ໃນຕອນເຊົ້າຂອງວັນທີ 2 ກໍລະກົດ 2018 ທີ່ຜ່ານມາ, ຢູ່ທີ່ສະໂມສອນຂອງເມືອງວັງວຽງ ແຂວງວຽງຈັນ, ໄດ້ມີພິທີຝຶກອົບຮົມ ກ່ຽວກັບວິທີການບັນຫານ້ຳເປື່ອນ ແລະ ຂີ້ເຫຍື້ອ ອອກຈາກຄົວເຮືອນ. ໂດຍການເຂົ້າຮ່ວມ ຂອງທ່ານ ຄຳຜອງ ດວງວິໄລ ກຳມະການພັກແຂວງ ເລຂາພັກເມືອງ ເຈົ້າເມືອງໆວັງວຽງ, ມີທ່ານ ຫຽມ ພົມມະຈັນ ປະທານສະມາຄົມລາວ-ໄທ ເພື່ອມິດຕະພາບ, ມີທ່ານ ກຽດຕິຄຸນ ຊາດປະເສີດ ເອກອັກຄະຣາຊະທູດແຫ່ງປະເທດໄທ ປະຈຳ ສປປ ລາວ, ທ່ານ ສາດສະດາຈານ. ດຣ ກະເສມ ຈັນແກ້ວ ຜູ້ອຳນວຍການໂຄງການສຶກສາວິໃຈ ແລະ ພັດມະນາ ສິ່ງແວດລ້ອມ ແຫຼມຜັກເບ້ຍ ອັນເນື່ອງມາຈາກພຣະຣາດຊະດຳຣິ, ພ້ອມກັບ ທີມງານ ນັກວິທະກອນ ຜູ້ມີປະສົບການຕົວຈິງ ແລະ ວິຊາການ ຈາກປະເທດໄທ, ມີບັນດານາຍບ້ານເທດສະບານ, ຜູ້ປະກອບ ການດ້ານໂຮງແຮມແລະຮ້ານອາຫານເຂົ້າຮ່ວມຢ່າງພ້ອມພຽງ.
ທ່ານ ສຸກກະເສີມ ໂພທິສານ ເລຂາທິການສະມາຄົມລາວ-ໄທ ເພື່ອມິດຕະພາບ ໄດ້ຂື້ນກ່າວຄວາມເປັນມາຂອງການຝຶກອົບຮົມຄັ້ງນີ້ ວ່າ: ໃນລະຫວ່າງກາງເດືອນ ກັນຍາ ຂອງປີ 2017 ຜ່ານມາ, ຄະນະສະມາຄົມ ລາວ-ໄທເພື່ອມິດຕະພາບ ໄດ້ໄປທັດສະນະສຶກສາຢູ່ທີ່ປະເທດໄທ ກ່ຽວກັບການບຳບັດນ້ຳເປື້ອນ ແລະ ການຈັດການຂີ້ເຫຍື່ອຂອງຊຸມຊົນ ແມ່ນງ່າຍດາຍ ໂດຍໃຊ້ຫຼັກການທີ່ວ່າ ການບຳບັດນ້ຳເປື່ອນ ແລະ ຂີ້ເຫຍື່ອ ສາມາດເຮັດໄດ້ພາຍໃຕ້ຂະບວນການທຳມະຊາດຊ່ວຍທຳມະຊາດ ຮ່ວມກັບເທັກໂນໂລຊີ ທີ່ງ່າຍດາຍ ແລະ ລາຄາຖືກ. ສະນັ້ນ ທາງສະມາຄົມລາວ-ໄທ ເພື່ອມິດຕະພາບ ສົມທົບກັບຫ້ອງການຊັບພະຍາກອນນ້ຳແລະສິ່ງແວດລ້ອມເມືອງວັງວຽງ ຈື່ງໄດ້ຈັດການຝຶກອົບຮົມຄັ້ງນີ້ຂື້ນ ເພື່ອເຮັດໃຫ້ຜູ້ປະກອບການດ້ານຮ້ານອາຫານ, ເຮືອນພັກ,ໂຮງແຮມ ແລະ ເຮືອນຂອງພໍ່ແມ່ປະຊາຊົນຊາວເມືອງວັງວຽງ ຮັບຮູ້ ແລະ ເຂົ້າໃຈ ກ່ຽວກັບວິທີການຈັດການບັນຫານ້ຳເປື່ອນ ແລະ ຂີ້ເຫຍື້ອ ອອກຈາກຄົວເຮືອນ, ໂດຍມີການສາທິດ, ສຳມະນາ ຜ່ານລະບົບໂປແຈ໋ກເຕີ ແລະ ສອນວິທີເຮັດ ຖັງດັກໄຂມັນ.
ຫລັງຈາກນັ້ນ, ໄດ້ມອບຖັງດັກໄຂມັນ ຈຳນວນ 50 ຖັງ, ໃຫ້ກັບເມືອງວັງວຽງ ໃຫ້ກຽດກ່າວມອບໂດຍແມ່ນ ທ່ານ ສຈ. ດຣ ກະເສມ ຈັນແກ້ວ ຜູ້ອຳນວຍການໂຄງການສຶກສາວິໃຈ ແລະ ພັດມະນາ ສິ່ງແວດລ້ອມ ແຫຼມຜັກເບ້ຍອັນເນື່ອງມາຈາກພຣະຣາດຊະດຳຣິ ປະເທດໄທ ແລະ ໃຫ້ກຽດກ່າວຮັບໂດຍ ທ່ານ ຄຳຜອງ ດວງວິໄລ ກຳມະການພັກແຂວງ ເລຂາພັກເມືອງ ເຈົ້າເມືອງໆວັງວຽງ. ຈາກນັ້ນທ່ານເຈົ້າເມືອງໆວັງວຽງ ກໍ່ໄດ້ມອບຂອງຂວັນທີ່ລະນຶກໃຫ້ກັບຄະນະຜູ້ແທນ ຈາກປະເທດໄທ.
ຕອນທ້າຍພິທີ ທ່ານ ຄໍາຜອງ ດວງວິໄລ ເລຂາພັກເມືອງ ເຈົ້າເມືອງໆວັງວຽງ ກໍ່ໄດ້ໃຫ້ກຽດໂອ້ລົມຕື່ມອີກ.
ຂອບໃຈແຫລ່ງຂ່າວ ທີມຂ່າວ ເມືອງວັງວຽງ
Editor: ກຳປານາດ ລັດຖະເຮົ້າ
