ກະຊວງກະສິກຳ ແລະ ປ່າໄມ້ ຮ່ວມກັບ ອົງການປົກຄອງນະຄອນຫລວງວຽງຈັນ ແລະ ສູນກາງຊາວຫນຸ່ມ ປະຊາຊົນ ປະຕິວັດລາວ ໄດ້ຈັດພິທີປ່ອຍປາລົງສູ່ອ່າງນ້ຳຫຸມ, ເມືອງນາຊາຍທອງ, ນະຄອນຫລວງວຽງຈັນ ເນື່ອງໃນວັນ ອະນຸລັກສັດນ້ຳ-ສັດປ່າ ແຫ່ງຊາດ ວັນທີ 13 ກໍລະກົດ 2018 ທີ່ໄດ້ຫມູນວຽນມາອີກວາລະຫນຶ່ງ.
ໃຫ້ກຽດເຂົ້າຮ່ວມໃນພິທີປ່ອຍປາໃນຄັ້ງນີ້ ໂດຍທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ, ທ່ານ ສິນລະວົງ ຄຸດໄພທູນ, ເຈົ້າຄອງນະຄອນຫລວງວຽງຈັນ, ທ່ານ ລຽນ ທິແກ້ວ, ລັດຖະມົນຕີກະຊວງກະສິກຳ ແລະ ປ່າໄມ້ ພ້ອມດ້ວຍບັນດາພາກສ່ວນທີ່ກ່ຽວຂ້ອງເຂົ້າຮ່ວມ.
ປາທີ່ນຳມາປ່ອຍຢູ່ອ່າງນ້ຳຫຸມ ເນື່ອງໃນວັນອະນຸລັກສັດນ້ຳ ແລະ ສັດປ່າ ແຫ່ງຊາດ ໃນປີ 2018 ນີ້ ມີຈຳນວນ 150.000 ໂຕ ໃນນັ້ນມີ ປາປາກ, ປາແກັດແລບ, ປາມາລີການ, ປານິນ, ປາໄນ ແລະ ປ່ອຍພໍ່ແມ່ພັນປາພື້ນເມືອງອີກ ຈຳນວນ 500 ໂຕ, ໃນນັ້ນ ມີ: ປາກົດ, ປາສ້ອຍ, ປາເຄິງ ແລະ ປາເຫມັ້ນ. ນອກນັ້ນ ຍັງໄດ້ປ່ອຍນົກອີກຈຳນວນຫນຶ່ງ.
ການປ່ອຍປາ ໃນຄັ້ງນີ້ ກໍ່ເພື່ອອານຸລັກຮັກສາ ຊະນິດພັນປາ ແລະ ສັດນໍ້າຊະນະນິດອື່ນໆ ໃຫ້ຍຶນຍົງຢູ່ກັບແຫຼ່ງນໍ້າທຳມະຊາດຕະຫຼອດໄປ ເພື່ອຮັບປະກັນໃຫ້ແກ່ການຄຸ້ມຄອງແຫຼ່ງທີ່ຢູ່ອາໃສ ບ່ອນວາງໄຂ່ ແລະ ບ່ອນແຜ່ພັນຂອງປາ ລວມທັງສັດນໍ້າຊະນິດອື່ນ ເພື່ອບັນລຸຄາດໝາຍ ໃຫ້ແກ່ການວາງໄຂ່ ຂອງຊະນິດພັນປາ ທີ່ຂື້ນມາປະສົມພັນ ແລະ ວາງໄຂ່ໃຫ້ມີຜົນສຳເລັດ ພ້ອມທັງເປັນບ່ອນຄໍ້າສະບຽງອາຫານໃຫ້ຫຼາຍຂື້ນ.
Editor: ຕະວັນ ແສງສະຫວັນ
