ເຫັນໄດ້ເຖິງຄວາມສໍາຄັນ ຂອງວັນປ່ອຍປາ ແລະ ວັນອະນຸລັກສັດນໍ້າ-ສັດປ່າ ແຫ່ງຊາດ ວັນທີ 13 ກໍລະກົດ ເຕັມໄປດ້ວຍຄວາມຫມາຍສໍາຄັນຢ່າງຍີ່ງ ແລະ ເປັນຂະບວນການທີ່ຟົດຟື້ນທົ່ວປວງຊົນ ດັ່ງນັ້ນ, ກະຊວງກະສິກໍາ ແລະ ປ່າໄມ້ ຈິ່ງໄດ້ຮ່ວມກັບ ອົງການປົກຄອງນະຄອນຫລວງວຽງຈັນ ແລະ ສູນກາງຊາວຫນຸ່ມ ປະຊາຊົນ ປະຕິວັດລາວ ໄດ້ຈັດພິທີປ່ອຍປາ ຂື້ນທີ່ອ່າງນໍ້າຫຸມ, ເມືອງນາຊາຍທອງນະຄອນຫລວງວຽງຈັນ ເຊີ່ງໃນພິທີອັນມີຄວາມຫມາຍສໍາຄັນນີ້ ໂດຍໄດ້ຮັບກຽດເຂົ້າຮ່ວມ ຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ, ພ້ອມນີ້ຍັງມີ ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫລວງວຽງຈັນ, ທ່ານ ລຽນ ທີແກ້ວ ລັດຖະມົນຕີ ກະຊວງກະສິກໍາ ແລະ ປ່າໄມ້, ນອກນັ້ນ ຍັງມີ ເລຂາຄະນະບໍລິຫານງານຊາວຫນຸ່ມ ບັນດາຮອງເຈົ້າຄອງ, ຮອງລັດຖະມົນຕີກະຊວງ, ເຈົ້າເມືອງ, ພະແນກການທີ່ກ່ຽວຂ້ອງ, ອໍານາດການປົກຄອງ, ນັກຮຽນນັກສຶກສາ, ຊາວຫນຸ່ມ-ເຍົາວະຊົນ ແລະ ພາກສ່ວນທີ່ຕ່າງໆ ເຂົ້າຮ່ວມ ຢ່າງພ້ອມພຽງ.
ສໍາລັບປາ ທີ່ນໍາມາປ່ອຍໃນພິທີດັ່ງກ່າວ ມີຈໍານວນ 150,000 ກວ່າໂຕ, ໃນນັ້ນປະກອບດ້ວຍປາພື້ນເມືອງ ເຊັ່ນ: ປາປາກ, ປານິນ, ປາເກັດແລບ, ປາໄນ, ປາມະລິ ການ. ໃນນັ້ນ ຍັງໄດ້ນໍາເອົາພໍ່ພັນ-ແມ່ພັນປາ ມາປ່ອຍອີກ ຈໍານວນ 500 ກວ່າໂຕ ເຊັ່ນ: ປາກົດປາສ້ອຍ, ປາເຄີງ, ປາເຫມັ້ນ, ແລະ ປາຝາ ລົງສູ່ແຫລ່ງນໍ້າ-ອ່າງນໍ້າຫຸມ. ນອກຈາກປ່ອຍປາລົງສູ່ແຫລ່ງນໍ້າທໍາມະຊາດແລ້ວ ຍັງໄດ້ມີການປ່ອຍນົກ ສູ່ທໍາມະຊາດ ອີກ ຈໍານວນຫນຶ່ງ.
ການປ່ອຍປາ ຄັ້ງນີ້ ເພື່ອເປັນການອະນຸລັກຮັກສາ ແນວພັນປາ ແລະ ສັດນໍ້າຊະນິດອື່ນໆ ໃຫ້ຍືນຍົງຢູ່ຄູ່ກັບແຫລ່ງນໍ້າທໍາມະຊາດຕະຫລອດໄປ ເພື່ອຮັບປະກັນແກ່ການຄຸ້ມຄອງແຫລ້ງນໍ້າ ທີ່ເປັນບ່ອນຢູ່ອາໃສ, ເປັນບ່ອນວາງໄຂ ເພາະພັນ ລວມທັງສັດນໍ້າຊະນິດອື່ນໆ. ເຮັດໃຫ້ມີຄວາມອຸດົມສົມບູນ ທາງນິແວດທໍາມະຊາດ.
Editor: ກຳປານາດ ລັດຖະເຮົ້າ
