ເພື່ອປັກດໍາເຂົ້ານາປີ ໃນປີ 2018 ນີ້ ໃຫ້ທັນຕາມລະດູການ, ສໍາເລັດຕາມແຜນການຄາດ ໝາຍທີ່ໄດ້ວາງໄວ້ ແລະ ໃຫ້ໄດ້ຮັບຜົນຜະລິດສູງ ພໍເມື່ອມາຮອດເດືອນມີຖຸນາ ຜ່ານມານີ້ ປະຊາຊົນຊາວບ້ານລ້ອງແຈ້ງ ເມືອງລ້ອງແຈ້ງ ແຂວງໄຊສົມບູນ ເຂດໃດທີ່ມີເງື່ອນໄຂ ກໍ່ໄດ້ສຸມຈິດສຸມໃຈ ເຮື່ອແຮງໃສ່ເຂົ້າໃນການປັກດໍາເຂົ້ານາປີ, ເມື່ອວັນທີ 26 ມີຖຸນາ 2018 ຜ່ານມານີ້ ທ່ານ ຄໍາສຸກ ວົງມາລາກຳມະການພັກເມືອງ ເລຂາພັກບ້ານ-ນາຍບ້ານລ້ອງແຈ້ງ ໄດ້ລາຍງານໃຫ້ຮູ້ວ່າ ທົ່ວບ້ານລ້ອງແຈ້ງ ມີເນື້ອທີ່ນາທັງໝົດ 126 ເຮັກຕາ, ປະກອບມີ 5 ເຂດ ໃນນັ້ນມີທົ່ງນາເຂດ ນໍ້າເລົາ ມີເນື້ອທີ່ໂດຍສະເລ່ຍ 10 ເຮັກຕາ, ປັກດໍາສໍາເລັດແລ້ວ 97 ສ່ວນຮ້ອຍ, ທົ່ງນາເຂດຖໍ້າແຊ ມີເນື້ອທີ່ 44 ເຮັກຕາ, ປັກດໍາສໍາເລັດແລ້ວ 90 ກວ່າສ່ວນຮ້ອຍ, ທົ່ງນາເຂດນໍ້າງົວ ມີເນື້ອທີ່ 25 ເຮັກຕາ, ປັກດໍາສໍາເລັດແລ້ວ 85 ສ່ວນຮ້ອຍ ແລະ ທົ່ງນາຂອບເຂດເທດສະບານເມືອງ ມີເນື້ອທີ່ທັງໝົດ 47 ເຮັກຕາ, ປັກດໍາສໍາເລັດແລ້ວ 30 ກວ່າສ່ວນຮ້ອຍ, ເນື້ອງຈາກວ່າທີ່ຕັ້ງພູມສັນຖານຂອງບ້ານ ສ່ວນຫຼາຍເປັນພູສູງຊັນ ຈື່ງມີເນື້ອທີ່ນາ ຈໍານວນນ້ອຍ ທ່ຽບໃສ່ຄອບຄົວ ມີເນື້ອທີ່ນາ ທັງໝົດ ໂດຍປະມານ ມີພຽງ100 ຄອບຄົວ, ເທົ່າກັບ11,27 ສ່ວນຮ້ອຍ ສໍາລັບທົ່ງນາແຕ່ລະບ່ອນ ແມ່ນຢູ່ຕາມຮອມພູ ຮອມຜາ ແລະ ມີບາງເຂດຍັງ ອາໃສນໍ້າຫ້ວຍນ້ອຍ ຖ້າຝົນຕົກຈື່ງມີນໍ້າເຂົ້າໃສ່ນາ ຊື່ງເປັນສາເຫດ ໜື່ງທີ່ພາໃຫ້ຮັບຜົນຜະລິດຕໍ່າ ຊື່ງເນື້ອທີ່ນາ ຮັບນໍ້າຈາກລະບົບຊົນລະປະທານສະເພາະໃນລະດູຝົນ ມີເນື້ອທີທັງໝົດ 19 ເຮັກຕາ ຫລື ເທົ່າກັບ15,07 ສ່ວນຮ້ອຍ.
ແຫລ່ງຂ່າວຍັງລາຍງານໃຫ້ຮູ້ຕື່ມອີກວ່າ: ມາຮອດທ້າຍເດືອນມີຖຸນານີ້ ທົ່ວບ້ານສໍາເລັດການປັກດໍາເຂົ້ານາປີແລ້ວ ສໍາລັບແນວພັນເຂົ້າ ອີງໃສ່ເງື່ອນໄຂພູມລໍາເນົາແລ້ວ ສ່ວນຫຼາຍແມ່ນໃສ່ແນວພັນເຂົ້າເຕ້ຍ,ເຂົ້າປ້ານລົມ, ເຂົ້າຕາກົບ ແລະ ເຂົ້າຈ້າວ, ເພື່ອເຮັດໃຫ້ໄດ້ຮັບສະມັດຕະພາບເຂົ້າສູງກວ່າແນວພັນອື່ນໆ ແລະ ຄາດວ່າທຸກໆບ່ອນຈະປັກດໍາໃຫ້ສໍາເລັດ 100 ສ່ວນຮ້ອຍ, ໃນຕົ້ນເດືອນກໍລະກົດ 2018 ນີ້.
Editor: ກຳປານາດ ລັດຖະເຮົ້າ
