ງານບັນພະຊາສໍາມະເນນລວມໜູ່ ຄັ້ງທີ່ 1 ຢູ່ເມືອງຫົງສາ ໄດ້ສໍາເລັດຢ່າງເປັນທາງການ ໃນຕອນຂອງບ່າຍວັນທີ 7 ກໍລະກົດ 2018ນີ້ ພາຍຫຼັງໄດ້ດໍາເນີນມາເປັນເວລາ 7 ວັນ,ຢູ່ທີວັດບ້ານສີມຸງຄຸນ ເມືອງຫົງສາ ໂດຍການເປັນກຽດເຂົ້າຮ່ວມຂອງ ທ່ານ ພອນສະຫັວນ ໄຊສົມພັນ ຮອງເຈົ້າເມືອງໆຫົງສາ, ມີພະອາຈານ ສົມພອນ ຄໍາຈະເລີນ ຮອງປະທານ ອພສ ແຂວງໄຊຍະບູລີ, ມີປະທານ ອພສ ເມືອງ, ມີຄະນະນໍາຂອງເມືອງ, ຄະນະສົງຂັ້ນແຂວງ, ຂັ້ນເມືອງ, ສໍາມະເນນ ແລະ ຊາວພຸດທະສະນິກະຊົນເຂົ້າຮວ່ມຢ່າງຫຼວງຫຼາຍ.
ໃນພິທີດັ່ງກ່າວ: ທ່ານ ສົມສະນິດ ປອ້ງຄໍາ ປະທານແນວລາວສ້າງຊາດເມືອງຫົງສາ ກໍ່ໄດ້ຂື້ນຜ່ານບົດສະຫຼຸບລາຍງານການຈັດຕັ້ງປະຕິບັດວຽກງານ ບັນພະຊາສໍາມະເນນລວມໜູ່ຄັ້ງທີ່ 1 ຢູ່ເມືອງຫົງສາ, ເຊີ່ງທ່ານໄດ້ກ່າວວ່າ: ຈຸດປະສົງຂອງການຈັດງານຄັ້ງນີ້ ເພື່ອເປັນການຊຸກຍູ້ ນັກຮຽນ ແລະ ເຍົາວະຊົນ - ຊາວໜຸ່ມ ເຂົ້າບວດຝຶກອົບຮົມສີລະທໍາ, ອາລິຍະທໍາໃນໄລຍະສັ້ນ ເພື່ອເຂົ້າຣຽນຕໍ່ໂຮງຮຽນມັດທະຍົມສົງຕອນຕົ້ນ ທີ່ວັດບ້ານຈອມແຈ້ງ ເມືອງຫົງສາທີ່ຈະເປີດຂື້ນເປັນປີທໍາອິດຂອງເມືອງ,ເຊີ່ງມີເຍົາວະຊົນ - ຊາວໜຸ່ມ ເຂົ້າບວດເປັນສໍາມະເນນໃນໂຄງການທັງໝົດ ຈໍານວນ 103 ອົງ,ບວດຝຶກອົບຮົມຈໍານວນ 38 ອົງ, ບວດຮຽນຕໍ່ໃນໂຮງຮຽນສົງ 67 ອົງ, ມີສໍາມະເນນເກົ່າ ຈໍານວນ 8 ອົງ,ໄປຣຽນຕໍ່ຕ່າງແຂວງ ຈໍານວນ 5 ອົງ ແລະ ສໍາມະເນນຈະເຂົ້າຮຽນຕໍ່ຢູ່ ໂຮງຮຽນມັດທະຍົມສົງຕອນຕົ້ນ ທີ່ວັດບ້ານຈອມແຈ້ງ ເມືອງຫົງສາ, ມີຈໍານວນ 63 ອົງ, ປະກອບມີ 3 ຊັ້ນຮຽນ ແຕ່ຊັ້ນ ມໍ 1 ຫາ ຊັ້ນ ມໍ 3, ຕະຫຼອດໄລຍະເວລາ 7 ວັນນີ້, ສໍາມະເນນໄດ້ຮຽນຮູ້ບັນດາກິດຈະກໍາຕົວຈິງໃນແຕ່ລະວັນເຊັ່ນ: ຮຽນຮູ້ການໄຫ້ວພະ - ພາວັນນາ, ການໄຫວພະຮັບສິນ, ການສືກສາພຸດທະປະຫວັດ, ການສຶກສາກຽ່ວກັບທໍາມະ, ນອກນັ້ນຍັງໄດ້ຮຽນຮູ້ການເຜີຍແຜ່ສຸຂະອານາໄມ, ຄວາມຮູ້ກຽ່ວກັບໂທດຢາເສບຕິດ, ການສຶກສາກັບການພັດທະນາຊິວິດ, ຄົນລາວ ວັດທະນະທໍາລາວ, ພ້ອມນັ້ນ ໃນແຕ່ລະວັນ ຍັງໄດ້ລົງບິນທະບາດຢູ່ວັດແຫ່ງຕ່າງໆ ຢູ່ໃນເທດສະບານເມືອງ, ພາຍຫຼັງສໍາເລັດງານດັ່ງກ່າວຍັງໄດ້ຊັບຊ້ອນສໍາມະເນນໃໝ່ ໄປປະຈໍາຢູ່ວັດຕ່າງໆ ຢູ່ພາຍໃນເທດສະບານເມືອງຕາມຄວາມເໝາະສົມ. ເຊີ່ງການຈັດງານຄັ້ງນີ້ ແມ່ນມີຫຼາຍພາກສ່ວນ ທີ່ມີໃຈໃສສັດທາໄດ້ໃຫ້ຄວາມຊວ່ຍເຫຼືອສະໜັບສະໜູນ ໃນການບໍລິຈາກເປັນເຄື່ອງໄທຍະທານ, ເປັນວັດຖຸ ແລະ ເງີນສົດ ລວມທັງໝົດ 160 ລ້ານກວ່າກິບ, ເຊີ່ງວັດຖຸ ແລະ ງົບປະມານນີ້ ແມ່ນຈະນໍາໃຊ້ເຂົ້າໃນວຽກງານດັ່ງກ່າວຕາມການຕົກລົງຂອງຄະນະຮັບພິບຊອບ ຂັ້ນເມືອງ.
ໃນໂອກາດນີ້ ທ່ານ ພອນສະຫັວນ ໄຊສົມພັນ ຍັງໃຫ້ກຽດຂື້ນມີຄໍາເຫັນ ແລະ ກ່າວປິດງານດັ່ງກ່າວຢ່າງເປັນທາງການ
Editor: ກຳປານາດ ລັດຖະເຮົ້າ
