ກອງປະຊຸມເຜີຍແຜ່ຂໍ້ຕົກລົງວ່າດ້ວຍການຄຸ້ມຄອງນໍາໃຊ້ ແລະ ອະນຸລັກຊັບພະຍາກອນທໍາມະຊາດ ທີ່ເປັນຢາ ໄດ້ຈັດຂື້ນໃນວັນທີ 9 ກໍລະກົດ 2018 ຜ່ານມາທີ່ຫ້ອງປະຊຸມ ພະແນກສາທາລະນະສຸກແຂວງໄຊຍະບູລີ ໂດຍການໃຫ້ກຽດເຂົ້າຮ່ວມ ເປັນປະທານຂອງ ທ່ານນາງ ບຸນພັກ ອິນທະປັນຍາ ຄະນະປະຈຳພັກແຂວງ ຮອງເຈົ້າແຂວງໄຊຍະບູລີ, ມີ ຫົວໜ້າ ຮອງຫົວໜ້າພະແນກສາທາລະນະສຸກແຂວງ, ພະນັກງານວິຊາການ ແລະ ພະແນກການທີ່ກ້ຽວຂ້ອງເຂົ້າຮ່ວມ.
ໃນກອງປະຊຸມ ທ່ານ ດຣ ຄໍາຜີວ ພູທອນສີ ຫົວໜ້າພະແນກສາທາລະນະສຸກແຂວງ ໄດ້ຜ່ານຂໍ້ຕົກລົງຂອງທ່ານເຈົ້າແຂວງ ເລກທີ່ 308/ຈຂຊຍ ວ່າດ້ວຍການຄຸ້ມຄອງນຳໃຊ້ ແລະ ອານຸລັກຊັບພະຍາກອນທຳທຳມະຊາດທີ່ເປັນຢາ ເຊິງຂໍ້ຕົກລົງສະບັບນີ້ມີ 8 ໝວດ 37 ມາດຕາໂດຍກຳນົດຫຼັກການ ມາດຕະການກ້ຽວກັບການຄຸ້ມຄອງ ການຂຸດຄົ້ນ, ການຜະລິດ, ການປູກ, ການລ້ຽງ, ການອະນຸລັກ ແລະ ນຳໃຊ້ຊັບພະຍາກອນທີ່ເປັນຢາເພື່ອເປັນການປົກປັກຮັກສາ ແຫຼ່ງຊັບພະຍາກອນ ທຳມະຊາດທີ່ເປັນຢາ ຄວາມອຸດົມສົມບຸນຂອງທຳມະຊາດ ແລະ ຮັບປະກັນການນຳໃຊ້ ໃຫ້ມີຄວາມຢືນຢົງຕະຫຼອດໄປ ໂດຍຖືເອົາການຄຸ້ມຄອງ ປົກປັກຮັກສາເປັນວຽກງານຕົ້ນຕໍ ຖືເອົາການປູກ ການລ້ຽງເປັນວຽກງານສຳຄັນ ຕິດພັນກັບການສຶກສາຄົ້ນຄວ້າ ການພະລິດຢາພີ້ນເມືອງ ຢາຫຼວງໃຫ້ໄດ້ຮັບຜົນປະໂຫຍດ ແລະ ມີປະສິດທິຜົນເພື່ອການພັດທະນາຊີວະນາໆພັນແບບຢືນຢົງ
ທ່ານຍັງໄດ້ໃຫ້ຮູ້ຕື່ມອີກວ່າ: ຊັບພະຍາກອນທຳມະຊາດເປັນຢາທີ່ພະແນກສາທາລະນະສຸກແຂວງໄຊຍະບູລີ ຄຸ້ມຄອງ ປະຈຸບັນ ມີຢູ່ ທັງໝົດ70 ຊະນິດ.
Editor: ກຳປານາດ ລັດຖະເຮົ້າ
