ່ງເສີມການທ່ອງທ່ຽວສອງຝັ່ງຂອງ (ລາວ-ໄທ) ໃຫ້ມີຄວາມຄຶກຄັກຫຼາຍຂຶ້ນ. ກິດຈະກຳດັ່ງກ່າວມີຂຶ້ນໃນງານ Thailand Shopping & Dinning Paradise 2018 ທີ່ຈັດຂຶ້ນໃນທ້າຍເດືອນມິຖຸນາ 2018, ເຊິ່ງ ແອັບພລິເຄຊັນ 4 ອັນຈະເຊື່ອມເຂົ້າຫາກັນ ເຮັດໃຫ້ລູກຄ້າທີ່ໃຊ້ບໍລິການຈະໄດ້ຮັບຂໍ້ມູນທ່ອງທ່ຽວ, ການບໍລິການ ຫຼື ກິດຈະກຳຕ່າງໆຂອງໄທ ແລະ ລາວ ພ້ອມໆກັນ. ປັດຈຸບັນນີ້ ຢູ່ນະຄອນຫຼວງວຽງຈັນ ໄດ້ມີລູກຄ້າຈຳນວນຫຼາຍທີ່ຈະລົງໂຄສະນາ ຫຼື ເອົາສິນຄ້າຂອງຕົນມາຂາຍຜ່ານແອັບເມືອງລາວນີ້ ເນື່ອງຈາກລາຄາໂຄສະນາຖຶກ, ມີສ່ວນຫຼຸດ ແລະ ເຂົ້າເຖິງກຸ່ມລູກຄ້າຫຼາກຫຼາຍ. ຄາດວ່າເຮົາຈະເປີດຢູ່ລາວອີກຄັ້ງໃນໄວໆນີ້ ເພື່ອໃຫ້ເປັນທີ່ຮູ້ຈັກຫຼາຍຂຶ້ນ
ທ່ານ ພູວົງ ພະມີສິດ ປະທານຮ້ານຄຳພູວົງ ທັງເປັນປະທານສະມາຄົມອັນຍະມະນີລາວ ທີ່ເຂົ້າຮ່ວມງານໄດ້ໃຫ້ສຳພາດວ່າ: ແອັບພລິເຄຊັນເມືອງລາວ ຖືວ່າມີຜົນປະໂຫຍດຫຼາຍ ເພາະມັນໄດ້ລວມເອົາກິດຈະກຳ ຫຼື ຂໍ້ມູນຕ່າງໆໄວ້ໃນບ່ອນດຽວ ເຮັດໃຫ້ສາມາດຮັບຮູ້ເຫດການທັນທີ ແລະ ທີ່ສຳຄັນການໂຄສະນາຜ່ານແອັບກໍລາຄາຖຶກແຖມຍັງໄດ້ມີສ່ວນຫຼຸດນຳອີກ. ຄາດວ່າຫຼັງຈາກເປີດໂຕແລ້ວຈະມີລູກຄ້າຕ່າງໆເຂົ້າມາໂຄສະນານຳແອັບນີ້ຫຼາຍສົມຄວນ. ໃນນາມຮ້ານຄຳພູວົງ ຄິດວ່າມີຄວາມຈຳເປັນຕ້ອງໃດ້ໃຊ້ບໍລິການເພາະລາຄາຖຶກ ເພື່ອໃຫ້ເປັນທີ່ຮູ້ຈັກຂອງຄົນລາວ ແລະ ຄົນໄທນຳອີກ.
Editor: ກຳປານາດ ລັດຖະເຮົ້າ
