ອີງຕາມການລາຍງານ ຂອງ ທ່ານ ອ່ອນແກ້ວ ອິນທະວົງ ຮອງຫົວຫນ້າຫ້ອງການສາທາລະນະສຸກ ເມືອງຫ້ວຍຊາຍ ເມື່ອບໍ່ດົນມານີ້ວ່າ: ປະຈຸບັນແຂວງບໍ່ແກ້ວ ກໍ່ຄືຫ້ອງການສາທາລະນະສຸກ ປະຈໍາເມືອງຫ້ວຍຊາຍ ແມ່ນໄດ້ມີການສົມທົບກັບບັນດາພາກສ່ວນທີ່ກ່ຽວຂ້ອງ ເອົາໃຈໃສ່ໃນການຄວບຄຸມການລະບາດຂອງພະຍາດໄຂ້ຍຸງລາຍ ຢ່າງໃກ້ຊິດ, ຜົນການສໍາຫລວດຫນອນນໍ້າຍຸງລາຍ ຍັງມີທ່ວງທ່າທີ່ສູງ ເຊີ່ງມັນໄດ້ຊີ້ໃຫ້ເຫັນເຖິງພະຍາດໄຂ້ຍຸງລາຍ ແມ່ນຍັງມີທ່າອ່ຽງທີ່ເພີ່ມຂື້ນ. ສະນັ້ນ ພວກເຮົາທຸກຄົນ ຍິ່ງເພີມທະວີໃນການເອົາໃຈໃສ່ໃນການປ້ອງກັນ, ໂດຍສເພາະ ການມີສ່ວນຮ່ວມໃນທົ່ວສັງຄົມ. ການເຝົ້າລະວັງໃຫ້ດີ ເພື່ອປ້ອງກັນການເຈັບເປັນ ແລະ ການຕາຍຂອງປະຊາຊົນ, ສະກັດກັ້ນການເກີດພະຍາດ ເພື່ອສືບຕໍ່ພັດທະນາສຸຂະພາບໃຫ້ແຂງແຮງ, ເຮັດໃຫ້ຄຸນນະພາບຊີວິດຂອງປະຊາຊົນ ເມືອງຫ້ວຍຊາຍ ແຂວງບໍ່ແກ້ວ ນັບມື້ນັບດີຂື້ນ. ການສ້າງຂະບວນການຕ້ານພະຍາດໄຂຍຸງລາຍ ແມ່ນຫນ້າທີ່ຂອງຫມົດທຸກຄົນ ເພື່ອເປັນການປູກຈິດສໍານຶກໃຫ້ກັບພະນັກງານ ທຸກຊັ້ນຄົນ ແລະ ພໍ່ແມ່ປະຊາຊົນບັນດາເຜົ່າ ເຂົ້າໃຈ ແລະ ຮູ້ວິທີທໍາລາຍຫນອນນໍ້າຍຸງລາຍ ແລະ ແຫລ່ງເພາະພັນຂອງຍຸງລາຍ, ໂດຍຈັດຕັ້ງປະຕິບັດ ຢ່າງເປັນປົກກະຕີ, ໃຫ້ກາຍເປັນຄວາມຊີ້ນເຄີຍ ຂອງທຸກໆຄົນ. ໂດຍຖືເອົາໃນທຸກໆວັນເສົາ ເປັນວັນອອກແຮງງານອະນາໄມເຮືອນຊານ ແລະ ເກັບມ້ຽນກະໂປະ-ກະປ໋ອງ ບ່ອນທີ່ມີນໍ້າຫົ່ງຂັງ ເພື່ອບໍ່ໃຫ້ຍຸງລາຍມາໄຂ່ໃສ່ ແລະ ບໍ່ສາມາດແຜ່ພັນໄດ້.
ທ່ານ ອ່ອນແກ້ວ ອິນທະວົງ ກ່າວຕື່ມວ່າ: ນັບແຕ່ຕົ້ນເດືອນ ພຶດສະພາ ຈົນມາເຖິງຕົ້ນເດືອນ ກໍລະກົດ 2018 ເປັນເວລາ 2 ເດືອນກວ່າ ສະເພາະເມືອງຫ້ວຍຊາຍ, ແຂວງບໍ່ແກ້ວ ສາມາດກວດພົບກໍລະນີສົງໄສວ່າເປັນໄຂຍຸງລາຍ 203 ກໍລະນີ, ຜົນການກວດຍັງຍື້ນຈາກສູນລະບາດວິທະຍາ ຈາກສູນກາງ ພົບວ່າ ມີຜູ້ທີ່ເປັນພະຍາດໄຂເລຶອດອອກ ຫລື ໄຂ້ຍຸງລາຍ 48 ກໍລະນີ, ນອນໃນ 18 ບ້ານ ທົ່ວເມືອງຫ້ວຍຊາຍ.
ຕໍ່ກັບບັນຫານີ້ ບັນດາແພດຫມໍ ກໍ່ຄືເຈົ້າຫນ້າທີ່ສາທາ ຈີ່ງໄດ້ເອົາໃຈໃສ່ເຜົ້າຕິດຕາມຢ່າງໃກ້ຊິດ ພ້ອມທັງຮຽກຮ້ອງມາຍັງທົ່ວສັງຄົມ ແລະ ການຈັດຕັ້ງທຸກໆຂັ້ນ ພາກລັດ ແລະ ເອກະຊົນ, ພະນັກງານ ແລະ ປະຊາຊົນ ຈົ່ງພ້ອມກັນເອົາໃຈໃສ່ ດູແລເບີ່ງແຍງສຸຂະພາບໃຫ້ດີ ພ້ອມກັນເອົາໃຈໃສ່ ຄວບຄຸມ ແລະ ສະກັດກັ້ນ ບໍ່ໃຫ້ເກີດພະຍາດໄຂເລຶອດອອກ ໂດຍຈັດຕັ້ງປະຕີບັດ 5 ປໍ ຢ່າງເປັນປະຈໍາ.
Editor: ກຳປານາດ ລັດຖະເຮົ້າ
