ວັນທີ 13 ກໍລະກົດ 2018 ຄືດັ່ງທີ່ພວກເຮົາຮູ້ນຳກັນແລ້ວວ່າ ທຳມະຊາດແມ່ນມີຄວາມໝາຍ, ຄວາມສຳຄັນ ແລະ ຈຳເປັນທີ່ສຸດຕໍ່ຊີວິດການເປັນຢູ່ຂອງຄົນເຮົາຫຼາຍທີ່ສຸດ ໂດຍສະເພາະແມ່ນເມືອງຊຳໃຕ້, ແຂວງຫົວພັນ ໄດ້ມີແມ່ນໍ້າຫຼາຍສາຍທີ່ສໍາຄັນຫຼາຍສາຍເປັນຕົ້ນ: ແມ່ນໍ້າຊໍາ, ແມ່ນ້ຳດິກ ແລະ ສາຍນໍ້າອື່ນໆ. ນອກນີ້ ທົ່ວເມືອງຊໍາໄຕ້ ຍັງສ້າງໃຫ້ມີວັງສະຫງວນທັງໝົດ 26 ແຫ່ງ, ທີ່ມີຫຼາກຫຼາຍຊະນິດພັນປາ ແລະ ຍັງມີຊະນິດປາ ທີ່ຫາຍາກຕື່ມອີກ, ນັບຕັ້ງແຕ່ໃດໆມາສັດນໍ້າແມ່ນມີບົດບາດສຳຄັນຫຼາຍ ເຊີ່ງໄດ້ກາຍເປັນແຫຼ່ງອາຫານຕົ້ນຕໍ ແລະ ເປັນແຫຼ່ງລາຍຮັບທີ່ສຳຄັນ ແກ່ປະຊາຊົນ ເຊີ່ງແມ່ນຄວາມໂຊກດີຂອງຊາວເມືອງຊຳໃຕ້. ມາເຖິງປັດຈຸບັນນີ້ຄວາມຍືນຍົງຂອງສັດນ້ຳນາໆພັນ ນັບມື້ຫຼຸດໜ້ອຍຖອຍລົງ. ມາໃນຕອນເຊົ້າຂອງວັນທີ 13 ກໍລະກົດ 2018 ເມືອງຊຳໃຕ້ ແຂວງຫົວພັນ ໄດ້ເປີດພິທີວັນປ່ອຍປາ ແລະ ວັນອະນຸລັກສັດນ້ຳ, ສັດປ່າແຫ່ງຊາດ ຂຶ້ນຢູ່ທີ່ວັງສະຫງວນ ບ້ານຖິ່ນ ແລະ ບ້ານພັນສະຫວັນຂຶ້ນຢ່າງເປັນທາງການ ໂດຍພາຍໃຕ້ການເຂົ້າຮ່ວມຂອງ ທ່ານ ໄມຫຼ້າ ພິມມະສອນ ຮອງຫົວໜ້າ ຫ້ອງການກະສິກຳ ແລະ ປ່າໄມ້ ເມືອງຊຳໃຕ້, ມີບັນດາທ່ານ ການນຳຂອງເມືອງ, ຜູ້ຕາງໜ້າພະແນກກະສິກຳ ແລະ ປ່າໄມ້ ແຂວງຫົວພັນ, ຕະຫຼອດຮອດພະນັກງານ - ລັດຖະກອນ ແລະ ອຳນາດການປົກຄອງບ້ານຖິ່ນເຂົ້າຮ່ວມຢ່າງຫຼວງຫຼາຍ.
ພິທີປ່ອຍປາໃນຄັ້ງນີ້, ມີແນວພັນປາມາປ່ອຍ ປະກອບດ້ວຍ ແນວພັນປານິນ, ປາໄນ, ປາກິນຫຍ້າ ແລະ ແນວພັນປາຫວຽດນາມ ຈຳນວນໜຶ່ງຕື່ມອີກ. ນອກຈາກນີ້ແຕ່ລະຄອບຄົວທີ່ມີເງື່ອນໄຂຍັງໄດ້ປ່ອຍປາໃສ່ນາ ແລະ ໃສໜອງ ຢ່າງເປັນຂະບວນການຟົດຟື້ນ. ທັ້ງນີ້ເພື່ອເປັນການກະກອບສ່ວນເຂົ້າໃນການອະນຸລັກສັດນໍ້າ-ສັດປ່າ ແລະ ຄືນຄວາມອຸດົມສົມບູນໃຫ້ແກ່ແຫຼ່ງນໍ້າທຳມະຊາດ ແລະ ເປັນການປູກຈິດສຳນືກໃຫ້ແກ້ຄົນລຸ້ນໃໝ່ຮູ້ຮັກທຳມະຊາດ, ມີຄວາມຮັບຜິດຊອບຕໍ່ກັບການຮັກສາສີ່ງແວດລ້ອມຕະຫຼອດໄປ
Editor: ກຳປານາດ ລັດຖະເຮົ້າ
