ເພື່ອຈັດຕັ້ງປະຕິບັດແຜນຍຸດທະສາດໄລຍະ 10 ປີຂອງເມືອງທ່າແຕງ ( 2019-2029 ),ວາງວິໃສ່ທັດຮອດປີ 2034 ແລະ ແຜນພັດທະນາເສດຖະກິດ-ສັງຄົມ 5 ປີ ( 2019-2024 )ໃຫ້ສຳເລັດດ້ວຍດີຕາມແຜນໄລຍະຍາວວາງໄວ້ໃຫ້ປະກົດຜົນເປັນຈິງ ດັ່ງນັ້ນ ເມືອງທ່າແຕງ, ແຂວງເຊກອງ ໄດ້ໄຂກອງປະຊຸມຮັບຮອງແຜນພັດທະນາເມືອງທ່າແຕງ ເຊື່ອມຈອດບັນດາໃນພູພຽງບໍລະເວນ ຢູ່ທີສະໂມສອນຂອງເມືອງ ໂດຍເຂົ້າຮ່ວມຂອງ ທ່ານ ສົມເພັດ ເອິດລັດດາ ຮອງເຈົ້າເມືອງ ທ່າແຕງ, ມີທ່ານ ຄໍາປະກອນ ອຸເທນທະປັນຍາ ຮອງຫົວໜ້າພະແນກແຜນການ ແລະ ການລົງທືນແຂວງ ເຊກອງ, ພ້ອມນີ້ຍັງຫົວໜ້າ-ຮອງຫ້ອງການອ້ອມຂ້າງ ພ້ອມດ້ວຍພະນັກງານວິຊາການທີ່ກ່ຽວຂ້ອງເຂົ້າຮ່ວມ.
ທ່ານ ແສງສຸບັນ ໄຊສະຫວັນ ຫົວໜ້າຫ້ອງການແຜນການ ແລະ ການລົງທືນເມືອງ ທ່າແຕງ ລາຍງານໃຫ້ຮູ້ວ່າ: ການຈັດຕັ້ງປະຕິບັດແຜນແມ່ບົດພັດທະນາເມືອງ ທ່າແຕງ ເຊື່ອມຈອດບັນດາໃນພູພຽງບໍລະເວນໄລຍະ 10 ປີ ຜ່ານມາ ( 2009-2018 ) ແມ່ນໄດ້ຮັບຜົນສໍາເລັດຕາມແຜນການວາງໄວ້ ໂດຍສະເພາະ ທີ່ຕັ້ງ ແລະ ຈຸດພິເສດພູມສັນຖານ,ການປົກຄອງ,ພົນລະເມືອງ, ສະພາບແວດລ້ອມພາຍໃນເມືອງ, ສາກົນ, ພາກພື້ນ, ຂໍ້ສະດວກ, ສິ່ງທ້າທາຍ ແລະ ຂໍ້ຫຍຸ້ງຍາກ ລວມໄປເຖິງການເຕີບໂຕທາງດ້ານເສດຖະກິດ,ການລົງທືນງົບປະມານແຫ່ງລັດ, ທືນຊ່ວຍເຫຼືອລ້າ-ກູ້ຍືມ ເພື່ອການພັດທະນາ (ODA), ການລົງທືນເອກະຊົນພາຍໃນ ແລະ ຕ່າງປະເທດ (FDI), ການປ່ອຍສິນເຊື່ອຂອງທະນາຄານ, ການຈັດເກັບລາຍຮັບ-ລາຍຈ່າຍງົບປະມານ, ການສົ່ງອອກ-ນໍາເຂົ້າສິນຄ້າ, ພັດທະນາຊົນນະບົດ,ລຶບລ້າງຄວາມທຸກຍາກ, ວຽກງານກະສິກໍາ-ປ່າໄມ້, ອຸດສາຫະກໍາປຸງແຕ່ງ, ພະລັງງານແລະບໍ່ແຮ່,ຊັບພະຍາກອນທໍາມະຊາດ ແລະ ສິ່ງແວດລ້ອມ, ໂຍທາທິການແລະຂົນສົ່ງ, ໄປສະນີແລະໂທລະຄົມມະນາຄົມ, ສຶກສາທິການແລະກິລາ, ສາທາລະນະສຸກ, ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ແຮງງານ ແລະ ສະຫວັດດີການສັງຄົມ, ອົງການຈັດຕັ້ງມະຫາຊົນ, ຊາວໜຸ່ມ - ເຍົາວະຊົນ, ສົ່ງເສີມຄວາມກ້າວໜ້າຂອງແມ່ຍິງ ,ປ້ອງກັນຊາດ - ປ້ອງກັນຄວາມສະຫງົບ.
ພ້ອມນີ້ບັນດາຜູ້ເຂົ້າຮ່ວມໄດ້ປະກອບຄໍາຄິດເຫັນຢ່າງກົງໄປກົງມາ ແລະ ພ້ອມກັນວາງແຜນວິໃສ່ທັດຮອດປີ 2034 ແລະ ຍຸດທະສາດການພັດທະນາເສດຖະກິດ-ສັງຄົມໄລຍະ 10 ປີ ( 2019-2029 ) ໂດຍສຸ່ມໃສ່ທ່າແຮງທີ່ບົ່ມຊ້ອນ, ຂໍ້ສະດວກ,ຂໍ້ຫຍຸ້ງຍາກ ແລະ ສິ່ງທ້າທາຍ ໃຫ້ເຂົ້າສູ່ທິດທາງລວມ 13 ຍຸດທະສາດເປັນຕົ້ນ ສູ້ຊົນພັດທະນາວຽກງານແຕ່ລະຂົງເຂດຢູ່ພາຍໃນເມືອງ, ວຽກງານຈຸດສຸ່ມ, ພັດທະນາເສດຖະກິດ ຕາມທິດທີ່ມີຄຸນນະພາບ,ສົມດູນ, ຕໍ່ເນື່ອງ ແລະ ຍືນຍົງ, ປົກປັກຮັກສາ ແລະ ນໍາໃຊ້ຊັບພະຍາກອນທໍາມະຊາດຕາມທິດຫັນເປັນສີຂຽວ, ພັດທະນາພື້ນຖານໂຄງລ່າງ ເສັ້ນທາງເຊື່ອມຈອດກັບເມືອງ-ບ້ານ, ພັດທະນາຕົວເມືອງ-ທີ່ຢູ່ອາໄສ ( 5 ສໍ ), ການຮ່ວມມືກັບຕ່າງປະເທດ. ທັງນີ້ ເພື່ອຈັດຕັ້ງປະຕິບັດຕາມແຜນວິໄສທັດຂອງແຂວງເຊກອງຮອດປີ 2030 ແລະ ວິໄສທັດຂອງເມືອງທ່າແຕງ ຮອດປີ 2034 ໃຫ້ປະກົດຜົນເປັນຈິງ ເພື່ອເຮັດໃຫ້ປະຊາຊົນໃນທົ່ວເມືອງ ທ່າແຕງ ໄດ້ຫຼຸດພົ້ນອອກຈາກສະຖານະພາບຄວາມດ້ອຍພັກທະນາເທື່ອລະກ້າວ
Editor: ກຳປານາດ ລັດຖະເຮົ້າ
