ພິທີປ່ອຍປາຄືນລົງສູ່ແຫຼ່ງນໍ້າທໍາມະຊາດ ເນືອງໃນວັນປ່ອຍປາ ແລະ ວັນອານຸລັກສັດນໍ້າ-ສັດປ່າແຫ່ງຊາດ ໄດ້ຈັດຂື້ນໃນຕອນເຊົ້າ ຂອງວັນທີ 12 ກໍລະກົດ 2018ນີ້ ຢູ່ທີ່ເຂດທ່າຊວ່ງເຮືອ ບ້ານສີບຸນເຮືອງ ເມືອງຫົງສາ ໂດຍການເຂົ້າ ຮ່ວມຂອງ ທ່ານ ຄໍາເພັດ ພົມມະລາດ ເຈົ້າເມືອງໆຫົງສາ, ມີ ທ່ານນາງ ວິສາກອນ ເອື້ອອາລີກຸນ ຜູ້ອໍານວຍການຝ່າຍບໍລິຫານ - ຈັດການ. ບໍລິສັດໄຟຟ້າຫົງສາ ຈໍາກັດ ມີການນໍາຂອງເມືອງ, ພະນັກງານຂອງບໍລິສັດໄຟຟ້າຫົງສາ ແລະ ພາກທີ່ກຽ່ວຂ້ອງຂອງເມືອງ ເຂົ້າຮ່ວມ
ໃນພິທີດັ່ງກ່າວ: ທ່ານ ຄໍາເພັດ ພົມມະລາດ ເຈົ້າເມືອງຫົງສາ ກໍ່ໄດ້ກ່າວເປິດພິທີຢ່າງເປັນທາງການ ເຊີ່ງທ່ານກ່າວວ່າ: ວັນອານຸລັກສັດນໍ້າ - ສັດປ່າແຫ່ງຊາດໄດ້ມູນວຽນມາບັນຈົບຄົບຮອບອີກວາລະໜື່ງ ໃນວັນທີ 13 ກໍລະກົດ 2018, ເພື່ອເປັນການ ປົກປັກຮັກສາສະພາບແວດລ້ອມ ແລະ ຄວາມອຸດົມສົມບູນຂອງຊັບພະຍາກອນທໍາມະຊາດ,ສັດນໍ້າ - ສັດປ່າໃຫ້ຍືນຍົງຄົງຕົວ ຕະຫຼອດໄປຢ່າງບໍບົກແຫ້ງຈັກເທື່ອສະນັ້ນໃນໂອກາດນີ້ ທົ່ວພັກ,ທົ່ວກອງທັບ ແລະ ທົ່ວປວງຊົນລາວທັງຊາດຕະຫຼອດຮອດປະຊາຊົນບັນດາເຜົ່າໄດ້ຖືກເອົາວັນນີ້ເປັນວັນຍີ່ງໃຫ່ຍ ອັນໜື່ງຂອງຊາດລາວ ແລະ ທັງເປັນວັນຄ້າຍວັນເກີດຂອງ ປະທານ ສຸພານຸວົງ ອາດິດຜູ່ນໍາທີ່ແສນເຄົ້າລົບຮັກຂອງປວງຊົນລາວທັງຊາດ, ສະເພາະຢູ່ເມືອງຫົງສາ ເນື່ອງຈາກສະພາບໃນເມື່ອກ່ອນ ກໍ່ມີສັດນໍ້າ - ສັດປ່າ ທີ່ສໍາຄັນຫຼາຍຊະນິດ,ແຕ່ມາຮອດປະຈຸບັນນີ້ ຄວາມອຸດົມສົມບູນດັ່ງກ່າວໄດ້ນັບມື້ລຸດໜ້ອຍຖອຍລົງ ຍ້ອນມີການປ່ຽນແປງທາງດ້ານທໍາມະຊາດ,ອີກດ້ານໜື່ງກໍ່ແມ່ນການຫາປາ - ລ່າສັດແບບບໍ່ຖືກຕ້ອງຕາມລະບຽບກົດໝາຍ ດັ່ງນັ້ນຄະນະພັກອໍານາດການປົກຄອງທຸກຂັ້ນ ໄດ້ເອົາໃຈໃສ່ມີມາດຕະການສະກັດກັ້ນ ແລະ ສົ່ງເສີມການອານຸລັກສັດນ້ຳສັດປ່າຕະຫຼອດມາ, ນັບແຕ່ປີ 2017 ເປັນຕົ້ນມາ, ຮອດປະຈຸບັນນີ້ເມືອງຫົງສາ ໄດ້ປອ່ຍປາຄືນສູ່ແຫຼ່ງນ້ຳທຳມະຊາດແລ້ວ ໃນຈໍານວນ 1 ລ້ານ 960.000 ກວ່າໂຕ, ສະເພາະປີນີ້ ເມືອງຫົງສາ ຈະປ່ອຍປາຄືນລົງສູ່ແຫຼ່ງນໍ້າທໍາມະຊາດ 20 ພັນໂຕ ມີ 4 ເຂດ ຄື: ເຂດທ່າຊວ່ງເຮືອບ້ານສີບຸນເຮືອງ, ວັງສະຫງວນບ້ານແທ່ນຄໍາ, ເຂື່ອນນໍ້າແກນ, ແລະ ເຂື່ອນນໍ້າເຫຼືອກ ເຊິ່ງປາທີ່ນໍາມາປ່ອຍໃນຄັ້ງນີ້ ປະກອບມີ ປານີນ ,ປາໃນ ,ປາປາກ , ປາກິນຫຍ້າ ແລະ ປາແກັດແລບ.
ໃນໂອກາດນີ້: ທ່ານ ເຈົ້າເມືອງຫົງສາ ກໍ່ໄດ້ຮຽກຮ້ອງມາຍັງທຸກພາກສ່ວນທັງພາກລັດ ໂຄງການ ແລະ ເອກະຊົນຈົ່ງພ້ອມກັນເອົາໃຈໃສ່ອານຸລັກສັດນໍ້າ - ສັດປ່າ, ປົກປັກຮັກສາບວກນໍ້າວັງປາໃຫ້ນັບມື້ນັບຂະຫຍາຍຕົວ,ສ້າງໃຫ້ໄດ້ວັງສະຫງວນຂອງແຕ່ລະບ້ານ,ມີມາດຕະການຫ້າມຫາປາໃນລະດູວາງໄຂ່, ຫ້າມນໍາໃຊ້ອຸປະກອນຫາປາທີ່ມີດັບສູນ ຫຼື ກີດກັ້ນທາງເດີນຂື້ນລ່ອງຂອງປາທັງນີ້ ກໍ່ເພື່ອເຮັດໃຫ້ສິ່ງແວດລ້ອມມີຄວາມອຸດົມສົມບູນ
ແຫລ່ງຂ່າວຈາກ: ທີມຂ່າວເມືອງຫົງສາ
Editor: ກຳປານາດ ລັດຖະເຮົ້າ
