ຄະນະຜູ້ແທນກະຊວງສາທາລະນະສຸກ ໄດ້ລົງຢ້ຽມຢາມ ແລະ ຊຸກຍູ້ວຽກງານສາທາລະນະສຸກ ທີ່ແຂວງໄຊຍະບູລີ ໃນຄົ້ນອາທິດນີ້ ຢູ່ທີ່ຫ້ອງປະຊຸມພະແນກສາທາລະນະສຸກແຂວງໄຊຍະບູລີ ໂດຍມີ ຂອງທ່ານ ດຣ ນາງ ຄຳຜີວ ພູທອນສີ ຫົວໜ້າ ພະແນກສາທາລະນະສຸກ ແຂວງໄຊຍະບູລີ ພ້ອມດ້ວຍຄະນະ ໃຫ້ການຕ້ອນຮັບ ນໍາໂດຍ ທ່ານ ດຣ ຄຳເພັດ ມະນີວົງ ຫົວໜ້າກົມແຜນການ ແລະການຮ່ວມມືກະຊວງສາທາລະນະສຸກ ພ້ອມດ້ວຍຄະນະ
ໃນໂອກາດລົງຢ້ຽມຍາມ ແລະ ຊຸກຍູ້ວຽກງານສາທາລະນະສຸກແຂວງໄຊຍະບູລີໃນຄັ້ງນີ້ ທ່ານ ດຣ ນາງ ຄຳຜີວ ພູທອນສີ ຫົວນ້າພະແນກສາທາລະນະສຸກແຂວງໄຊຍະບູລີ ໄດ້ລາຍງານໂດຍຫຍໍ້ກ່ຽວກັບການຈັດຕັ້ງປະຕິບັດໃນໄລຍະທີ່ຜ່ານມາວ່າ: ຕະຫຼອດໄລຍະຜ່ານມາ ພະແນກສາທາລະນະສຸກ ໄດ້ເອົາໃຈໃສ່ຊຸກຍູ້ຕາໜ່າງການບໍລິການສຸຂະພາບ ໃຫ້ພໍ່ແມ່ປະຊາຊົນເຂົ້າເຖິງການບໍລິການຢ່າງທົ່ວເຖິງ, ໃນແຂວງມີໂຮງໝໍແຂວງ 1 ແຫ່ງ, ມີ 120 ຕຽງ, ໂຮງໝໍທະຫານ 2 ແຫ່ງ ໂຮງໝໍຊຸມຊົນ 10 ແຫ່ງ, ໂຮງໝໍນ້ອຍ (ກໍ) 12 ແຫ່ງ, ໂຮງໝໍນ້ອຍ (ຂໍ) 64 ແຫ່ງ, ຫ້ອງກວດພະຍາດເອກະຊົນ 38 ແຫ່ງ, ມີ ອສບ ( ອາສາສະຫມັກພະຍາບານ) ຈໍານວນ 616 ຄົນ, ໝໍຕຳແຍ ( ພະດຸງຄັນ ) ຈໍານວນ 563 ຄົນ ແລະ ມີຕູ້ຢາປະ ຈຳບ້ານ ຈໍານວນ 180 ຕູ້ ເຮັດໃຫ້ຈຳນວນ ແມ່ຍິງຖືພາໄດ້ຮັບການກວດທ້ອງກ່ອນເກີດ 4 ຄັ້ງຂື້ນໄປ ແລະ ສາມາດລົງກວດກາຄຸນນະພາບ ສະຖານທີ່ບໍລິການຢູ່ໂຮງໝໍເມືອງທົ່ວແຂວງໄດ້ 50 ສ່ວນຮ້ອຍ ຂື້ນໄປມີ 10 ແຫ່ງ ແລະສຸກສາລາທົ່ວແຂວງກວດ 50 ສ່ວນຮ້ອຍຂື້ນໄປມີ 76 ແຫ່ງ, ຈາກນັ້ນຜູ້ເຂົ້າຮ່ວມໃນກອງປະຊຸມຍັງໄດ້ພ້ອມກັນປະກອບຄຳຄິດຄຳເຫັນ ເພື່ອເຮັດໃຫ້ວຽກງານສາທາລະນະສຸກແຂວງໄຊຍະບູລີ ໄດ້ຮັບການບໍລິການຢ່າງມີຄຸນນະພາບໃນຕໍ່ໜ້າ.
ທີມຂ່າວ ແຂວງໄຊຍະບູລີ
Editor: ກຳປານາດ ລັດຖະເຮົ້າ
