2018 ນີ້ ເບຍລາວ ໄດ້ດໍາເນີນທຸລະກິດ ພໍດີຄົບຮອບ 45 ປີ, ເຊີ່ງໄດ້ສ້າງຕັ້ງຂື້ນມາແຕ່ປີ 1973 ດ້ວຍການຮ່ວມມືລະຫວ່າງ ນັກທຸລະກິດ ປະເທດ ຝຣັ່ງ ແລະ ລາວ ໂດຍເມື່ອກ່ອນໃສ່ຊື່ວ່າ ໂຮງງານ ເຫລົ້າເບຍ ແລະ ນໍ້າກ້ອນ ລາວ. ມາເຖິງປີ 1975 ລັດຖະບານໄດ້ເຂົ້າມາຖືກໍາມະສິດໃນໂຮງງານດັ່ງກ່າວ ເພື່ອສຶບຕໍ່ຜະລິດຮັບໃຊ້ສັງຄົມ ແລະ ເພື່ອປະຕິບັດແນວທາງປ່ຽນແປງໃຫມ່ ໃນປີ 1993 ບໍລິສັດເບຍລາວ ໄດ້ຮັບການປ່ຽນກໍາມະສິດ ເປັນບໍລິສັດ ຮ່ວມທຶນ ລະຫວ່າງ ລັດຖະບານລາວ ກັບຜູ້ລົງທຶນຕ່າງປະເທດ. ແລະ ມາໃນປີ 2005 ໄດ້ມີການປ່ຽນແປງຝ່າຍລົງທຶນຕ່າງປະເທດ ເປັນ ບໍລິສັດ ຄລາສເບີດ ບີເວີຣີ ເຊີ່ງເປັນຂາຮຸ້ນ ຍຸດທະສາດທີ່ສໍາຄັນ ທີ່ມີສ່ວນຮ່ວມ ເຮັດໃຫ້ບໍລິສັດເບຍລາວ ປະສົບຜົນສໍາເລັດ ໂດຍດີຕະຫລອດມາ. ໃນປີ 2012 ບໍລິສັດ ນໍ້າຫວານລາວ ໄດ້ລວມເຂົ້າກັບ ບໍລິສັດ ເບຍລາວ ເພື່ອສ້າງຄວາມເຂັ້ມແຂງໃຫມ່ ໃນຕະຫລອດການປ່ຽນແປງ.
ທ່ານ ເຮັນຣິກ ແອນເດີເຊັນ ຜູ້ອໍານວຍການໃຫຍ່ ບໍລິສັດ ເບຍລາວ ຈໍາກັດ ໄດ້ກ່າວວ່າ: ບໍລິສັດເບຍລາວ ໄດ້ເອົາໃນໃສ່ສ້າງເງື່ອນໄຊ ທີ່ເປັນພື້ນຖານຫນັກແຫນ້ນ ໃຫ້ແກ່ຜູ້ດໍາເນີນທຸລະກິດ ຕາມແນວທາງນະໂຍບາຍຂອງພັກ ແລະ ລັດຖະບານ, ການຕະຫລາດ ຕິດກັບຮິດຄອງ ແລະ ປະເພນີອັນດີງາມຂອງຊາດ, ການຈໍາຫນ່າຍແບບມີສ່ວນຮ່ວມຂອງລູກຄ້າ ແລະ ຜູ້ປະກອບການ, ສຶກສາອົບຮົມ ໃຫ້ພະນັກງານ ໃຫ້ມີຄວາມຮູ້-ຄວາມສາມາດທາງດ້ານວິຊາການ, ສ້າງ ແລະ ຂະຫຍາຍກໍາລັງຂອງການຜະລິດ ໃຫ້ພຽງພໍ ແລະ ທັນສະໄຫມ, ປະສານກົມກຽວ ທ່າແຮງ ຂອງຄະນະຜູ້ບໍລິຫານພາຍໃນ ແລະ ຕ່າງປະເທດ ເພື່ອສ້າງຂໍ້ໄດ້ປຽບທາງດ້ານການແຂ່ງຂັນ, ພ້ອມທັງເອົາໃຈໃສ່ປັບປຸງຕົວເອງ ແລະ ນະວັດຕະກໍາໃຫມ່ ທັງໝົດນັ້ນເຮັດໃຫ້ມີຖານການຜະລິດ 3 ໂຮງງານ ຄື: ໂຮງງານເບຍລາວ ທີ່ນະຄອນຫລວງວຽງຈັນ, ໂຮງງານ ເບຍລາວ ທີ່ແຂວງຈໍາປາສັກ ແລະ ໂຮງງານ ເປບຊີ. ພ້ອມກັນນັ້ນ ເບຍລາວ ຍັງໄດ້ເອົາໃຈໃສ່ປະກອບສ່ວນຊຸກຍູ້ສັງຄົມ ແລະ ຮ່ວມກັບອົງການຕ່າງໆໃນການສົ່ງເສີມປູກຈິດສໍານຶກໃຫ້ສັງຄົມ ແລະ ການປົກປັກຮັກສາສິ່ງແວດລ້ອມ.
ງານຖະແຫລງຂ່າວ 45 ປີ ການດໍາເນີນທຸລະກິດ ເບຍລາວ ໄດ້ຈັດຂື້ນ ໃນວັນທີ 10 ກໍລະກົດ 2018 ທີ່ຜ່ານມາ ທີ່ບໍລິສັດເບຍລາວ ຈໍາກັດ, ໂດຍການເຂົ້າຮ່ວມ ຂອງ ທ່ານ ເຮັນຣິກ ແອນເດີເຊັນ ຜູ້ອໍານວຍການໃຫຍ່ ບໍລິສັດ ເບຍລາວ, ພ້ອມນີ້ຍັງມີ ທ່ານ ປະທານສະພາບໍລິຫານ, ທ່ານ ຮອງຜູ້ອໍານວຍການ, ພະນັກງານວິຊາການ ເຂົ້າຮ່ວມ ຢ່າງພ້ອມພຽງ.
Editor: ກຳປານາດ ລັດຖະເຮົ້າ
