ພິທີເປີດບໍລິການຮ້ານຄ້າ ຕັງຈະເລີນ ໂຮມສະໂຕ ສາຂາດອນຫນູນ ເມືອງໄຊທານີ ນະຄອນຫລວງວຽງຈັນ ໄດ້ຈັດຂື້ນໃນວັນທີ 9 ກັນຍາ 2018 ທີ່ຜ່ານມາ ຢູ່ທີ່ຮ້ານຄ້າດັ່ງກ່າວ ໂດຍໃນພິທີເປີດ ແມ່ນໄດ້ຮັບກຽດເຂົ້າຮ່ວມ ຂອງ ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫລວງວຽງຈັນ, ມີ ທ່ານ ຈັນທະລາ ອິນທະລັງສີ ເຈົ້າເມືອງໄຊທານີ ມີບັນດາພະແນກການກ່ຽວຂ້ອງ, ບັນດາຄະນະຜູ້ບໍລິຫານບໍລິສັດ ຕັງຈະເລີນ ຈໍາກັດ, ລວມທັງແຂກຖືກເຊີນ ພາຍໃນ ແລະ ຕ່າງປະເທດ ເຂົ້າຮ່ວມ ຈໍານວນຫລາຍ.
ງານເລີມຕົ້ນດ້ວຍການສະແດງສີລະປະ ແລະ ການເຕັ້ນໂຊ ເປີດງານ ຫລັງຈາກນັ້ນ ທ່ານ ຮົວ ແສງອາລຸນ ປະທານກຸ່ມບໍລິສັດ ຕັງຈະເລີນ ຈໍາກັດ, ໄດ້ຂື້ນກ່າວວ່າ: ດ້ວຍຈຸດປະສົງໃນການຍາກເປັນສ່ວນຫນຶ່ງຂອງການພັດທະນາເສດຖະກິດ-ສັງຄົມແຫ່ງຊາດ, ເວົ້າລວມ-ເວົ້າສະເພາະ ການພັດທະນາເສດຖະກິດ ນະຄອນຫລວງວຽງຈັນ ເປັນສ່ວນຫນຶ່ງໃນການຫລຸດຜ່ອນຄວາມແອອັດຂອງການຄົມມະນາຄົມ ເຂົ້າອອກຕົວເມືອງ ແລະ ສ້າງຄວາມສະດວກສະບາຍແກ່ລຸກຄ້າໃຫ້ຫລາຍຂື້ນ ຕັງຈະເລີນຈິ່ງໄດ້ລົງທຶນກໍ່ສ້າງ ຕັງຈະເລີນໂຮມສະໂຕ ແຫ່ງນີ້ຂື້ນ. ກາຍເປັນສູນບໍລິການ-ຈໍາຫນ່າຍອຸປະກອນວັດສະດຸກໍ່ສ້າງ, ເຄື່ອງຮັບໃຊ້ຄົວເຮືອນ, ເຄື່ອງຈັກ ແລະ ເຄື່ອງໃຊ້ໄຟຟ້າ ທີ່ມີຄຸນນະພາບ ມາດຕະຖານສາກົນ ເພື່ອໃຫ້ບໍລິການແກ່ປະຊາຊົນ ຊາວນະຄອນຫລວງວຽງຈັນ ກໍ່ຄືເຂດອື່ນໆ ທີ່ເປັນທາງເລືອກໃຫມ່ ມີສິນຄ້າຢ່າງພຽງພໍ. ພ້ອມກັນນັ້ນ ຍັງມີສະຖານທີ່ກວ້າງຂວາງ, ບ່ອນຈອດລົດສະດວກສະບາຍ ຕັງຈະເລີນໂຮມສະໂຕ ໄດ້ເລີ່ມສ້າງຕັ້ງມາແຕ່ປີ 1980 ແລະ ໄດ້ເຕີບໂຕມາຢ່າງຕໍ່ເນື່ອງໃນຫລາຍດ້ານ ຟດຍສະເພາະທຸລະກິດບໍລິການຮ້ານຄ້າ, ມື້ນີ້ແມ່ນພ້ອມແລ້ວ ໃນການຕອບສະຫນອງລຸກຄ້າ ແລະ ຮອງຮັບການຂະຫຍາຍຕົວຂອງເສດຖະກິດ ໂດຍລວມ ໃນນະຄອນຫລວງວຽງຈັນ ເພື່ອຮອງຮັບທຸກຄວາມຕ້ອງການ ແລະ ຄວາມສຸກຂອງທຸກຄົນ ໃຫ້ສົມກັບຄໍາຂວັນທີ່ວ່າ: ສະດວກ ຄົບຖ້ວນ ບໍລິການປະທັບໃຈ.
ໂຄງການກໍ່ສ້າງນີ້ ແມ່ນໄລຍະທີ 1 ຂອງການລົງທຶນ ເຊີ່ງສໍາເລັດແລ້ວໂດຍພື້ນຖານ ແລະ ທ້າຍປີ 2018 ແມ່ນຈະສຶບຕໍ່ໂຄງການໄລຍະ 2 ຄື: ສູນການຄ້າ Friendship Supermart ຂາຍເຄື່ອງອຸປະໂພກ-ບໍລິໂພກ ເຄື່ອງໃຊ້ຄົວເຮືອນ ແລະ ສູນອາຫານ ຮັບໃຊ້ປະຊາຊົນ ກຸ່ມບໍລິສັດຕັງຈະເລີນ ປະກອບດ້ວຍຫລາຍກິດຈະການ ປະກອບສ່ວນແກ່ສັງຄົມ ແລະ ສາມາດສ້າງວຽກເຮັດງານທໍາ ໃຫ້ຄົນລາວ ຫລາຍກວ່າ 2 ພັນຄົນ. ຕັງຈະເລີນ ໂຮມສະໂຕ ສາຂາດອນຫນູນ ແມ່ນເປັນສ່ວນຫນຶ່ງຂອງກຸ່ມບໍລິສັດຕັງຈະເລີນ ຈໍາກັດ ແລະ ເປັນສາຂາທີ 2 ຖັດຈາກສາຂາ ນະຄອນປາກເຊ ເຊີ່ງໄດ້ທົດລອງເປີດມາກ່ອນຫນ້ານີ້ແລ້ວ ໄລຍະຫນຶ່ງ ພ້ອມທັງມີການປັບປຸງ ແລະ ແກ້ໄຊ ເພື່ອໃຫ້ມີຄວາມສອດຄ່ອງ ຈົນພ້ອມເປີດໃຫ້ບໍລິການ ຢ່າງເປັນທາງການ.
ໂອກາດນີ້, ທ່ານ ເຈົ້າຄອງ ພ້ອມດ້ວຍຄະນະປະທານ ໄດ້ເລາະຢ້ຽມຊົມສິນຄ້າພາຍໃນຮ້ານຄ້າ ຕັງຈະເລີນ
ໃນໂອກາດເປີດໃຫ້ບໍລິການ ຢ່າງເປັນທາງການ ຮ້ານຄ້າ ຕັງຈະເລີນ ໂຮມສະໂຕ ຍັງໄດ້ມີການຈັດຄອນເສີດ ໂດຍໄດ້ເຊື້ອເຊີນເອົາສີລະປິນ ທັງພາຍໃນ ແລະ ເພື່ອນບ້ານ ນອກຈາກນັ້ນ ຍັງໄດ້ມີການແຈກໂຊກ ໂດຍການຈັບສະຫລາກ ມອບໂຊກແກ່ລູກຄ້າ ເຊີ່ງມີລາງວັນໃຫຍ່ ລົດເກັງ ມາສດາ ພ້ອມດ້ວຍລາງວັນອື່ນໆຢ່າງຫລວງຫລາຍ ແລະ ມາໃນວັນທີ 10 ກັນຍາ 2018 ທີ່ຮ້ານຄ້າຕັງຈະເລີນ ໂຮມສະໂຕ ສາຂາດອນຫນູນ ຍັງໄດ້ມີພິທີມອບ-ຮັບລົດເກງ ເຊີ່ງເປັນລາງວັນໃຫຍ່ ໃຫ້ແກ່ລູກຄ້າຜູ້ໂຊກດີ ທີ່ໄດ້ຈັບສະຫລາກ ເຊີ່ງຜູ້ໂຊກດີທີ່ວ່າ ມີຊື່ວ່າ ທ່ານ ທອງສະນິດ ອົງແກ້ວບຸນມີ ບ້ານວັງຫລວງ, ເມືອງລ່ອງຊານ, ແຂວງໄຊສົມບູນ
Editor: ກຳປານາດ ລັດຖະເຮົ້າ
