ກອງປະຊຸມທາບທາມຄໍາຄິດເຫັນໃສ່ຮ່າງນິຕິກໍາລຸ່ມກົດໝາຍ ຂໍ້ຕົກລົງທ່ານເຈົ້າແຂວງວ່າດ້ວຍການຄຸ້ມຄອງການປຸກສ້າງພາຍໃນແຂວງສະຫວັນນະເຂດ ໄດ້ຈັດຂຶ້ນໃນວັນທີ 11 ກໍລະກົດ ຜ່ານມານີ້; ຢູ່ທີ່ເມືອງ ອາດສະພັງທອງ ແຂວງສະຫວັນນະເຂດ. ໂດຍການເຂົ້າຮ່ວມເປັນປະທານຂອງທ່ານ ລໍາທອງ ຂອບສີລາວົງ ເຈົ້າເມືອງໆອາດສະພັງທອງ, ທ່ານ ປະສົງສິນ ຈະເລີນສຸກ ຫົວໜ້າພະແນກໂຍທາທິການ ແລະ ຂົນສົ່ງ ແຂວງ, ມີຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າ, ຮອງຫົວໜ້າຫ້ອງການອ້ອມຂ້າງເມືອງ, ທະຫານ, ຕໍາຫຼວດ, ນາຍບ້ານໃນເທດສະບານເມືອງ ແລະ ແຂກທີ່ຖືກເຊີນຈາກເມືອງອ້ອມຂ້າງ ເຂົ້າຮ່ວມ.
ທ່ານ ປະສົງສິນ ຈະເລີນສຸກ ຫົວໜ້າພະແນກໂຍທາທິການ ແລະ ຂົນສົ່ງ ແຂວງສະຫວັນນະເຂດ ໄດ້ເຜີຍແຜ່ຮ່າງຂໍ້ຕົກລົງຂອງທ່ານເຈົ້າແຂວງສະຫວັນນະເຂດ ວ່າດ້ວຍ ການຄຸ້ມຄອງການປຸກສ້າງພາຍໃນແຂວງ ສະຫວັນນະເຂດ ສະບັບປັບປຸງສະບັບ ນີ້ ປະກອບດ້ວຍ 9 ໝວດ ຄື: ບົດບັນຍັດທົ່ວໄປ, ການກໍານົດຂອບເຂດການນໍາໃຊ້ກົດລະບຽບພື້ນທີ່ນະຄອນ ແລະ ເມືອງຕ່າງໆພາຍໃນແຂວງ ສະຫວັນນະເຂດ, ການຄຸ້ມຄອງ, ການປຸກສ້າງ, ບັນດາຂໍ້ຫ້າມ, ອົງການຄຸ້ມຄອງ ແລະ ກວດກາສິດ ແລະ ໜ້າທີ່, ການແກ້ໄຂຂໍ້ຂັດແຍ່ງ, ມາດຕະການ ແລະ ບົດບັນຍັດສຸດທ້າຍ. ເຊິ່ງປະກອບດ້ວຍກົດໝາຍ 47 ມາດຕາ.
ນອກຈາກນັ້ນ ໃນພິທີດັ່ງກ່າວ, ບັນດາທ່ານແຂກທີ່ເຂົ້າຮ່ວມ ກໍ່ຍັງໄດ້ພ້ອມກັນປະກອບຄໍາຄິດເຫັນໃສ່ຮ່າງກົດໝາຍ ຫຼື ນິຕິກໍາໃນແຕ່ລະມາດຕາ. ເພື່ອເຮັດໃຫ້ຮ່າງກົດໝາຍສະບັບນີ້; ຖືກຕ້ອງສອດຄ່ອງ ແລະ ມີຄວາມຮັດກຸມຂຶ້ນກວ່າເກົ່າ ແລະ ໄດ້ຮັບຜົນດີໃນການນໍາລົງໄປຈັດຕັ້ງປະຕິບັດຕໍ່ກຸ່ມບ້ານ, ບ້ານ ໃຫ້ມີຜົນສັກສິດຂຶ້ນຕື່ມ.
Editor: ນັກຂ່າວເມືອງອາດສະພັງທອງ
