ໃນທ້າຍອາທິດຜ່ານມານີ້, ຢູ່ທີ່ສະໂມສອນຫ້ອງການໄຟຟ້າເມືອງໂພນໄຊ, ແຂວງຫຼວງພະບາງ ໄດ້ຈັດພິທີມອບ-ຮັບໃບຢັ້ງຢືນເປັນໜ່ວຍພັກເຂັ້ມແຂງຮູ້ນໍາພາຮອບດ້ານຄັ້ງທີ 4 ປະຈໍາປີ 2017 ຂອງໜ່ວຍພັກຊັບພະຍາກອນທຳມະຊາດ ແລະ ສິ່ງແວດລ້ອມ ກັບ ໜ່ວຍພັກພະລັງງານ ແລະ ບໍ່ແຮ່ ໂດຍການເຂົ້າຮ່ວມຂອງສະຫາຍ ຫຸມແພງ ແກ້ວວິຈິດ ຮອງເຈົ້າເມືອງໆໂພນໄຊ, ສະຫາຍ ທອງວັນ ລິດທິວົງ ເລຂາໜ່ວຍພັກຊັບພະຍາກອນທໍາມະຊາດ ແລະ ສິງແວດລ້້ອມ ທັງເປັນໜ່ວຍພັກພະລັງງານ ແລະ ບໍ່ແຮ່, ສະຫາຍ ຄໍາກ້ຽງ ຈົ່ງຮົ່ວຖໍ່ ຫົວໜ້າຈັດຕັ້ງເມືອງໂພນໄຊ ພ້ອມດ້ວຍເລຂາ, ຮອງເລຂາໜ່ວຍພັກອ້ອມຂ້າງເມືອງ, ສະມາຊິກພັກສົມບູນ, ສໍາຮອງເຂົ້າຮ່ວມ 23 ສະຫາຍ.
ໃນພິທີສະຫາຍ ທອງວັນ ລິດທິວົງ ໄດ້ຜ່ານບົດສະຫຼຸບຕີລາຄາການປະຕິບັດແຜນການກໍ່ສ້າງໜ່ວຍພັກເຂັ້ມແຂງ-ຮູ້ນໍາພາຮອບດ້ານຂອງໜ່ວຍພັກຊັບພະຍາກອນ ແລະ ໜ່ວຍພັກບໍ່ແຮ່ ປະຈໍາປີ 2017. ໜ່ວຍພັກຊັບພະຍາກອນ ແລະ ໜ່ວຍພັກບໍ່ແຮ່ ມີຄະນະໜ່ວຍພັກ 2 ສະຫາຍ, ເລຂາ 1 ສະຫາຍ, ຮອງເລຂາ 1 ສະຫາຍ ທັງຄວບຕໍາແໜ່ງເປັນປະທານກວດກາຂອງໜ່ວຍພັກ, ປັດຈຸບັນມີສະມາຊິກພັກທັງໜົດ 12 ສະຫາຍ, ສະມາຊິກພັກສົມບູນ 11 ສະຫາຍ, ສໍາຮອງ 1 ສະຫາຍ, ປະກອບມີ 3 ຫ້ອງການຄື: ຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມ, ຫ້ອງການພະລັງງານ ແລະ ບໍ່ແຮ່, ຫ້ອງການໄປສະນີໂທລະຄົມມະນາຄົມ ແລະ ການສື່ສານ.
ຈາກນັ້ນ ສະຫາຍ ຄໍາກ້ຽງ ຈົ່ງຮົ່ວຖໍ່ ຫົວໜ້າຈັດຕັ້ງເມືອງໄດ້ຜ່ານມະຕິຕົກລົງຂອງຄະນະປະຈໍາພັກແຂວງຫຼວງພະບາງ ວ່າດ້ວຍການມອບໃບຢັ້ງຢືນໜ່ວຍພັກແຂງຮູ້ນໍາພາຮອບດ້ານ ປະຈໍາປີ 2017. ມອບໂດຍສະຫາຍ ຫຸມແພງ ແກ້ວວິຈິດ ຮອງເລຂາພັກເມືອງ-ຮອງເຈົ້າເມືອງໆໂພນໄຊ. ພ້ອມທັງໄດ້ສະແດງຄວາມຍ້ອງຍໍຊົມເຊີຍທີ່ທາງຄະນະໜ່ວຍພັກ ສາມາດຍາດມາໄດ້ໃນໄລຍະຜ່ານມາ ແລະ ການປະຕິບັດຕາມ 4 ແຂງ 5 ຮູ້ ໃຫ້ເລິກເຊິ່ງ, ຄະນະໜ່ວຍພັກ, ສະມາຊິກທຸກສະຫາຍຄວນຕັ້ງໜ້າອອກແຮງງານຄົ້ນຄ້ວາຜັນຂະຫຍາຍ ແລະ ການປະຕິບັດແນວທາງນະໂຍບາຍຂອງພັກ, ກົດໜາຍ ແລະ ລະບຽບການຕ່າງໆຂອງລັດຢ່າງເຂັ້ມງວດ, ການເຜີຍແຜ່ເຊື່ອມຊຶມບັນດາເນື້ອໃນເອກະສານ, ນິຕິກໍາຕ່າງໆໃຫ້ແກ່ສະມາຊິກພັກ ແລະ ມະຫາຊົນ. ສະຫາຍຍັງໄດ້ເນັ້ນໜັກໃຫ້ຄະນະໜ່ວຍພັກ ຕ້ອງໄດ້ສືບຕໍ່ໃນການເພີ່ມທະວີຄວາມສາມັກຄີພາຍໃນໜ່ວຍພັກໃຫ້ປອດໃສ່ເຂັ້ມແຂງ.
Editor: ນັກຂ່າວເມືອງໂພນໄຊ
