ເມື່ອບໍ່ດົນມານີ້, ຄະນະກົມມໍລະດົກ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຮ່ວມກັບ ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ ໄດ້ລົງກວດກາຕິດຕາມສໍາຫລວດເບີ່ງ ໄຫຫີນ ແຫລ່ງທີ 42 ແລະ ແຫລ່ງທີ 23 ເພື່ອກະກຽມຄວາມພ້ອມເອົາແຫຼ່ງໄຫຫີນເຂົ້າເປັນມໍລະດົກໂລກ ທີ່ເຂດເມືອງຄຳ ແຂວງຊຽງຂວາງ. ໂດຍມີ ທ່ານ ຄຳໃບ ໂພທິສານ ຫົວໜ້າກົມມໍລະດົກ ກະຊວງຖະແຫຼງ ຂ່າວ, ວັດທະນະທຳ ແລະ ທ່ອງທ່ຽວ, ມີ ທ່ານ ວົງສາ ດວງທອງລາ ຫົວໜ້າ ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງຊຽງຂວາງ ມີທີມງານກົມມໍລະໂດກຂັ້ນກົມ, ຂັ້ນແຂວງ, ຂັ້ນເມືອງ ລວມທັງຫນ່ວຍງານມໍລະດົກ ເຂົ້າຮ່ວມ.
ເພື່ອເປັນການກະກຽມຄວາມພ້ອມໃຫ້ແກ່ໄຫຫີນ ແຫຼ່ງທີ 42 ພູຊ້າງ ແລະ ແຫຼ່ງທີ່ 23 ບ້ານ້ຳຮົ່ມ ເມືອງຄຳ ແຂວງຊຽງຂວາງ ເພື່ອຕ້ອນຮັບຊ່ຽວຊານ ICOMOS ທີ່ຈະລົງມາກວດກາ ແລະ ສະເໜີເອົາແຫຼ່ງໄຫຫີນເຂົ້າເປັນມໍລະດົກໂລກ. ນອກຈາກນັ້ນທາງທີມງານກົມມໍລະດົກ ກໍ່ໄດ້ລາຍງານສະພາບໃຫ້ແກ່ ທ່ານ ມີໄຊ ແພງສາ ຮອງເລຂາພັກເມືອງ ຮອງເຈົ້າເມືອງ-ເມືອງຄຳ. ເຊີ່ງ ທ່ານ ຄໍາໃບ ໂພທິສານ ຫົວໜ້າກົມມໍລະດົກ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ກໍ່ໄດ້ລາຍງານວ່າ: ຜ່ານການລົງຕິດຕາມໄຫຫີນແຫຼ່ງທີ 42 ພູຊ້າງ ແລະ ແຫຼ່ງທີ 23 ບ້ານນ້ຳຮົ່ມ ສາມາດສະຫຼຸບປະເມີນຜົນໄດ້ ເຊັ່ນ: ແຜນຈະໄດ້ອານາໄມ້ຕັດຕົ້ນໄມ້ນ້ອຍ ລຽບຕາມເສັ້ນທາງຂື້ນໄປຫາໄຫຫີນ, ເຮັດຂັ້ນໃດ, ເຮັດຮາວຈັບໃນບາງຕອນ ໃນຈຸດທີ່ມີ ຄວາມຊັນຂື້ນໄປຫາ 4 ກຸ່ມໄຫຫີນ ກ້ວາງປະມານ 2 ແມັດ, ໂດຍກຳນົດເອົາ ຕາມເສັ້ນທາງເກົ່າ ແລະ ອະນາໄມພາຍໃນຂອບເຂດໄຫຫີນ, ອະນາໄມ ວັດສະພື້ດ ທີ່ອາໃສຢູ່ໜ່ວຍໄຫຫີນໃຫ້ສະອາດສວຍສົດງົດງາມ ແລະ ກຳນົດເສັ້ນທາງຍ່າງ ລຽບຕາມໄຫຫີນໃນ ໄລຍະຫ່າງ 1 ແມັດ, ພ້ອມທັງເຮັດຮົ້ວອ້ອມຕາມແຫຼ່ງໄຫຫີນ ດັ່ງກ່າວ, ເນື້ອງໃນໂອກາດດັ່ງກ່າວ ທ່ານ ມີໄຊ ແພງສາ ຮອງເລຂາພັກເມືອງ ຮອງເຈົ້າເມືອງ-ເມືອງຄຳ ກໍ່ໄດ້ໂອ້ລົມໃຫ້ຄຳຄິດຄຳເຫັນ ກ່ອນອື່ນໝົດທ່ານຍັງໄດ້ກ່າວ ຍ້ອງຍໍຊົມເຊີຍຕໍ່ກັບຜົນງານໃນຄັ້ງນີ້ ພ້ອມທັງໃຫ້ທິດຊີ້ນຳແກ່ຄະນະທີມງານຈົ່ງພ້ອມກັນ ສ້າງແຜນສືບຕໍ່ຈັດຕັ້ງປະຕິບັດ ໃຫ້ໄດ້ສຳເລັດໃນການກະກຽມຄວາມພ້ອມເອົາແຫຼ່ງໄຫຫີນ ທີ 42 ພູຊ້າງ ແລະ ແຫຼ່ງໄຫຫີນ 23 ບ້ານນ້ຳຮົ່ມ ເຂົ້າເປັນມໍລະດົກໂລກ.
Editor: ກຳປານາດ ລັດຖະເຮົ້າ
