ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ເນັ້ນໃຫ້ບໍລິສັດ ບົວລະພາ ກະສິກໍາ-ປ່າໄມ້ ເອົາໃຈໃສ່ສຸ້ມໃສ່ປູກໄມ້ ເພື່ອເປັນສິນຄ້າໃຫ້ຫຼາຍຂຶ້ນ, ພ້ອມດຽວກັນ ກໍ່ສະເໜີໃຫ້ບໍລິສັດຄົ້ນຄວ້າທ່າແຮງ ເພື່ອຂຶ້ນເກັບກຳຂໍ້ມູນສວນໄມ້ສັກ ຂອງປະຊາຊົນຢູ່ບັນດາແຂວງພາກເໜືອ ເຖິງຄວາມເປັນໄປໄດ້ ໃນການນໍາມາປຸງແຕ່ງໃນໂຮງງານຂອງຕົນເພື່ອສົ່ງອອກ.
ຄຳເວົ້າດັ່ງກ່າວ ໄດ້ກ່າວໃນການເຂົ້າຮ່ວມພິທີປູກຕົ້ນໄມ້ ແລະ ລົງຊຸກຍູ້ການຜະລິດຂອງໂຮງງານປຸງແຕ່ງໄມ້ ຂອງບໍລິສັດ ບົວລະພາໃນວັນທີ 14 ກໍລະກົດ 2018 ທີ່ບ້ານແສນອຸດົມ ເມືອງໄຊທານີ ນະຄອນຫຼວງວຽງຈັນ ໂດຍການເຂົ້າຮ່ວມຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ມີຮອງລັດຖະມົນຕີກະຊວງກະສິກໍາ ແລະ ປ່າໄມ້, ກະຊວງແຜນການ ແລະ ການລົງທຶນ, ສູນກາງຊາວໜຸ່ມ, ບັນດາເຈົ້າເມືອງ ຄະນະອໍານວຍການບໍລິສັດ ບົວລະພາ ພ້ອມພະນັກງານທັງພາກລັດ - ບໍລິສັດເຂົ້າຮ່ວມ.
ພາຍຫຼັງສໍາເລັດພິທີປູກໄມ້ ທ່ານ ຮອງນາຍົກລັດຖະມົນຕີ ພ້ອມຄະນະ ໄດ້ຢ້ຽມຊົມໂຮງງານປຸງແຕ່ງໄມ້, ສ່ວນປູກໄມ້, ສວນກ້າເບ້ຍໄມ້ຂອງບໍລິສັດ ບົວລະພາ ແລະ ທ່ານໄດ້ມີຄໍາເຫັນ ເພື່ອໃຫ້ບໍລິສັດ ບົວລະພາ ກະສິກໍາ-ປ່າໄມ້ ເປັນທິດທາງໃນການດໍາເນີນທຸລະກິດ ຊຶ່ງທ່ານໄດ້ກ່າວວ່າ: ບໍລິສັດ ບົວລະພາ ເປັນບໍລິສັດໜຶ່ງ ທີ່ປະຕິບັດຍຸດທະສາດ ການປົກຫຸ້ມປ່າໄມ້ ຕິດພັນກັບ ການນໍາໃຊ້ໄມ້ທີ່ບໍ່ບົກແຫ້ງ (ໄມ້ປູກ) ອັນນີ້ ກໍ່ຖືກຢູ່ໃນນະໂຍບາຍພັດທະນາຍືນຍົງສີຂຽວຂອງລັດຖະບານ ເປັນທ່າອ່ຽງພັດທະນາຂອງຍຸກສະໄໝ ໂດຍສະເພາະແມ່ນວາລະຂອງ ການພັດທະນາຮອດປີ 2030 ທີ່ສະຫະປະຊາຊາດໄດ້ຮັບຮອງແລ້ວ. ເຖິງວ່າວັນປູກຕົ້ນໄມ້ແຫ່ງຊາດ (1ມິຖຸນາ 2018) ຈະຜ່ານມາ ແຕ່ໃນຄວາມໝາຍບໍ່ແມ່ນຈະປູກແຕ່ໃນວັນທີ 1 ມິຖຸນາເທົ່ານັ້ນ ເພື່ອບັນລຸຍຸດທະສາດການປົກຫຸ້ມປ່າໄມ້ໃຫ້ໄດ້ 70% ໃນປີິ 2020 ຕ້ອງໄດ້ປູກໄມ້ຕະຫຼອດ ໂດຍສະເພາະໃນບ່ອນທີ່ມີເງື່ອນໄຂ.
ຜ່ານມາໄດ້ໄປຢ້ຽມຢາມສະຖານທີ່ປູກໄມ້ ຂອງບໍລິສັດ ບົວລະພາ ຢູ່ເມືອງຫີນເຫີບ ແຂວງວຽງຈັນ ກໍ່ຖືວ່າໄມ້ທີ່ບໍລິສັດປູກ ເປັນໄມ້ທີ່ໃຫຍ່ໄວ ຄຽງຄູ່ກັນນັ້ນ ບໍລິສັດກໍ່ມີການປຸງແຕ່ງເພື່ອສົ່ງອອກ ສ້າງລາຍຮັບໃຫ້ບໍລິສັດ ປະກອບສ່ວນລາຍຮັບໃຫ້ງົບປະມານແຫ່ງລັດ ສ້າງວຽກເຮັດງານທໍາໃຫ້ພໍ່ແມ່ປະຊາຊົນ ລວມທັງສ້າງຊື່ສຽງໃຫ້ແກ່ປະເທດພວກເຮົາ ໃນການສົ່ງຂາຍຜະລິດຕະພັນອອກຕະຫຼາດສາກົນ. ຖ້າມາເບິ່ງແລ້ວຢູ່ປະເທດເຮົາ ຖ້າສຸມໃສ່ການພັດທະນາຜະລິດໄມ້ເປັນສິນຄ້າກໍ່ຖືວ່າສ້າງຄວາມຮັ່ງມີໄດ້. ມີຫຼາຍນັກເສດຖະກິດຫຼາຍທ່ານ ໄດ້ຕີລາຄາວ່າ ປະເທດເຮົາ ອາໄສປູກແຕ່ໄມ້ກໍ່ສາມາດສ້າງລາຍຮັບມະຫາສານ ການປູກໄມ້ຖືກຕ້ອງກັບທ່າແຮງການພັດທະນາໃນຍຸກສະໄໝໃໝ່.
ຜ່ານມາລັດຖະບານ ກໍ່ໄດ້ມີແນວທາງ ເພື່ອຈໍາກັດການນໍາໃຊ້ໄມ້ທໍາມະຊາດ ໃຫ້ຫຼຸດລົງເທື່ອລະນ້ອຍ ເຊິ່ງປັດຈຸບັນ ລັດຖະບານບໍ່ໄດ້ອະນຸຍາດໂກຕ້າຂຸດຄົ້ນໄມ້ທໍາມະຊາດແລ້ວ ເຊິ່ງລັດຖະບານອະນຸຍາດໃຫ້ຂຸດຄົ້ນໃນເຂດ ພັດທະນາເທົ່ານັ້ນ ເປັນຕົ້ນແມ່ນ ແລວທາງ, ແລວສາຍສົ່ງໄຟຟ້າ, ໂຄງການແຮ່ທາດ ແລະ ເຂື່ອນໄຟຟ້າ.
ແນ່ນອນ ກ່ອນຈະມີຜົນສໍາເລັດດັ່ງກ່າວ ກໍ່ມີຄວາມຫຍຸ່ງຍາກ ດັ່ງທີ່ບໍລິສັດເຄີຍສະເຫນີມາ ທາງລັດຖະບານ ໂດຍສະເພາະ ການສົ່ງອອກ ເຊິ່ງລັດຖະບານ ກໍ່ໄດ້ມີການຄົ້ນຄວ້າ ໃຫ້ມີຄວາມສອດຄ່ອງຕົວຈິງ ເຊິ່ງປັດຈຸບັນ ພວກເຮົາ ພັດທະນາໄປຕາມກົນໄກການຕະຫຼາດ ຈຸດໜັກ ຕ້ອງໄດ້ເອົາມູນຄ່າສິນຄ້າທີ່ສົ່ງອອກເປັນຫຼັກ ເພາະມູນຄ່າສູງ ຈະສ້າງລາຍຮັບສູງຂຶ້ນເຊັ່ນກັນ.
ພ້ອມນັ້ນ ນອກຈາກສົ່ງເສີມການປູກໄມ້ວີກແລ້ວ ກໍ່ຂໍໃຫ້ ບໍລິສັດ ບົວລະພາ ໄປສືກສາ ເບິ່ງທ່າແຮງໄມ້ສັກຢູ່ບັນດາແຂວງພາກເໜືອ ເປັນຕົ້ນແມ່ນ ແຂວງຫຼວງພະບາງ - ໄຊຍະບູລີ ທີ່ມີໄມ້ສັກຈໍານວນຫຼາຍ ເຮັດແນວໃດ ເພື່ອເພີ່ມມູນຄ່າໃຫ້ປະຊາຊົນ. ສະເໜີ ໃຫ້ບໍລິສັດໄປກວດເບິ່ງໄມ້ຕົວຈິງ ອັນໃດສາມາດຊື້ມາເພື່ອປຸງແຕ່ງຜະລິດສົ່ງອອກ ຫຼື ສ່ວນໃດທີ່ຍັງບໍ່ສາມາດຕັດກໍ່ໃຫ້ຮັກສາໄວ້ກ່ອນ ຫຼື ອາດຈະມີຂັນຕອນອື່ນໆ ເພື່ອໃຫ້ໄດ້ຜົນປະໂຫຍດທັງສອງຝ່າຍ.
ສ່ວນກົນໄກການຄຸ້ມຄອງຕ່າງໆ - ການສົ່ງອອກ ພວກເຮົາຍັງຕ້ອງໄດ້ປືກສາຫາລືກັນກັບຂະແໜງການກ່ຽວຂ້ອງ ເພື່ອຊ່ວຍຜູ້ຜະລິດພາຍໃນ ເຊິ່ງໃນຕໍ່ໜ້າ ລັດຖະບານກໍ່ຈະໄດ້ລົງໄປພົບແຕ່ລະຂະແໜງການ, ແຕ່ລະສະມາຄົມຕື່ມ ເພື່ອໃຫ້ລົງເລີກເຂົ້າບັນຫາຕົວຈິງ ເຊື່ອແນ່ວ່າຖ້າພົບປະສະເພາະແຕ່ລະຂະແໜງການພັດທະນາ ຈະມີທາງອອກທີ່ດີໃນຕໍ່ໜ້າ ນີ້ຄືຄຳກ່າວທ່ານຮອງນາຍົກກ່າວ..

Editor: ຕະວັນ ແສງສະຫວັນ