ໂດຍປະຕິບັດຕາມຄາດໝາຍສູ້ຊົນຂອງຫ້ອງການຊັບພະຍາກອນທໍາມະຊາດ ແລະ ສີ່ງແວດລ້ອມເມືອງ ປາກລາຍ ແຂວງໄຊຍະບູລີ ທີວາງໄວ້ ຂື້ນສໍາມະໂນຕາດິນປີ 2018 ໃຫ້ໄດ້ 1.000 ຕອນ ຂື້ນທະບຽນພິສູດຫຼັກຖານອອກໃບຕາດິນໃຫ້ໄດ້ 800 ຕອນ ດັ່ງນັ້ນ ຕອນເຊົ້າຂອງວັນທີ່ 10 ກໍລະກົດ 2018 ນີ້ ທີ່ບ້ານຫ້ວຍລາຍນ້ອຍ ເມືອງປາກລາຍ ແຂວງໄຊຍະບູລີ ໄດ້ເຜີຍແຜ່ເຊື່ອມຊືມນິຕິກໍາລະບຽບກົດໝາຍ ການກວດກາການນໍາໃຊ້ທີ່ດິນຂອງເຈົ້າຂອງສິດນໍາໃຊ້ທີ່ດິນຂື້ນ ໂດຍການເປັນປະທານຂອງທ່ານ ບຸນຫຼາຍ ວົງດາລາ, ຮອງເຈົ້າເມືອງປາກລາຍ ເຂົ້າຮ່ວມມີບັນດາຫົວໜ້າຮອງຫົວໜ້າຫ້ອງການ ອໍານາດການປົກຄອງບ້ານ ພໍ່ແມ່ປະຊາຊົນ ເຈົ້າຂອງສິດນໍາໃຊ້ທີ່ດິນ ພ້ອມດ້ວຍຂະແໜງການທີ່ກຽ່ວຂ້ອງເຂົ້າຮ່ວມ.
ໃນພິທີທ່ານ ທ່າລີ່ ສີປະເສີດ ຫົວໜ້າຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມເມືອງ ໄດ້ຂື້ນຜ່ານກົດໝາຍວ່າດ້ວຍທີ່ດິນ ເລກທີ່ 04/ສພຊ ລົງວັນທີ 21 ຕຸລາ 2003 ກົດໝາຍສະບັບນີ້ມີທັງໝົດ 6 ພາກມີ 87ມາດຕາ ກົດໝາຍສະບັບດັ່ງກ່າວແມ່ນເພື່ອກໍານົດລະບອບການຄຸ້ມຄອງ, ການປົກປັກຮັກສາ ແລະ ການນໍາໃຊ້ທີດິນໃຫ້ມີປະສິດພິຜົນຖືກຕ້ອງຕາມເປົ້າໝາຍ ແລະ ລະບຽບກົດໝາຍ ແລະ ໄດ້ຮັບຟັງການຜ່ານຂໍ້ຕົກລົງຂອງທ່ານເຈົ້າເມືອງໆປາກລາຍ ເລກທີ່ 807/ຈມປລ ວ່າດ້ວຍການເກັບຄ່າທໍານຽມ, ຄ່າບໍລິການ, ຄ່າແບບພິມວິຊາການວັດແທກດິນ 8 ປະເພດ ຕາມການຊົມໃຊທີ່ດິນ ພ້ອມທັງສ້າງເຂົ້າປື້ມສະມະໂນທີ່ດິນ ການເຜີຍແຜ່ເຊື່ອມຊືມນິຕິກໍາລະບຽບກົດໝາຍ ການກວດກາ ການນໍາໃຊ້ທີ່ດິນຂອງເຈົ້າຂອງສິດນໍາໃຊ້ທີ່ດິນໃນຄັ້ງນີ້ ແມ່ນເພື່ອເຮັດໃຫ້ພໍ່ແມ່ປະຊາຊົນພາຍໃນບ້ານຫວ້ຍລາຍນ້ອຍ ໄດ້ຮັບຮູ້ ແລະ ເຂົ້າໃຈກຽ່ວກັບກົດໝາຍທີ່ດິນໃຫ້ຫຼາຍຂື້ນ ເພື່ອເປັນບອ່ນອີງໃນການນໍາໃຊ້ຂອງເຈົ້າຂອງສິດນໍາໃຊ້ທີ່ດິນໃຫ້ໄປຕາມລະບຽບກົດໝາຍ.
ພາຍຫຼັງທີ່ໄດ້ເຊື່ມຊືມບັນດາເອກະສານດັ່ງກ່າວແລ້ວ ທາງວິຊາການຈາກຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມ ຮ່ວມກັບ ຂະແໜງການທີ່ກຽ່ວຂ້ອງຂອງເມືອງ ແມ່ນຈະໄດ້ລົງກວດກາດິນ 8 ປະເພດຕາມລະບຽບກົດໝາຍທີ່ໄດ້ກໍານົດໄ້ວໃນຂອບເຂດຄວາມຮັບຜິດຊອບຂອງບ້ານ ເຊິ່ງປະກອບມີ ດິນປຸກສ້າງ, ດິນກະສິກໍາ, ດິນອຸດສາຫະກໍາ, ດິນຄົມມະນາຄົມ, ດິນປ້ອງກັນຊາດ-ປ້ອງກັນຄວາມສະຫງົບ, ດິນວັດທະນະທໍາ, ດິນປ່າໄມ້, ແລະ ດິນບໍລິເວນແຄມແມ່ນໍ້າ ເຊີ່ງຄາດວ່າຈະໃຊ້ເວລາ 20 ກວ່າວັນຈື່ງຈະສໍາເລັດ ທັງນີ້ ກໍ່ເພື່ອເຮັດໃຫ້ດິນທຸກຕອນໃນຂອບເຂດຄວາມຮັບຜິດຊອບຂອງບ້ານ ໄດ້ຜ່ານການພິສູດຫຼັກຖານໃຫ້ໄດ້ຂື້ນສໍາມະໂນຕາດິນ ເຮັດໃຫ້ເນື້ອທີ່ດິນມີຄວາມຊັດເຈນ ແລະ ມີເອກະສານຢັ້ງຢືນອອກໃບຕາດິນແບບຖາວອນໃຫ້ກັບເຈົ້າຂອງສິດນໍາໃຊ້ທີ່ດິນ ທັງເປັນການສ້າງຖານຂໍ້ມູນໃນການເກັບພາສີທີ່ດີນ ເພື່ອມອບເຂົ້າງົບປະມານໄດ້ຢ່າງຄົບຖ້ວນ.
Editor: ເມືອງປາກລາຍ
