ກອງປະຊຸມປຶກສາຫາລືຕ້ານ ແລະ ຄວບຄຸມການປ້ອງກັນພະຍາດໄຂ່ຍຸງລາຍ ທີ່ເປັນສາເຫດໃຫ້ເປັນພະຍາດໄຂ່ເລືອດອອກໄດ້ຈັດຂື້ນຢ່າງເປັນທາງການ, ທີ່ສະໂມສອນປົກຄອງເມືອງເຊໂປນ ເມື່ອບໍ່ດົນມານີ້, ໂດຍການເປັນປະທານຂອງ ທ່ານ ຄໍາຫຼ້າ ພົມມີໄຊ ຮອງເຈົ້າເມືອງເຊໂປນ ທັງເປັນປະທານຄະນະກໍາມະທິການສົ່ງເສີມຄຸນນະພາບຂັ້ນເມືອງ, ທ່ານ ໝໍ ເພັດສົມພອນ ນັນສູນນະວົງ ຮອງຫົວໜ້າຫ້ອງການສາທາລະນະສຸກເມືອງ, ທັງເປັນຜູ້ຊີ້ນໍາວຽກງານກັນພະຍາດສົ່ງເສີມສຸຂະພາບເມືອງເຊໂປນ, ເຂົ້າຮ່ວມມີບັນດາທ່ານຄະນະກຳມະທິການສົ່ງເສີມສຸຂະພາບຂັ້ນເມືອງ, ບ້ານອ້ອມຂ້າງ ແລະ ສຸກສາລາພາຍໃນເມືອງ 5 ແຫ່ງ.
ຈຸດປະສົງໃນການຈັດກອງປະຊຸມໃນຄັ້ງນີ້ກໍ່ເພື່ອຄອບຄຸມ ແລະ ປ້ອງກັນໄຂ່ຍຸງລາຍ,ເພື່ອທຳລາຍແຫຼ່ງເພາະພັນຂອງຍຸງລາຍ ທີ່ເປັນພາຫະນະນຳເຊື້ອພະຍາດໄຂ່ເລືອດອອກມາສູ່ຄົນເຮົາ,ໃນພິທີ ທ່ານ ໝໍ ເພັດສົມພອນ ສູນນັນທະວົງ ກໍ່ໄດ້ຂື້ນອະທິບາຍ ແລະ ລາຍງານກ່ຽວກັບການຕ້ານ,ຄວບຄຸມ ແລະ ປ້ອງກັນໄຂ່ຍຸງລາຍທີ່ເປັນສາເຫດໃຫ້ເປັນພະຍາດໄຂ່ເລືອດອອກໃຫ້ບັນດາຄະນະກຳມະທິການສົ່ງເສີມສຸຂະພາບຂັ້ນເມືອງ, ນາຍບ້ານພາຍໃນເທດສະບານ ແລະ ບ້ານອ້ອມຂ້າງໃຫ້ຮັບຮູ້ແລະເຂົ້າໃຈກ່ຽວກັບການຄວບຄຸມ ແລະ ປ້ອງກັນການແຜ່ລາມຂອງພະຍາດດັ່ງກ່າວ ເພາະວ່າໃນປະຈຸບັນນີ້ບ້ານທີ່ມີເຊື້ອໄຂ່ຍຸງລາຍທີ່ໄດ້ກວດພົບມີຈຳນວນ 02 ບ້ານ ຄື: ບ້ານແກ້ງກີວ 1 ກໍລະນີ ແລະ ບ້ານແດນສະຫວັນ 1 ກໍລະນີ, ຫຼັງຈາກນັ້ນບັນດາແຂກເຂົ້າຮ່ວມກໍ່ໄດ້ພັດປ່ຽນກັນຂື້ນປະກອບຄຳຄິດຄຳເຫັນ ເຈາະຈີ້ມບັນຫາຕ່າງໆເພື່ອຊອກຫາວິທີຄວບຄຸມ, ປ້ອງກັນ ແລະ ແກ້ໄຂບັນຫາກ່ຽວກັບການແຜ່ລາມ ແລະ ການເພາະພັນຂອງຍຸງລາຍຫຼືພະຍາດໄຂ່ເລືອດອອກຢ່າງກົງໄປກົງມາ. ສຸດທ້າຍ ທ່ານ ຄຳຫຼ້າ ພົມມີໄຊ ກໍ່ໄດ້ໃຫ້ກຽດມີຄຳເຫັນ ແລະ ໃຫ້ທິດເຍືອງທາງຊື່ງທ່ານໄດ້ຮຽກຮ້ອງມາຍັງຄະນະກໍາມະທິການສົ່ງເສີມສຸຂະພາບຂັ້ນເມືອງ, ນາຍບ້ານໃຫ້ເອົາໃຈໃສ່ກ່ຽວກັບວິທີປ້ອງກັນແລະຄວບຄຸມການແຜ່ລາມຂອງໄຂ່ຍຸງລາຍ ເຊັ່ນ: ຖາງປ່າບ່ອນທີ່ມັນຮົກເຮື້ອຕາມເດີ່ນເຮືອນຂອງຕົນ,ກະໂປະກະປອງ, ອຸແອ້ງ ແມ່ນໃຫ້ຖິ້ມບໍ່ໃຫ້ມີນໍ້າຄັງໄວ້ເພື່ອບໍ່ໃຫ້ຍຸງມາວາງໄຂ່ໃສ່ໄດ້, ໃຫ້ທາງບ້ານຫຼື ນາຍບ້ານມີການຈັດກອງປະຊຸມພາຍໃນບ້ານຂອງຕົນແຕ່ງແຕ່ງຄະນະຮັບຜິດຊອບໃນການໂຄສະນາແຈ້ງເຕືອນໃຫ້ພໍ່ແມ່ປະຊາຊົນ ພາຍໃນບ້ານຂອງຕົນສ້າງຂະບວນການອານາໄມລວມ ເພື່ອເປັນການຕ້ານການລະບາດຂອງໄຂ່ຍຸງລາຍ ທີ່ພາໃຫ້ເປັນໄຂ່ເລືອດອອກ,ໂດຍສະເພາະກ່ຽວກັບການໂຄສະນາສຸຂະສຶກສາເຜີຍແຜ່ເພື່ອເພີ່ມຄວາມຮູ້ຄວາມເຂົ້າໃຈໃຫ້ແກ່ຊຸມຊົນເພື່ອປ້ອງກັນ ແລະ ຄວບຄຸມການແຜ່ລະບາດຂອງຍຸງລາຍທີ່ເປັນພາຫະນະນຳເຊື້ອພະຍາດໄຂ່ເລືອດອອກ ມາສູ່ຄົນເຮົາ ແລະ ພ້ອມກັນນຳເອົາເນື້ອໃນໃນຄັ້ງນີ້ນຳໄປຈັດຕັ້ງປະຕິບັດໃຫ້ປະກົດຜົນເປັນຈິ່ງ.
Editor: ກຳປານາດ ລັດຖະເຮົ້າ
