ເມືອງທ່າແຕງ ແຂວງເຊກອງ; ໄດ້ຈັດພິທີເຜີຍແຜ່ກົດໝາຍ ວ່າດ້ວຍສະຖິຕິ, ແຜນຍຸດທະສາດການພັດທະນາລະບົບສະຖິຕິ 2016-2025 ແລະ ວິໄສທັດ ຮອດປີ 2030. ໂດຍໃຫ້ກຽດເຂົ້າຮ່ວມຮັບຟັງການເຜີຍແຜ່ ຂອງ ທ່ານ ລົດແກ້ວ ເພັງພູນສະຫວັດ ຮອງເລຂາພັກເມືອງ ປະທານແນວລາວສ້າງຊາດເມືອງທ່າແຕງ, ມີຄະນະສູນສະຖິຕິປະຈໍາແຂວງ, ຫ້ອງການແຜນການ ແລະ ການລົງທຶນເມືອງ ພ້ອມພະນັກງານລັດຖະກອນ ຈາກຫ້ອງການອ້ອມຂ້າງເມືອງທ່າແຕງເຂົ້າຮ່ວມ.
ໃນການເຜີຍແຜ່ຄັ້ງນີ້ ຜູ້ເຂົ້າຮ່ວມໄດ້ຮັບຟັງກ່ຽວກັບກົດໝາຍ ວ່າດ້ວຍສະຖິຕິ ສະບັບປັບປຸງ ປີ 2017, ເຊິ່ງປະກອບມີ 10 ພາກ, 81 ມາດຕາ. ໃນນັ້ນ: ມີບາງມາດຕາໄດ້ມີການປັບປຸງ ແລະ ເພີ່ມໃໝ່, ໂດຍສະເພາະ ຈຸດປະສົງ, ຫຼັກການພື້ນຖານກ່ຽວກັບວຽກສະຖິຕິ, ຂອບເຂດການນໍາໃຊ້ກົດ ໝາຍ, ການຮ່ວມມືສາກົນ, ສະຖິຕິສັງຄົມ, ສິ່ງແວດລ້ອມ ແລະ ຊັພະຍາກອນທໍາມະຊາດ, ປະເພດການສໍາຫຼວດສະຖິຕິ, ການວາງແຜນສໍາຫຼວດ, ພັນທະຜູ້ສະໜອງຂໍ້ມູນການສໍາຫຼວດ ແລະ ອື່ນໆ ທີ່ກ່ຽວຂ້ອງ. ນອກນັ້ນ, ຍັງມີບາງມາດຕາທີ່ເພີ່ມເຂົ້າໃໝ່ເປັນຕົ້ນ: ວິທີການຄິດໄລ່ຕາມວິທະຍາສາດດ້ານສະຖິຕິ, ໄລຍະເວລາການລາຍງານ, ການສ້າງສະຖິຕິຂຶ້ນຫົວໜ່ວຍບັນຊີການປົກຄອງ, ການສ້າງສະຖິຕິຂຶ້ນບັນຊີຄົວເຮືອນ, ການສ້າງສະຖິຕິຈົດນັບພົນລະເມືອງ, ການສ້າງສະຖິຕິຂຶ້ນທະບຽນອື່ນໆ.
ຈາກນັ້ນ,ຜູ້ເຂົ້າຮ່ວມຍັງໄດ້ຮັບຟັງການເຜີຍແຜ່ແຜນຍຸດທະສາດ ການພັດທະນາລະບົບສະຖິຕິ 2016-2025 ແລະ ວິໄສທັດ ຮອດປີ 2030. ຮັບຟັງການເຜີຍແຜ່ຍຸດທະສາດລະບົບສະຖິຕິປະຈໍາແຂວງ, ຮັບຟັງການຜ່ານລະບົບສະຖິຕິ 5 ປີ ຂອງເມືອງ. ພ້ອມທັງປະກອບຄໍາຄິດຄໍາເຫັນ ເຊິ່ງກັນ ແລະ ກັນ. ແນໃສ່ເຮັດໃຫ້ການຈັດຕັ້ງປະຕິບັດມີຄວາມເປັນເອກະພາບ ແລະ ບັນລຸເປົ້າໝາຍ ທີ່ວາງໄວ້. ທັງເຮັດໃຫ້ ວຽກງານດັ່ງກ່າວ ໄດ້ຮັບການສ້າງ ແລະ ພັດທະນາຢ່າງເປັນລະບົບ ທັນສະ ໄໝໜັກແໜ້ນ ແລະ ມີປະສິດທິພາບ, ຮັບປະກັນຄວາມຄົບຖ້ວນ, ຊັດເຈນ, ທັນເວລາ ແລະ ສອດຄ່ອງກັບຄວາມເປັນຈິງ, ສາມາດເປັນບ່ອນອີງໃຫ້ແກ່ການກໍານົດທິດທາງ, ໜ້າທີ່ ແລະ ຄາດໝາຍລວມ ຂອງແຜນພັດທະນາເສດຖະກິດ-ສັງຄົມ ແຫ່ງຊາດ, ສາມາດເຊື່ອໂຍງກັບພາກພື້ນ ແລະ ສາກົນ.
Editor: ກຳປານາດ ລັດຖະເຮົ້າ
