ທ້າຍເດືອນມິຖຸນາ 2018 ນີ້, ທີ່ເດີ່ນໂຮງໝໍເມືອງຊຽງເງິນ ໄດ້ມີພິທີມອບ-ຮັບຕຶກບໍລິການສຸຂະພາບແມ່ ແລະ ເດັກ 2 ຫຼັງ ໃຫ້ແກ່ 2 ເມືອງຂອງແຂວງຫຼວງພະບາງ ຄື: ເມືອງຊຽງເງິນ ແລະເມືອງພູຄູນ, ໂດຍການເປັນປະທານຂອງ ທ່ານ ສາຍສະໝອນ ທິດາກອນ ເຈົ້າເມືອງຊຽງເງິນ, ມີຜູ້ຕາງໜ້າກະຊວງສາທາລະນະສຸກ, ຜູ້ຕາງໜ້າອົງການຮ່ວມມືສາກົນ ສາທາລະນະລັດ ເກົາຫລີ ຫຼືອົງການກອຍກາ ປະຈຳ ສປປ ລາວ, ພ້ອມດ້ວຍພາກສ່ວນກ່ຽວຂ້ອງຈາກແຂວງ-ເມືອງ ເຂົ້າຮ່ວມ.
ໃນພິທີ ທ່ານ ຊັງຊູໂອ ຜູ້ຕາງໜ້າອົງການກອຍກາ ຜູ້ໃຫ້ທຶນຊ່ວຍເຫຼືອ, ໄດ້ມີຄໍາເຫັນກ່າວມອບຕຶກບໍລິການສຸຂະພາບແມ່ແລະເດັກຢ່າງເປັນທາງການ, ພ້ອມດຽວກັນນີ້ ທ່ານ ສາຍສະໝອນ ທິດາກອນ ເຈົ້າເມືອງຊຽງເງິນ, ກໍ່ໄດ້ຕາງໜ້າອົງການປົກຄອງສອງເມືອງ ມີຄໍາເຫັນສະແດງຄວາມຂອບໃຈ ແລະ ຮູ້ບຸນຄູນຢ່າງສູງ ຕໍ່ລັດຖະບານ ສາທາລະນະລັດເກົາຫລີ ກໍ່ຄືອົງການກອຍກາ, ທີ່ໄດ້ໃຫ້ການຊ່ວຍເຫຼືອທຶນຮອນອັນໃຫຍ່ຫຼວງ ພັດທະນາວຽກງານ ສາທາລະນະສຸກ ຂອງເມືອງຊຽງເງິນແລະ ເມືອງພູຄູນ, ໃຫ້ມີຄຸນນະພາບດີຂຶ້ນຕື່ມບາດກ້າວໜື່ງ, ເປັນການສ້າງເງື່ອນໄຂເຮັດໃຫ້ຄໍາ ຂັວນທີ່ວ່າ: ລູກເກີດລອດ ແມ່ປອດໄພ ໄດ້ຮັບການຈັດຕັ້ງປະຕິບັດດ້ວຍປະສິດຕິຜົນດີຢ່າງແທ້ຈິງ. ຈາກນັ້ນ ທ່ານ ຊັງຊູໂອ ຕາງໜ້າອົງການກອຍກາ ໄດ້ຂຶ້ນມອບກຸນແຈຕຶກບໍລິການສຸຂະພາບແມ່ ແລະ ເດັກໃຫ້ແກ່ 2 ເມືອງ, ຊື່ງຕາງໜ້າເມືອງຊຽງເງິນຂຶ້ນຮັບໂດຍ ທ່ານ ສາຍສະໝອນ ທິດາກອນ ເຈົ້າເມືອງຊຽງເງິນ ແລະ ຕາງໜ້າເມືອງພູຄູນໂດຍແມ່ນ ທ່ານ ເພັດສະໝອນ ວົງສີປະເສີດ ຮອງເຈົ້າເມືອງພູຄູນ ເປັນຜູ້ຂຶ້ນຮັບ.
ຕອນທ້າຍພິທີ ຍັງໄດ້ມີການມອບໃບຍ້ອງຍໍໃຫ້ຜູ້ຕາງໜ້າອົງການກອຍກາ ແລະ ມອບໃບຂອບໃຈໃຫ້ແກ່ບຸກຄົນທີ່ມີຜົນງານ, ພ້ອມທັງໄດ້ຮ່ວມກັນເປີດປ້າຍນໍາໃຊ້ຕຶກບໍລິການສຸຂະພາບແມ່ແລະ ເດັກຢ່າງເປັນທາງການ.
ສຳລັບຕຶກບໍລິການສຸຂະພາບແມ່ ແລະ ເດັກເມືອງຊຽງເງິນ ເປັນອາຄານຖາວອນຊັ້ນດຽວ, ຂະໜາດກວ້າງ 11 ແມັດ, ຍາວ 17 ແມັດ, ມີ 7 ຫ້ອງເຮັດວຽກ-ຫ້ອງນ້ຳ 3 ຫ້ອງ ແລະ ຫ້ອງເກັບມ້ຽນເຄື່ອງ 1 ຫ້ອງ, ປະກອບເຄື່ອງປັບອາກາດ ເຄື່ອງເຟີນີເຈີ ແລະ ອຸປະກອນການແພດຄົບຊຸດ, ໄດ້ເລີ່ມກໍ່ສ້າງແຕ່ເດືອນພຶດສະພາ 2017 ແລະ ສຳເລັດໃນເດືອນພຶດສະພາ 2018 ໂດຍແມ່ນບໍລິສັດວິໄລວອນກໍ່ສ້າງເຄຫາສະຖານ (ກຳແພງນະຄອນວຽງຈັນ) ເປັນຜູ້ຮັບເໝົາກໍ່ສ້າງ ໃນມູນຄ່າ 77.387 ກວ່າ ໂດລາສະຫະລັດ ຫຼື ເທົ່າກັບ 619 ລ້ານກວ່າກີບ.
Editor: ກຳປານາດ ລັດຖະເຮົ້າ
