ໃນວັນທີ 07 ກໍລະກົດ 2018 ຜ່ານມາ, ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ ໄດ້ຮ່ວມກັບສະມາຄົມໄອຊີທີລາວ (LICA) ຈັດງານແຂ່ງຂັນ ໄອຊີທີລາວ 2018 ຫຼື Lao ICT Award 2018 ຂື້ນທີ່ ຫໍວັດທະນະທໍາແຫ່ງຊາດ, ຊຶ່ງເປັນກຽດຮ່ວມໂດຍ ທ່ານ ປອ ທະວີສັກ ມະໂນທັມ ຫົວໜ້າກົມເຕັກໂນໂລຊີການສື່ສານຂໍ້ມູນຂ່າວສານ, ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ, ພ້ອມດ້ວຍແຂກທີ່ຖືກເຊີນ ຈາກບັນດາກະຊວງ, ອົງການທຽບເທົ່າ ບໍລິສັດທາງດ້ານໄອຊີທີ, ຫົວໜ່ວຍທຸລະກິດ ແລະ ສະຖາບັນການສຶກສາຕ່າງໆ ເຂົ້າຮ່ວມ
ຈຸດປະສົງຂອງການແຂ່ງຂັນຄັ້ງນີ້, ແມ່ນເພື່ອສົ່ງເສີມໃຫ້ນັກຮຽນ-ນັກສຶກສາ, ນັກຄົ້ນຄວ້າຈາກຂະແໜງການພາກລັດ, ພາກເອກະຊົນ ກໍ່ຄືບັນດາບໍລິສັດ ແລະ ທຸກຄົນໃນສັງຄົມລາວໄດ້ມີໂອກາດສະແດງຄວາມສາມາດໃນການພັດທະນາເຕັກໂນໂລຊີດ້ານ ICT ກໍ່ຄືການສົ່ງຜະລິດຕະພັນ, ການບໍລິການ ແລະ ນະວັດຕະກຳດ້ານ ICT ຂອງຕົນເອົາແຂ່ງຂັນເພື່ອໃຫ້ສັງຄົມໄດ້ເຫັນເຖິງສັກ ຂະຍະພາບ ແລະ ຄວາມສາມາດຂອງຄົນລາວ ທາງດ້ານ ICT. ພ້ອມນັ້ນ, ກໍ່ເພື່ອສົ່ງຜົນງານເຂົ້າຮ່ວມງານ Lao ICT Award 2018 ເພື່ອສົ່ງເສີມໃຫ້ບັນດານັກພັດທະນາ, ບໍລິສັດທາງດ້ານໄອຊີທີ ໃນລາວ ສ້າງຊື່ສຽງຜະລິດຕະພັນຂອງຕົນ ໃຫ້ກັບຄົນລາວ ແລະ ສາມາດບໍລິການອອກສູ່ສາກົນ. ພ້ອມນັ້ນ ກໍ່ສົ່ງເສີມໃຫ້ຄົນລາວໄດ້ນຳໃຊ້ການບໍລິການໄອຊີທີ ຂອງຄົນລາວເອງ.
ການແຂ່ງຂັນຄັ້ງນີ້ ແມ່ນ ການແຂ່ງຂັນ ໄອຊີທີລາວ ລະດັບປະເທດ ຄັ້ງທີ 2 (ຄັ້ງທຳອິດໃນຈັດຂື້ນໃນປີຜ່ານມາ 2017) ຊຶ່ງປີຜ່ານມາ ບັນດາຜູ້ໄດ້ຮັບລາງວັນຈາກເວທີດັ່ງກ່າວ ໄດ້ເປັນຕົວແທນໃຫ້ແກ່ ປະເທດລາວ ໄປແຂ່ງຂັນລະດັບສາກົນ ຄື: ASEAN ICT Award ທີ່ປະເທດ ກຳປູເຈຍ ແລະ ກໍ່ສາມາດຍາດມາໄດ້ ລາງວັນຮອງຊະນະເລີດ ແລະ ຮອງຊະນະເລີດອັນດັບ 2.
ການແຂ່ງຂັນ ໄອຊີທີລາວ 2018 ແມ່ນໄດ້ລິເລີ່ມແຕ່ກາງເດືອນ ມີນາ 2018 ໂດຍມີການຖະແຫຼງຂ່າວເລີ່ມການແຂ່ງຂັນ ແລະ ການສ້າງກິດຈະກຳຢູ່ສະຖາບັນການສຶກສາຕ່າງໆ ເພື່ອປຸກລະດົມຂົນຂວາຍໃຫ້ພາກສ່ວນຕ່າງໆສົ່ງຜະລິດຕະພັນໄອຊີທີ ເຂົ້າປະກວດ ການແຂ່ງຂັນ ໂດຍແບ່ງອອກເປັນ 5 ໝວດ ຄື:
1. ໝວດກ່ຽວກັບພາກເອກະຊົນ,
2. ໝວດເພື່ອສັງຄົມ,
3. ໝວດເນື້ອໃນດິຈິຕອນ,
4. ໝວດບໍລິສັດສ້າງຕັ້ງໃໝ່ ດ້ານໄອຊີທີ ແລະ
5. ໝວດຄົ້ນຄວ້າ-ພັດທະນາ ດ້ານໄອຊີທີ
ຜ່ານການຄັດເລືອກຈາກຜະລິດຕະພັນທີ່ສົ່ງເຂົ້າຮ່ວມທັງໝົດ 20 ກວ່າຜະລິດຕະພັນ, ໄດ້ມີ 18 ຜະລິດຕະພັນຜ່ານເຂົ້າຮອບຄັດເລືອກ ແລະ ມີ 9 ຜະລິດຕະພັນທີ່ໄດ້ຜ່ານເຂົ້າມາໃນການແຂ່ງຂັນຮອບສຸດທ້າຍ.
ໃນງານຄັ້ງນີ້ແມ່ນມີກິດຈະກຳຕ່າງໆ ເຊັ່ນ: ຮັບຟັງການບັນຍາຍ, ຮັບຟັງສົນທະນາຈາກຜູ້ທີ່ມີປະສົບການ ແລະ ຊ່ຽວຊານທາງດ້ານໄອຊີທີ ຢູ່ໃນ ສປປ ລາວ ໃນຫົວຂໍ້: ປະຍາປະດິດ(AI), ບົດບາດແມ່ຍິງກັບເຕັກໂນໂລຊີ, ທິດທາງການພັດທະນາໄອຊີທີ, ພ້ອມດຽວກັນນັ້ນກໍຍັງມີກິດຈະກຳແຈກຂອງລາງວັນຈາກຜູ້
ສະໜັບສະໜູນ, ຊຶ່ງຜົນຂອງການແຂ່ງຂັນ :
1. ລາງວັນຊະນະເລີດ ແມ່ນ ຜະລິດຕະພັນ BCEL One Heart ຈາກທະນາຄານການຄ້າຕ່າງປະເທດລາວ
2. ລາງວັນຮອງອັນດັບ 1 ແມ່ນ: ຜະລິດຕະພັນ Job Jibjib ຈາກກຸ່ມບໍລິສັດ 108-1009
3. ລາງວັນຮອງອັນດັບ 2 ແມ່ນຜະລິດຕະພັນ Typr ຈາກ ທ່ານ ສຸກສະຫວັນ ສີພັນຫຼະວົງ
4. ລາງວັນຊົມເຊີຍ ແມ່ນຜະລິດຕະພັນ Loca ຈາກ ທ່ານ ສຸລິໂຍ ວົງດາລາ
ພິເສດໄປກວ່ານັ້ນ ສໍາລັບຜະລິດຕະພັນທີ່ໂດດເດັ່ນ ຈະຖືກສົ່ງເຂົ້າປະກວດ ໃນໂຄງການ Asean ICT Award 2018 ທີ່ຈະຈັດຂຶ້ນຢູ່ປະເທດອິນໂດເນເຊຍ ໃນທ້າຍປີ 2018
Editor: ກຳປານາດ ລັດຖະເຮົ້າ
