ທ້າຍອາທິດຜ່ານມານີ້, ຫ້ອງການຊັພະຍາກອນທໍາມະຊາດ ແລະ ສິ່ງແວດ ລ້ອມ ເມືອງທ່າແຕງ ໄດ້ລົງເຜີຍແຜ່ເຊື່ອມຊຶມໃຫ້ປະຊາຊົນບ້ານໂກງຕາຢູນ ເມືອງທ່າແຕງ, ຮັບຮູ້ກ່ຽວກັບ ຂັ້ນຕອນການສ້າງສໍາມະໂນ ອອກໃບຕາດິນຖາວອນ ເພື່ອໃຫ້ເຂົ້າສູ່ລະບົບ. ໂດຍການເປັນປະທານຂອງ ທ່ານ ທອງແກ້ວ ລັດອໍານວຍ ຫົວໜ້າຫ້ອງການຊັພະຍາກອນທໍາມະຊາດ ແລະ ສິ່ງແວດລ້ອມ ເມືອງທ່າແຕງ, ໃຫ້ກຽດເຂົ້າຮ່ວມຂອງ ທ່ານ ບຸນຫຼາຍ ບຸດທິ ກໍາມະການພັກແຂວງ ຫົວໜ້າພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງເຊກອງ, ມີຂະແໜງການກ່ຽວຂ້ອງຂັ້ນແຂວງ, ຫ້ອງການກ່ຽວຂ້ອງອ້ອມຂ້າງເມືອງ ແລະ ປະຊາຊົນບ້ານໂກງຕາຢູນເຂົ້າຮ່ວມ.
ໃນການເຜີແຜ່ເຊື່ອມຊຶມເທື່ອນີ້ ປະຊາຊົນ ກໍໄດ້ຮູ້ກ່ຽວກັບກໍາມະສິດທີ່ດິນ, ການປົກປ້ອງສິດຜົນປະໂຫຍດຂອງຜູ້ທີ່ໄດ້ຮັບສິດນໍາໃຊ້ທີ່ດິນ, ສິດ ແລະ ພັນທະຂອງຜູ້ນໍາໃຊ້ທີ່ດິນ, ສິດໃນການປົກປັກຮັກສາທີ່ດິນ ທີ່ລັດມອບໃຫ້ບຸກຄົນ ຫຼືການຈັດຕັ້ງໃດໜຶ່ງຮັກສາ ເພື່ອໃຊ້ເຂົ້າໃນເປົ້າໝາຍໃດໜຶ່ງທີ່ແນ່ນອນ. ນອກນັ້ນ ຍັງໄດ້ຮັບຮູ້ກ່ຽວກັບສິດສືບທອດ, ສິດນໍາໃຊ້ທີ່ດິນ, ພັນທະຂອງຜູ້ໃຊ້, ການເສຍສິດ ແລະ ສິ້ນສຸດສິດນໍາໃຊ້ທີ່ດິນ, ການຈັບຈ່ອງ, ຂັ້ນຕອນການສ້າງສໍາມະໂນທີ່ດິນ ແລະ ອອກໃບຕາດິນເປັນລະບົບ.
ໃນປີ 2018 ທົ່ວເມືອງທ່າແຕງ ໄດ້ມີແຜນສ້າງສໍາມະໂນທີ່ດິນ ແລະ ອອກໃບຕາດິນໃຫ້ໄດ້ທັງໝົດ 1. 500 ຕອນ ແລະ ຂຶ້ນທະບຽນອອກໃບຕາດິນໃຫ້ໄດ້ 900 ຕອນ. ຈາກນັ້ນ ຜູ້ເຂົ້າຮ່ວມກໍໄດ້ ປະກອບຄໍາຄິດຄໍາເຫັນ ເຊິ່ງກັນ ແລະ ກັນ ເພື່ອເຮັດໃຫ້ຂັ້ນຕອນດັ່ງກ່າວ ຖືກຕ້ອງສອດຄ່ອງກັບລະບຽບຫຼັກການ, ເຮັດໃຫ້ປະຊາຊົນມີໃບຕາດິນຖາວອນ, ເນື້ອທີ່ດິນຂອງປະຊາຊົນ ເວົ້າສະເພາະ ກໍຄືບ້ານໂກງຕາຢູນ ຈະຫັນເຂົ້າສູ່ຂະບວນການຍຸຕິທໍາ, ຖືກຕ້ອງຕາມລະບຽບກົດໝາຍ ທັງເຮັດໃຫ້ຂະບວນການຕິດຕາມກວດກາ ກໍຄືການເກັບຄ່າທໍານຽມ ຂອງຂະແໜງການກ່ຽວຂ້ອງ ຖືກຕ້ອງສອດຄ່ອງກັບກົດໝາຍ ແລະ ຫຼັກການ, ມາດຕະການຢ່າງເຂັ້ມງວດ
Editor: ກຳປານາດ ລັດຖະເຮົ້າ
