ກອງປະຊຸມປຶກສາຫາລື ແລະ ແລກປ່ຽນບົດຮຽນກ່ຽວກັບການສົ່ງເສີມການຮ່ວມມືທາງດ້ານການຄ້າ, ການລົງທຶນ, ການທ່ອງທ່ຽວ, ການສຶກສາ - ກິລາ ແລະ ວັດທະນະທໍາ ລະຫ່ວາງ ແຂວງໄຊຍະບູລີ ສປປ ລາວ - ແຂວງເລີຍ ລາຊະອານາຈັກໄທ, ໄດ້ຈັດຂຶ້ນເມື່ອບໍ່ດົນມານີ້ ທີ່ສະໂມສອນຫ້ອງວ່າການປົກຄອງແຂວງໄຊຍະບູລີ ຝ່າຍແຂວງໄຊຍະບູລີ ມີທ່ານນາງ ບຸນພັກ ອິນທະປັນຍາ ຄະນະປະຈໍາພັກແຂວງ ຮອງເຈົ້າແຂວງໄຊຍະບູລີ ພ້ອມດ້ວຍຄະນະ, ຝ່າຍ ແຂວງເລີຍ ມີ ທ່ານ ພອນໄຊ ຖົມກະຈ່າງ ຮອງຜູ້ວ່າລາດສະການ ແຂວງເລີຍ ພ້ອມດ້ວຍຄະນະ.

ໃນເວລະການດໍາເນີນກອງປະຊຸມແລກປ່ຽນໃນຄັ້ງນີ້ ທ່ານນາງ ບຸນພັກ ອິນທະປັນຍາ ຮອງເຈົ້າແຂວງໄຊຍະບູລີ ໄດ້ກ່າວວ່າ: ໃນໄລຍະຜ່ານມາແຂວງໄຊຍະບູລີ ສປປ ລາວ ກັບ ແຂວງເລີຍ ລາດຊະອານາຈັກໄທ ໄດ້ມີການພົວພັນຮ່ວມມືກັນເປັນປົກກະຕິ ໂດຍສະເພາະທາງດ້ານການຄ້າ, ການລົງທຶນ, ການທ່ອງທ່ຽວ ການສຶກສາ - ກິລາ ແລະ ດ້ານວັດທະນະທໍາ ອັນໄດ້ສ້າງເງື່ອນໄຂໃຫ້ຂະແໜງການ ແລະ ທ້ອງຖິ່ນມີການພົບປະແລກປ່ຽນດ້ານການຄ້າຊາຍແດນ ຕາມຂອບເຂດການຮ່ວມມືທີ່ສອງລັດຖະບານ ໄດ້ລົງນາມຮ່ວມກັນເຮັດໃຫ້ການຄ້າຊາຍແດນ ລະຫ່ວ່າງ ແຂວງໄຊຍະບູລີ ກັບ ແຂວງເລີຍ ໄດ້ຮັບການປັບປຸງດີຂຶ້ນເລື້ອຍໆ ເຊັ່ນ: ປັບປຸງສິ່ງອໍານວຍຄວາມສະດວກ ແລະ ການບໍລິການຢູ່ດ່ານສາກົນເມືອງແກ່ນທ້າວ, ເຮັດໃຫ້ການພົວພັນແລກປ່ຽນຊື້ - ຂາຍສິນຄ້າມີການພັດທະນາດີກ່ວາເກົ່າ, ການຄ້າຂາຍຊາຍແດນຢູ່ດ່ານສາກົນຂົວມິດຕະພາບນໍ້າເຫືອງ, ບັນດາດ່ານທ້ອງຖິ່ນປະເພນີໄດ້ມີບັນຍາກາດດີຂຶ້ນ, ພ້ອມນີ້ການຄ້າ - ການລົງທຶນໄດ້ຈັດງານສະແດງສິນຄ້າຜະລິດຕະພັນຮ່ວມກັນ ລະຫ່ວາງ ແຂວງໄຊຍະບູລີ - ແຂວງເລີຍ, ໃນໂອກາດງານເທດສະການທີ່ສໍາສຄັນເປັັນຕົ້ນແມ່ນໄດ້ຈັດງານວາງສະແດງສິນຄ້າໜຶ່ງເມືອງໜຶ່ງຜະລິດຕະພັນ( ODOP) ແລະໜຶ່ງ ຕໍາບົນໜຶ່ງຜະລິດຕະພັນ (OTOP) ສາຍສໍາພັນແຜ່ນດິນລາວ - ໄທ, ໃນແຕ່ລະປີ ແຂວງເລີຍ ກໍ່ໄດ້ເຂົ້າຮ່ວມງານເທດສະການບຸນອອກພັນສາປະວໍລະນາ ແລະ ບຸນຊ່ວງເຮືອ, ງານມະຫາກໍາບຸນຊ້າງຕາມການເຊີນຂອງແຂວງໄຊຍະບູລີ. ພ້ອມທັງໃຫ້ທຶນການສຶກສາໃນລະດັບສູງ ແລະ ຊັ້ນກາງຢູ່ວິທະຍາໄລເຕັກນິກ ທີ່ແຂວງເລີຍ. ຈາກນັ້ນ, ທັງສອງຝ່າຍຍັງໄດ້ພ້ອມກັນປະກອບຄໍາຄິດເຫັນເພື່ອເຮັດໃຫ້ການແລກປ່ຽນບົດຮຽນດ້ານຕ່າງໆໄດ້ມີການພັດທະນາດີຂຶ້ນໃນຕໍ່ໜ້າ

ແຫລ່ງຂ່າວ ທີມຂ່າວ ແຂວງໄຊຍະບູລີ

Editor: ກຳປານາດ ລັດຖະເຮົ້າ