ກອງປະຊຸມດັ່ງກ່າວໄດ້ໄຂຂຶ້ນຢ່າງເປັນທາງການໃນຕອນເຊົ້າຂອງວັນທີ 3 ກໍລະກົດ 2018 ທີ່ ນະຄອນຫຼວງວຽງຈັນ ພາຍໃຕ້ການເປັນປະທານຮ່ວມຂອງທ່ານ ໄຊສີ ສັນຕິວົງ ລັດຖະມົນຕີກະຊວງຍຸຕິທຳ ແຫ່ງ ສປປ ລາວ ແລະ ທ່ານ ເລແທງລອງ ລັດຖະມົນຕີກະຊວງຍຸຕິທຳ ແຫ່ງ ສສ ຫວຽດນາມ, ມີບັນດາທ່ານຄະນະຜູ້ແທນຂັ້ນສູນກາງ ແລະ ຂັ້ນທ້ອງຖິ່ນ ທັງສອງຝ່າຍລາວ-ຫວຽດນາມ ເຂົ້າຮ່ວມຢ່າງພ້ອມພຽງ.
ຈຸດປະສົງກອງປະຊຸມໃນຄັ້ງນີ້ ແມ່ນເພື່ອສະຫຼຸບຜົນ, ຕີລາຄາ ແລະ ຖອດຖອນບົດຮຽນວຽກງານຍຸຕິທຳ ຂອງບັນດາແຂວງທີ່ມີຊາຍແດນຕິດຈອດກັນ ລະຫວ່າງ ສປປ ລາວ ແລະ ສສ ຫວຽດນາມ ຄັ້ງທີ 3 ເຊີນເຊີນ, ແຂວງ ແທັງຮ້ວາ ສສ ຫວຽດນາມ ໃນປີ 2016 ທີ່ຜ່ານມາ. ພ້ອມທັງຊອກຫາວິທີທາງແກ້ໄຂ ແລະ ວາງທິດທາງແຜນການແກ້ໄຂການຮ່ວມມືວຽກງານຍຸຕິທຳ ຂອງບັນດາແຂວງຊາຍແດນ ລາວ-ຫວຽດນາມ ໃນຊຸມປີຕໍ່ໜ້າ ແຕ່ນີ້ຫາປີ 2020 ເພື່ອຄົ້ນຄວ້າປຶກສາຫາລື ບັນຫາທີ່ກ່ຽວຂ້ອງກັບການປະຕິບັດຄຳຕັດສີນຂອງສານ ແລະ ວຽກງານອື່ນໆ ທີ່ກ່ຽວຂ້ອງກັບວຽກງານຍຸຕິທຳຂອງສອງປະເທດ ຢູ່ຂັ້ນສູນກາງ ແລະ ທ້ອງຖິ່ນ ເພື່ອຜັນຂະຫຍາຍສົນທິສັນຍາວ່າດ້ວຍ ຊ່ວຍເຫຼືອຊຶ່ງກັນ ແລະ ກັນ, ໃນຄະດີແພ່ງ ແລະ ອາຍາ, ບັນຫາວຽກງານສັນຊາດ ແລະ ທະບຽນຄອບຄົວ, ບັນຫາການຍົກຍ້າຍພູມລຳເນົາແບບຊະຊາຍ ແລະ ແຕ່ງດອງໂດຍບໍ່ຖືກຕ້ອງຕາມກົດ ໝາຍຂອງປະຊາຊົນສອງຊາດ ລາວ-ຫວຽດນາມ ຢູ່ບໍລິເວນຊາຍແດນ, ພ້ອມດຽວກັນນັ້ນໃນກອງປະຊຸມດັ່ງກ່າວໄດ້ມີການເຊັນບົດບັນທຶກຮ່ວມມື ລະຫວ່າງ ພະແນກຍຸຕິທຳຂອງ ສປປ ລາວ ແລະ ພະແນກຍຸຕິທຳ ຂອງ ສສ ຫວຽດນາມ ເປັນຕົ້ນ ແມ່ນແຂວງວຽງຈັນ ກັບ ແຂວງຫາດຟອງ, ແຂວງຫາຍເຢືອງ, ແຂວງບໍ່ແກ້ວ ກັບ ແຂວງເຊີນລາ, ແຂວງອັດຕະປື ກັບ ແຂວງກອນຕູມ.
ໃນກອງປະຊຸມຄະນະຜູ້ແທນທັງສອງຝ່າຍ ລາວ-ຫວຽດນາມ ກໍໄດ້ພ້ອມກັນຄົ້ນຄ້ວາປຶກສາຫາລືປະກອບຄຳເຫັນຢ່າງກ້ວາງຂ້ວາງ, ເລິກເຊິ່ງ ແລະ ຊອກຫາຈຸດທີ່ຍັງຄົງຄ້າງ ເພື່ອຊອກຫາວິທີແກ້ໄຂໃຫ້ມີປະສິດທິພາບ ແລະ ປະສິດທິຜົນໃນການຮ່ວມມືຮອບດ້ານ ລະຫວ່າງສອງຊາດ ລາວ-ຫວຽດນາມ.
Editor: ກຳປານາດ ລັດຖະເຮົ້າ
