ໃນເມື່ອບໍ່ດົນນີ້ ຢູ່ທີ່ຫໍປະຊຸມໃຫ່ຍຂອງເມືອງໂພນໄຊ ແຂວງຫລວງພະບາງ ໄດ້ຈັດພິທີມອບ-ຮັບນາມມະຍົດໜ່ວຍພັກແຂງຮູ້ນໍາພາຮອບດ້ານ ຄັ້ງທີ 10 ປະຈໍາປີ 2017 ແລະ ເປີດຂະບວນການແຂ່ງຂັນຍ້ອງຍໍ ຮັກຊາດ ແລະ ພັດທະນາເຂົ້່າສູ່ລ່ວງເລິກ ໂດຍການເປັນປະທານຂອງສະຫາຍ ຫຸມແພງ ແກ້ວວິຈິດ ຮອງເຈົ້າເມືອງໆໂພນໄຊ, ສະຫາຍ ສົມຈິດ ລັດຕະນະ ຫົວໜ້າຫ້ອງວ່າການປົກຄອງເມືອງ, ມີເລຂາ, ຮອງເລຂາໜ່ວຍພັກອ້ອມເມືອງ ສະມາຊິກພັັກສົມບູນ ແລະ ສະມາຊິກພັກສໍາຮອງຢູ່ພາຍໃນໜ່ວຍພັກຂອງຕົນເອງ ເຂົ້າຮ່ວມ.
ໃນພິທີສະຫາຍ ສົມຈິດ ລັດຕະນະ ໄດ້ຜ່ານບົດສະຫຼຸບການຈັດຕັ້ງປະຕິບັດໃນການຊີ້ນໍາ-ນໍາພາຂອງໜ່ວຍພັກໃນໄລຍະ 1 ຜ່ານມາ ຄະນະໜ່ວຍພັກກໍ່ໄດ້ເອົາໃຈໃສ່ໃນການສຶກສາອົບຮົມການເມືອງ-ແນວຄິດ ເປັນຫຼັກໃຫ້ແກ່ສະມາຊິກພັກສົມບູນ ແລະ ສໍາຮອງ ພະນັກງານ-ລັດຖະກອນ ນໍາເອົາບັນດາມະຕິ, ຄໍາສັ່ງຕ່າງໆມາເຊື່ອມຊຶມຢ່າງເນື່ອງນິດລຽນຕິດໃຫ້ສະມາຊິກພັກເຂົ້າໃຈເປັນເອກະພາບ ແລະ ເຊື້ອໜັ້ນຕໍ່ການນໍາພາຂອງ ພັກ-ລັດ ມີແນວຄິດໜັກແໜ້ນມີຄວາມອຸ່ນດ່ຽງທຸ່ນທ່ຽງໃນການສ້າງສາພັດທະນາເສດຖະກິດ-ສັງຄົມ ຕັ້ງໜ້າແກ້ໄຂສະກັດກັ້ນບັນດາປະກົດການຫຍໍ້ທໍ້ຕ່າງໆ ຢູ່ໃນສັງຄົມໃຫ້ມີຄວາມສະຫົງບໂດຍພື້ນຖານ ໄດ້ເຮັດໃຫ້ພະນັກງານ, ສະມາຊິກພັກ ແລະ ມະຫາຊົນທຸກສະຫາຍມີຄຸນທາດການເມືອງໜັກແໜ້ນ, ມີຄຸນສົມບັດສີນທໍາປະຕິວັດ, ມີຄວາມຈົ່ງຮັກພັກດີຕໍ່ອຸດົມການຂອງພັກ ຮູ້ຈໍາແນກມິດສັດຕູຢ່າງຈະແຈ້ງ ມີຄວາມສາມັກຄີຊ່ວຍເຫຼືອເຊິ່ງກັນ ແລະ ກັນ ໜ່ວຍພັກກໍ່ຍັງສາມາດປະຕິບັດຕາມ 4 ແຂງຄື: ທາງດ້ານການເມືອງ, ທາງດ້ານແນວຄິດ, ທາງດ້ານການຈັດຕັ້ງ ແລະ ທາງດ້ານແບບແຜນການນໍາພາ ແລະ 5 ເນື້ອໃນ ຮູ້ນໍາພາຮອບດ້ານທາງດ້ານການເມືອງແນວຄິດ, ຮູ້ນໍາພາວຽກງານເສດຖະກິດ-ວັດທະນະທໍາສັງຄົມ, ຮູ້ນໍາພາອໍານາດການປົກຄອງ ແລະ ອົງການຈັດຕັ້ງມະຫາຊົນ, ນໍາພາວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ຮູ້ນໍາພາກໍ່ສ້າງພັກໃຫ້ປອດໃສເຂັ້ມແຂງໜັກແໜ້ນໃຫ້ແກ່ສະມາຊິກພັກໃຫ້ມີຄຸນທາດການເມືອງ, ສິນທໍາປະຕິວັດ ໄດ້ເອົາໃຈໃສ່ເຮັດວຽກງານຂະຫຍາຍພັກຖືເອົາຄຸນນະພາບເປັນກົກ ຕິດພັນກັບຂະບວນການຕ່າງໆຂອງມະຫາຊົນດີເດັ່ນ ມີມາດຖານເງື່ອນໄຂຄົບຖ້ວນເຂົ້າເປັນສະມາຊິກພັກ.
ພ້ອມກັນນັ້ນ ຍັງໄດ້ເລື່ອນມະຫາຊົນຜູ້ທີ່ກ້າວໜ້າຂຶ້ນເປັນສະມາຊິກພັກສໍາຮອງ 4 ສະຫາຍ ແລະ ເລື່ອນສະມາຊິກພັກສໍາຮອງຂຶ້ນເປັນສະມາຊິກພັກສົມບູນ 2 ສະຫາຍ, ຍິງ 1 ສະຫາຍ ໃນນັ້ນ ຍັງໄດ້ມອບນາມມະຍົດ ໜ່ວຍພັກແຂງຮູ້ນໍາພາຮອບດ້ານຂອງໜ່ວຍພັກຫ້ອງວ່າການປົກຄອງເມືອງ ມອບໂດຍສະຫາຍ ຫຸມແພງ ແກ້ວວິຈິດ ຮັບໂດຍເລຂາໜ່ວຍພັກຫ້ອງວ່າການປົກຄອງ ແລະ ໄດ້ຮ່ວມກັນຈັບມືຂໍ້ແຂ່ງຂັນຍ້ອງຍໍຮັກຊາດ ແລະ ພັດທະນາເຂົ້າສູ່ລ່ວງເລິກຂອງແຕ່ລະໜ່ວຍງານ ໃຫ້ບັນລຸຕາມລະດັບຄາດໝາຍໃຫ້ປະກົດຜົນເປັນຈິງ.
Editor: ນັກຂ່າວເມືອງໂພນໄຊ
