ເພື່ອສືບຕໍ່ຈັດຕັ້ງປະຕິບັດ ແລະ ຜັນຂະຫຍາຍ ຂໍ້ແຂງຂັນ ໃນການສ້າງຂະບວນການ ຮັກຊາດ ພັດທະນາ ແລະ ເພື່ອຕ້ອນຮັບວັນສຳຄັນຂອງຊາດ ເປັນຕົ້ນວັນອະນຸລັກສັດນ້ຳ-ສັດປ່າ, ດັ່ງນັ້ນ ໃນວັນ ທີ 17 ກໍລະກົດ ທີ່ຜ່ານມາ ຢູ່ທີ່ວັງສະຫງວນ ຂອງບ້ານ ນາພະນັງ ເມືອງບົວລະພາ ແຂວງຄໍາມ່ວນ (ວັງຫ້ວຍຊູນ) ຫ້ອງການກະສິກຳແລະ ປ່າໄມ້ ເມືອງບົວລະພາ ສົມທົບກັບ ອຳນາດການ ປົກຄອງເມືອງບົວລະພາ ໄດ້ຈັດພິທີ ປ່ອຍປາ ໃນວັນອະນຸລັກສັດນ້ຳ ແລະ ສັດປ່າແຫ່ງຊາດ (ວັນທີ 13 ກໍລະກົດ) ຂອງທຸກໆປິ ເຂົ້າຮ່ວມໃນພິທີມີທ່ານ ຄັນທະລັງສີ ໄຊຍະລາດ ຮອງເຈົ້າເມືອງບົວລະພາ ພ້ອມດ້ວຍບັນດາຄະນະບໍລິຫານງານພັກເມືອງ, ຫົວໜ້າ ຮອງຫົວຫ້ອງການ ພະນັກງານ ວິຊາການ ການຈັດຕັ້ງບ້ານເຂົ້າຮ່ວມ.
ພິທີດັ່ງກ່າວ ທ່ານ ຄໍາຮູ້ ວົງພະຈັນ ຫົວໜ້າຫ້ອງການ ກະສິກໍາ ແລະ ປ່າໄມ້ເມືອງ ກໍ່ໄດ້ຜ່ານ ປະຫວັດຄວາມເປັນມາ, ຄວາມສໍາຄັນຂອງວັນປ່ອຍປາແຫ່ງຊາດ ແລະ ເພື່ອເປັນການປົກປັກຮັກສັດນໍ້າ-ສັດປ່າ ຈາກນັ້ນ ທ່ານ ຄັນທະລັງສີ ໄຊຍະລາດ ຮອງ ເຈົ້າເມືອງໆບົວລະພາ ກໍ່ໄດ້ມີຄຳເຫັນ ກຽ່ວກັບຄວາມເປັນມາ ຂອງວັນປ່ອຍປາ ແລະ ອານຸລັກສັດນໍ້າ-ສັດປ່າແຫ່ງຊາດ ພ້ອມທັງ ຮຽກຮ້ອງໃຫ້ ທຸກພາກສ່ວນ ຊ່ວຍກັນ ປົກປັກຮັກສາສັດນໍ້າ-ສັດປ່າ ຫຼີກລຽ້ງວິທີຫາປາ ແບບຜິດກົດໜາຍ ເຊັ່ນການຊອດປາ, ໃຊ້ລະເບີດ ແລະ ໃຊ້ທາດເບື່ອປາ ແບບຜິດກົດໜາຍ ເພື່ອໃຫ້ຄົງຢູ່ກັບລູກຫຼານຂອງພວກເຮົາຕະຫຼອດໄປ ເຊິ່ງ ປາທີ່ນຳມາປ່ອຍໃນຄັ້ງນີ້ ມີ ປານິນ, ປາປາກ ປາກິນຫຍ້າ ຈໍານວນ 20,000 ກວ່າໂຕ ເຊິ່ງປາດັ່ງກ່າວແມ່ນໄດ້ຮັບການສະໜັບສະໜູນຈາກໂຄງການ ປ່າສະຫງວນແຫ່ງຊາດ ພູຫີນໜາມໜໍ່ ແລະ ປ່າປ້ອງກັນພູຫີນເຫລັກໄຟ.

Editor: ນັກຂ່າວເມືອງບົວລະພາ