ຕາມການລາຍງານຂອງຫນັງສືພິມກອງທັບ ໃຫ້ຮູ້ວ່າ: ພິທີມອບ-ຮັບເຮືອບິນ ຮຸ່ນ ມີ-17 (MI-17) ຈໍານວນ 4 ລໍາ ໄດ້ຈັດ ຂຶ້ນໃນວັນທີ 12 ກໍລະກົດ 2018 ນີ້, ທີ່ສະໜາມບິນກອງພັນໃຫຍ່ ເຈັດສູນສາມ (703) ນະຄອນຫລວງວຽງຈັນ, ພາຍຫລັງບໍລິສັດ ຖືຮຸ້ນ ເຮລີກົບແຕ ຣັດເຊຍ ສໍາເລັດການສ້ອມແປງ. ໂດຍການໃຫ້ກຽດເຂົ້າຮ່ວມ ແລະ ເປັນປະທານຂອງ ທ່ານ ພົນຕີ ພູວົງ ວົງພົມ ຮອງລັດຖະມົນຕີກະຊວງປ້ອງກັນປະເທດ, ມີທ່ານອຸປະທູດ ຣັດເຊຍ ປະຈໍາ ສປປ ລາວ, ມີບັນດາ ຜູ້ຕາງໜ້າຈາກ 4 ກົມໃຫຍ່ ກະຊວງປ້ອງກັນປະເທດ ແລະ ກະຊວງ ປ້ອງກັນຄວາມສະຫງົບ ເຂົ້າຮ່ວມ.
ໃນພິທີທ່ານ ເຊີເກ ຢູເຊບ ປະທານບໍລິການຫລັງການຂາຍ ໄດ້ກ່າວລາຍງານຜົນສໍາເລັດ ຂອງການດໍາເນີນງານສ້ອມແປງ ພ້ອມທັງກ່າວມອບເຮືອບິນ ຈໍານວນ 4 ລໍາ ໂດຍແມ່ນ ທິມງານປະກອບເຮືອບິນຂອງ ບໍລິສັດ ຖືຮຸ້ນເຮລີກົບແຕ ຣັດເຊຍ ເຊິ່ງເປັນວິສາຫະກິດລັດທີ່ມີຊື່ສຽງດ້ານການບໍລິການຫລັງການຂາຍໃນພາກພື້ນອາຊີ-ປາ ຊີຟິກ. ປັດຈຸບັນ ມີຜູ້ນໍາໃຊ້ເຮລີກົບແຕ ທີ່ຜະລິດໂດຍຣັດເຊຍ ແລະ ສະຫະພາບໂຊວຽດ ຈໍານວນ ປະມານ 500 ລໍາ, ພວກເຮົາມີຄວາມພ້ອມທີ່ຈະຈັດຫາ, ແກ້ໄຂ, ສ້ອມແປງ ແລະ ຍົກລະດັບເຮືອບິນທຸກຮຸ່ນ ທີ່ຜະລິດໂດຍ ຣັດເຊຍ. ບໍລິສັດ ຖືຮຸ້ນເຮລີກົບແຕ ຣັດເຊຍ ແມ່ນໜຶ່ງໃນຜູ້ນໍາ ດ້ານການຜະລິດເຮືອບິນລະດັບໂລກ, ເປັນບໍລິສັດດຽວທີ່ຜະລິດ ເຮລີກົບແຕ ຢູ່ຣັດເຊຍ ສ້າງຕັ້ງ ຂຶ້ນໃນປີ 2007. ໂອກາດດຽວກັນ ທ່ານ ພົນຈັດຕະວາ ສິງສະຫວັດ ພົມມະສັກ ຮອງຫົວໜ້າ ກົມໃຫຍ່ເສນາທິການກອງທັບ ກໍໄດ້ມີຄໍາເຫັນ ກ່າວຮັບ ເຊິ່ງກ່ອນອື່ນທ່ານໄດ້ ກ່າວສະແດງຄວາມຊົມເຊີຍຕໍ່ ບັນດາສະຫາຍຮັບຜິດຊອບດໍາເນີນການສ້ອມແປງຢ່າງຕັ້ງໜ້າ ແລະ ພະນັກງານວິຊາການທຸກພາກສ່ວນທີ່ກ່ຽວຂ້ອງ ທີ່ສຸມສະຕິປັນຍາ, ເຫື່ອແຮງປະກອບກັບຄວາມຮູ້, ຄວາມສາມາດເຮັດໃຫ້ການສ້ອມແປງສໍາເລັດຜົນຕາມລະດັບຄາດໝາຍ ແລະ ສາມາດນໍາໃຊ້ໄດ້ຢ່າງເປັນປົກກະຕິ, ເຊິ່ງຜົນສໍາເລັດໃນຄັ້ງນີ້ ແມ່ນນອນໃນບັນຍາກາດທີ່ທົ່ວກອງທັບ ແລະ ປວງຊົນລາວບັນດາເຜົ່າ ພວມພ້ອມກັນອອກແຮງແຂ່ງຂັນສ້າງຜົນງານຂໍ່ານັບຮັບຕ້ອນວັນສ້າງຕັ້ງກອງທັບ ປະຊາຊົນລາວ ຄົບຮອບ 70 ປີ ໃນມໍ່ໆນີ້, ພ້ອມນັ້ນ ສາຍພົວພັນມິດຕະພາບ ແລະ ການຮ່ວມມືລະຫວ່າງສອງຊາດ, ສອງກອງທັບ ລາວ-ຣັດເຊຍ ແມ່ນມີ ມາແຕ່ດົນນານ ແລະ ກາຍເປັນມູນເຊື້ອອັນສະຫງ່າງາມ, ຕະຫລອດໄລຍະແຫ່ງການຕໍ່ສູ້ປົດປ່ອຍຊາດໃນພາລະກິດປົກປັກຮັກສາ ແລະ ພັດທະນາປະເທດ ຂອງ ສປປ ລາວ, ເວລາໃດ ພວກເຮົາກໍໄດ້ຮັບການອຸ້ມຊູມ ຊ່ວຍເຫລືອຈາກສະຫະພາບ ໂຊວຽດ ໃນເມື່ອກ່ອນ ກໍຄື ສະຫະພັນ ຣັດເຊຍ ໃນປັດຈຸບັນ. ກອງທັບປະຊາຊົນລາວ ເວລາໃດກໍຕີ ລາຄາສູງຕໍ່ຄວາມກ້າວໜ້າ ແລະ ຂະຫຍາຍຕົວດ້ານເຕັກນິກການທະຫານຂອງຣັດເຊຍ. ການມອບ-ຮັບເຮືອບິນຄັ້ງນີ້, ແມ່ນສັນຍາລັກທີ່ມີຄວາມ ໝາຍສໍາຄັນ ເພື່ອສະແດງໃຫ້ເຫັນເຖິງ ການເຕີບໃຫຍ່ຂະຫຍາຍຕົວໃນ ການພົວພັນຮ່ວມມືສະໜິດແໜ້ນ ດ້ານວຽກງານປ້ອງກັນຊາດຂອງສອງຝ່າຍ ແລະ ສະແດງ ໃຫ້ເຫັນເຖິງຄວາມໄວ້ເນື້ອເຊື່ອໃຈຂອງກອງທັບປະຊາຊົນລາວ ຕໍ່ການນໍາໃຊ້ຜະລິດຕະພັນຂອງ ສະຫະພັນ ຣັດເຊຍ. ຂ້າພະເຈົ້າ ເຊື່ອໝັ້ນວ່າ ຜົນສໍາເລັດໃນການ ສ້ອມແປງຄັ້ງນີ້ຈະເປັນການ ປະກອບສ່ວນອັນໃຫຍ່ຫລວງ ໃນການຈັດຕັ້ງປະຕິບັດສອງໜ້າທີ່ຍຸດທະສາດໃນການປົກປັກ ຮັກສາ ແລະ ພັດທະນາປະເທດຊາດ ຂອງ ສປປ ລາວ ໃນການເຮັດສໍາເລັດໜ້າທີ່ຂອງຕົນໃນສະເພາະຫນ້າ ແລະ ຍາວນານ.
ພາຍຫລັງພິທີທາງການສໍາເລັດ, ຜູ້ເຂົ້າຮ່ວມຍັງໄດ້ຊົມການ ບິນທົດລອງຈາກຈຸບິນກອງພັນ ໃຫຍ່ເຈັກສູນສາມ 703 ເຊິ່ງເຫັນວ່າບິນໄດ້ປົກກະຕິດີ. ຈາກນັ້ນ, ຜູ້ຕາງໜ້າ ຈາກກອງພັນໃຫຍ່ດັ່ງກ່າວ ແລະ ຝ່າຍບໍລິສັດ ຖືຮຸ້ນເຮລີກົບແຕ ຣັດເຊຍ ກໍໄດ້ເຊັນບົດບັນທຶກ ມອບ-ຮັບ ແລະ ມອບໃບຢັ້ງຢືນ ຕໍ່ອາຍຸການນໍາໃຊ້ເຮືອບິນຈໍານວນດັ່ງກ່າວອອກໄປອີກ 8 ປີ.

Editor: ຫນັງສືພິມກອງທັບ