ກອງປະຊຸມ ການສ້າງເຄື່ອງໝາຍລວມຫມູ່ ໃຫ້ແກ່ຜູ້ປະກອບການ ພາຍໃຕ້ໂຄງການ ສ້າງຄວາມເຂັ້ມແຂງທາງດ້ານ ວຽກງານຊັບສິນທາງປັນຍາ ໃຫ້ແກ່ຂະແໜງການທ້ອງຖິ່ນ ໄດ້ໄຂຂື້ນໃນທ້າຍເດືອນມິຖຸນາ 2018 ຢູ່ທີ່ຫ້ອງປະຊຸມຂອງຫ້ອງການສຶກສາທິການ ແລະ ກິລາເມືອງຊະນະຄາມ ໂດຍພາຍໃຕ້ການເປັນປະທານ ຂອງ ທ່ານ ປອ ນາງ ຂັນທະລີ ແກ້ວບຸນພັນ, ຫົວໜ້າກົມຊັບສິນທາງປັນຍາ, ມີທ່ານ ປະເສີດ ວັນສີ ຮອງເລຂາພັກເມືອງ ປະທານ ແນວລາວສ້າງຊາດເມືອງຊະນະຄາມ ສະມາຊິກສະພາປະຊາຊົນ ແຂວງວຽງຈັນ, ມີຄະນະນຳຂັ້ນກົມ ຂັ້ນແຂວງ ຂັ້ນເມືອງ ແລະ ນັກທຸລະກິດ ຢູ່ພາຍໃນເມືອງຊະນະຄາມກໍ່ເປັນກຽດເຂົ້າຮ່ວມຢ່າງພ້ອມພຽງ.
ກອງປະຊຸມໄດ້ຮັບຟັງ ການບັນຍາຍ ຄວາມໝາຍ ແລະ ຄວາມສໍາ ຂອງວຽກງານຊັບສິນທາງປັນຍາ ທີ່ເປັນຜົນງານທີ່ໄດ້ມາຈາກສະຕິປັນຍາຂອງມະນຸດເຮົາ ເປັນຜູ້ປະດິດສ້າງ ແລະ ປະດິດຄິດແຕ່ງຂື້ນມາ, ທັງນີ້້ ກໍ່ເພື່ອສ້າງຄວາມເຂົ້າໃຈ ສ້າງຄວາມເຂັ້ມແຂງ ທາງດ້ານວິຊາການ ພະນັກງານທ້ອງຖິ່ນ ຜູ້ປະກອບການ ຂະໜາດນ້ອຍ ແລະ ກາງ (SME), ນັກທຸລະກິດ, ກຸ່ມຜະລິດ, ຊາວກະສິກອນເຫັນໄດ້ຄວາມສຳຄັນ ຂອງວຽກງານຊັບສິນທາງປັນຍາ ກໍ່ຄື ເຫັນໄດ້ຄວາມສຳຄັນ ຂອງວຽກງານຊັບສິນທາງປັນຍາ ອີກຂັ້ນໜຶ່ງ.
ນອກຈາກນີ້ ກອງປະຊຸມຍັງໄດ້ຮັບຟັງ ກ່ຽວກັບການນໍາໃຊ້ເຄື່ອງໝາຍລວມໜູ່ ຄວາມສໍາຄັນຂອງວຽກງານມາດຕະຖານ ແລະ ຄຸນນະພາບ, ຄວາມສໍາຄັນຂອງວຽກງານນິເວດ ວິທະຍາ ແລະ ເຕັກໂນໂລຊີຊີວະພາບ ໂດຍອີງຕາມການຈັດຕັ້ງປະຕິບັດ ໂຄງການດັ່ງກ່າວໃນປີ 2017 ທີ່ຜ່ານມາ ທັ່ງນີ້ ກໍ່ເພື່ອປົກປ້ອງຜົນປະໂຫຍດຂອງຜູ້ປະກອບການ, ສ້າງມູນຄ່າເພີ່ມຂອງສິນຄ້າ ແລະ ສາມາດແຂ່ງຂັນໃນຕະຫຼາດໄດ້.
Editor: ເມືອງຊະນະຄາມ
