ໃນທ້າຍເດືອນມິຖຸນາ 2018 ທີ່ຜ່ານມານີ້ ສະຫະພັນແມ່ຍິງເມືອງຊະນະຄາມ ແຂວງວຽງຈັນ ໄດ້ຈັດພິທີ ປະກາດເມືອງຊະນະຄາມ ແຂວງວຽງຈັນ ເປັນເມືອງ ສະຫະພັນແມ່ຍິງ 3 ດີ ຄັ້ງທີ່ II ໄລຍະ ປີ 2015 – 2017 ຢູ່ທີ່ສະໂມສອນໃຫຍ່ຂອງເມືອງ ໂດຍການເປັນກຽດເຂົ້າຮ່ວມຂອງ ທ່ານ ນາງ ຈັນທະບູນ ໂພສະລາດ ກຳມະການພັກແຂວງ ປະທານສະຫະພັນແມ່ຍິງ ແຂວງວຽງຈັນ, ມີ ທ່ານ ສະໝານ ວິເສດຍະພົງ ເລຂາພັກເມືອງ ເຈົ້າເມືອງ ເມືອງຊະນະຄາມ ມີຄະນະປະຈໍາພັກເມືອງ ກໍາມະການພັກເມືອງ ຫົວໜ້າຫ້ອງການ ໜ່ວຍສະຫະພັນແມ່ຍິງ ພາຍໃນກົມກອງ, ສໍານັກງານ ອົງການ ລັດວິສະຫະກິດ ໜ່ວຍສະຫະພັນແມ່ຍິງຢູ່ຮາກຖານບ້ານ ແລະ ຄະນະນໍາຂັ້ນເມືອງ ໃນ 5 ຕົວເມືອງອ້ອມຂ້າງທີ່ຖືກເຊິນກໍ່ໄດ້ເປັນກຽດເຂົ້າຮ່ວມຢ່າງພ້ອມພຽງ.
ໃນພິທີໄດ້ຮັບຟັງຜົນສໍາເລັດໃນການຈັດຕັ້ງປະຕິບັດຂໍ່້ແຂ່ງຂັນ 3 ດີ ຂອງວຽກງານສະຫະພັນແມ່ຍິງເມືອງຊະນະຄາມ ໃນໄລຍະ ປີ 2015 – 2017 ເປັນຕົ້ນມາ ຄະນະສະຫະພັນແມ່ຍິງເມື່ອງໄດ້ຊີ້ນໍາ-ນໍາພາຄະນະສະຫະພັນແມ່ຍິງແຕ່ລະຂັ້ນ ນຳເອົາຂໍ້ແຂ່ງຂັ້ນສາມດີ, ພົນລະເມືອງດີ ພັດທະນາດີ ສ້າງຄອບຄົວດີ ລົງຈັດຕັ້ງປະຕິບັດ ເຜີຍແຜ່ເຊື່ອມຊືມ ໃຫ້ສະມາຊິກ ແລະ ແມ່ຍິງບັນດາເຜົ່າ ພ້ອມດ້ວຍການຈັດຕັ້ງ ແລະ ສັງຄົມ ຢ່າງກ້ວາງຂວາງ ຕິດພັນກັບຂະບວນການຮັກຊາດ ແລະ ພັດທະນາ ການສ້າງໜ່ວຍພັກແຂ່ງຮູ້ນຳພາຮອບດ້ານ ການສ້າງບ້ານປອດຄະດີ, ບ້ານແບບຢ່າງສາທາລະນະສຸກ, ບ້ານວັດທະນະທໍາ, ບ້ານພັດທະນາ ແລະ ວຽກງານ 3 ສ້າງ ເຊິ່ງຜົນຂອງການຈັດຕົ້ງປະຕິບັດ ຄະນະສະຫະພັນແມ່ຍິງແຕ່ລະຂັ້ນໄດ້ນຳພາສະມາຊິກພາຍໃນໜ່ວຍ ພາຍໃນບ້ານ ປະເມີນຂະບວນການຂໍ້ແຂ່ງຂັ້ນ 3 ດີ ສາມາດຮັບຮອງບ້ານ ຮັບຮອງໜ່ວຍ ຄັ້ງທີ 1 ສະໄໝທີ 7 ໄດ້ 32 ບ້ານ ມີ 30 ໜ່ວຍ ຄັ້ງທີ 2 ສະໄໝທີ 7 ໄດ້ 20 ບ້ານ 21 ໜ່ວຍ ຮັບຮອງສະມາຊິກ 3 ດີ ໄດ້ 4.494 ຄົນ ຜ່ານການຈັດຕັ້ງປະຕິບັດສາມາດຕີລາຄາປະເມີນຜົນ ແລະ ສະມາຊິກບ້ານ, ໜ່ວຍ, ເມືອງ 3 ດີ ໂດຍອີງຕາມມາດຖານ ແມ່ນມີເງື່ອນໄຂ່ຄົບຖ້ວນ ແລະ ຖືກຮັບຮອງເອົາເປັນເມືອງສະຫະພັນແມ່ຍິງ 3 ດີ ໃນຄັ້ງທີ 2.
ພ້ອມນີ້ໃນພິທີຍັງໄດ້ ມີການມອບໃບຢັ້ງຢືນ ຂອງປະທານສະຫະພັນແມ່ຍິງແຂວງວຽງຈັນ ໃຫ້ແກ່ສະຫະພັນແມ່ຍິງເມືອງຊະນະຄາມ ເປັນເມືອງສະຫະພັນແມ່ຍິງ 3 ດີ ຄັ້ງທີ 2 ແລະ ມອບໃບຢັ້ງຍ້ອງຍໍຂອງທ່ານເຈົ້າເມືອງ ເມືອງຊະນະຄາມ ໃຫ້ແກ່ໜ່ວຍສະຫະພັນແມ່ຍິງຂອງເມືອງ, ບ້ານ ທີ່ຢູ່ພາຍໃນເມືອງຊະນະຄາມ ນອກຈາກນີ້ ຕອນທ້າຍຂອງພິທີຍັງໄດ້ມີການເປີດປ້າຍຮັບຮອງເອົາເມືອງຊະນະຄາມເປັນເມືອງສະຫະພັນແມ່ຍິງ 3 ດີ ຄັ້ງທີ 2 ຢ່າງເປັນທາງການ ພ້ອມທັງລັ່ນຄອງ 9 ບາດເພື່ອເປັນສິລິມຸງຄຸນໃຫ້ແກ່ພິທີດັ່ງກ່າວ.
Editor: ຕະວັນ ແສງສະຫວັນ
