ຫ້ອງການສາທາລະນະສຸກ ເມືອງທ່າແຕງ ຮ່ວມກັບ ພໍ່ແມ່ປະຊາຊົນ ໃນບ້ານເທດສະບານ ເມືອງທ່າແຕງ ສ້າງຂະບວນການອະນະໄມທຳລາຍແຫຼ່ງເພາະພັນຂອງຍູງລາຍ, ໂດຍການສ້າງຂະບວນການໃນຄັ້ງນີ້ ແມ່ນໄດ້ແບ່ງອອກເປັນ 3 ຈຸ ຄື: ຈຸບ້ານທ່າແຕງເໜືອ, ບ້ານທ່າແຕງໃຕ້ ແລະ ບ້ານຫ້ວຍຊາຍ. ເຊິ່ງໃນແຕ່ລະຈຸ ໄດ້ຮ່ວມແຮງກັນຢ່າງເປັນເຈົ້າການ, ເກັບເສດຂີ້ເຫຍື່ອ, ຂວໍ້າກະໂປະ- ກະປ໋ອງ, ອະນາໄມ ແລະອື່ນໆ.
ທ່ານນາງ ໂທນະສິນ ໄຊຍະເສນ ຮອງຫົວໜ້າຫ້ອງການສາທາລະນະສຸກ ເມືອງທ່າແຕງ ໃຫ້ສໍາພາດວ່າ: ການສ້າງຂະບວນການຄັ້ງນີ້ ເພື່ອຕ້ານ ແລະ ສະກັດກັ້ນພະຍາດໄຂ້ຍຸງລາຍ ທີ່ຄາດວ່າຈະເກີດຂຶ້ນ. ໂດຍໃນປີນີ້ໄດ້ມີການວາງແຜນແຕ່ຫົວທີ, ເພື່ອຫາວິທີແກ້ໄຂ ດ້ວຍການປຸກລະດົມຊຸກຍູ້ສ້າງຂະບວນການ ອະນະໄມ ທຳລາຍແຫຼ່ງເພາະພັນຂອງຍູງລາຍ ແລະ ປະຕິບັດຄຳຂັວນ 5 ປໍ, ໃນທຸກໆທ້າຍອາທິດ, ຮ່ວມແຮງຮ່ວມໃຈກັນເຄຶ່ອນໄຫວສ້າງຂະບວນການອະນະໄມຂັ້ນບ້ານ, ຄວບຄຸມແຫລ່ງນຳເຊື້ອ ແລະ ພາຫະນະຕ່າງໆ, ທຳຄວາມສະອາດພາສະນະ ເພຶ່ອກຳຈັດໜອນນ້ຳຍູງລາຍ, ແນໃສ່ຈັດຕັ້ງປະຕິບັດໃຫ້ບັນລຸຕາມຄາດໝາຍທີ່ວາງໄວ້. ຜ່ານມາ ພະຍາດດັ່ງກ່າວ ເຄີຍລະບາດຂຶ້ນໃນປີ 2013 ແລະ ມາໃນ 6 ເດືອນຕົ້ນປີ 2018 ຢູ່ເມືອງທ່າແຕງ ມີຜູ້ຕິດເຊື້ອພະຍາດໄຂ້ຍຸງລາຍ 15 ກໍລະນີ, ແຕ່ບໍ່ມີຜູ້ເສຍຊີວິດ.
ທ່ານ ບຸນໄລ ທອງທະຄາດ ຮອງນາຍບ້ານ ບ້ານທ່າແຕງເໜືອ ລາຍງານໃຫ້ຮູ້ວ່າ: ສໍາລັບບ້ານທ່າແຕງເໜືອ ໄດ້ມີຄວາມສາມັກຄີ ພ້ອມພຽງກັນອະນາໄມຢ່າງເປັນຂະບວນ ດ້ວຍການເກັບເສດຂີ້ເຫຍື່ອ, ທໍາລາຍແຫຼ່ງເພາະພັນທີ່ເຫັນວ່າເປັນບ່ອນອາໄສຂອງຍຸງ, ຕາມບໍລິເວນເສັ້ນທາງອ້ອມຮອບຕະຫຼາດຂອງເມືອງ ເຊິ່ງມີຄວາມຍາວ 2 ກວ່າກິໂລແມັດ. ການສ້າງຂະບວນການດັ່ງກ່າວ ໄດ້ມີຂຶ້ນ ໃນບ່າຍຂອງວັນທີ 4 ກໍລະກົດ 2018 ຜ່ານມາ,ໂດຍໃຫ້ກຽດເຂົ້າຮ່ວມຂອງ ທ່ານ ຄໍາໄພ ສິມມາວັດ ຮອງເລຂາພັກເມືອງທ່າແຕງ ຜູ້ຊີ້ນໍາວຽກງານວັດທະນະທໍາ-ສັງຄົມ, ທ່ານ ວິສັນ ອິນທະວົງ ຫົວໜ້າພະແນກສາທາລະນະສຸກ ແຂວງເຊກອງ, ທັງແມ່ນຄະນະກໍາມະການສະເພາະກິດ ຕ້ານ ແລະ ຄວບຄຸມພະຍາດຂັ້ນແຂວງ, ມີຄະນະກໍາມະການຂັ້ນເມືອງ, ອົງການປົກຄອງບ້ານ ແລະ ປະຊາຊົນເຂົ້າຮ່ວມຢ່າງຫຼວງຫຼາຍ.
ແຫລ່ງຂ່າວ ທີມຂ່າວ ເມືອງທ່າແຕງ, ແຂວງເຊກອງ
Editor: ກຳປານາດ ລັດຖະເຮົ້າ
