ວັນທີ 11 ກັນຍາ 2018 ນີ້, ທ່ານ ວົງໄຊ ໄຊຍະຈັກ ເລຂາພັກເມືອງ, ເຈົ້າເມືອງເຊໂປນພ້ອມຄະນະການນໍາຂອງເມືອງ ແລະ ສະມາຊີກສະພາປະຊາຊົນ ແຂວງສະຫວັນນະເຂດ ເຂດເລືອກຕັ້ງ 13 ປະຈໍາເມືອງເຊໂປນ ໄດ້ຕ້ອນຮັບ ທ່ານ ພົນໂທ ແສງນວນ ໄຊຍະລາດ ຄະນະເລຂາທິການສູນກາງພັກ, ຮອງປະທານສະພາແຫ່ງຊາດ ຊຸດທີ 8 ພ້ອມຄະນະທິມງານດ້ວຍໄມຕິຈິດອັນອົບອຸ່ນ,ຈາກນັ້ນ ທ່ານ ພ້ອມທິມງານກໍ່ໄດ້ເຂົ້າຢ້ຽມຢາມ ບໍລິສັດ ຊັນເປເປີ້ ຊື່ງໄດ້ຮັບການຕ້ອນຮັບເປັນຢ່າງດີ ຈາກທ່ານ ເສີນເວີນຈຸນ ອໍານວຍການບໍລິສັດ ພ້ອມຄະນະ ແລະ ໄດ້ນໍາພາທ່ານ ພ້ອມທິມງານເລາະຢ້ຽມຄວາມຄືບໜ້າຂອງ ບໍລິສັດ ຂັ້ນຕອນວີທີການຕ່າງໆໂດຍສະເພາະຂັ້ນຕອນການຜະລິດເຫຍື້ອເຈັ້ຍ, ບໍລິສັດ ດັ່ງກ່າວແມ່ນສ້າງຕັ້ງຂື້ນໃນວັນທີ 18 ມັງກອນ 2017 ມາຮອດປະຈຸບັນແມ່ນສໍາເລັດແລ້ວ 90% ແລະ ເລີ່ມການຜະລິດທົດລອງເຫຍື້ອເຈັ້ຍໃນໄລຍະ 3 ເດືອນ(20ພຶດສະພາຫາ20ສີງຫາ) ແມ່ນຜະລິດເຫຍື້ອເຈັ້ຍໄດ້ 80,000 ໂຕນ, ຫລັງຈາກນັ້ນ ກໍ່ໄດ້ເຂົ້າຮ່ວມປືກສາຫາລືຄົ້ນຄວ້າເຈາະຈີ້ມບັນຫາຕ່າງໆທີ່ຄົງຄ້າງມາປັບປຸງແກ້ໄຂ ລະຫວ່າງ ພາກລັດກັບບໍລິສັດຊື່ງໃນນັ້ນທາງບໍລິສັດໄດ້ຊີ້ແຈ່ງຫລາຍບັນຫາໂດຍສະເພາະບັນຫາເລື່ອງກິ່ນເໜັນມົນລະພິດທາງນໍ້າ, ທາງອາກາດແມ່ນທາງບໍລິສັດ ໄດ້ມີການປັບປຸງຫລາຍດ້ານຊື່ງໃນນັ້ນແມ່ນການບໍາບັດນໍ້າເສຍ, ບ່ອນຖີ້ມສີ່ງເສດເຫລືອ ແລະ ອື່ນໆ, ບັນຫາການເກັບຊື້ໄມ້ໂດຍບໍ່ໃຫ້ມີນາຍໜ້າ, ການເກັບຊື້ໄມ້ທໍາມະຊາດແມ່ນທາງບໍລິສັດໄດ້ຢຸດຕິການເກັບຊື້ແລ້ວ100%, ນະໂຍບາຍດ້ານແຮງງານປະຊາຊົນເຂົ້າເຮັດວຽກບ້ານອອ້ມຂ້າງທີ່ບໍລິສັດຊໍາປະທານ ແລະ ອື່ນໆ, ນອກນັ້ນທາງ ບໍລິສັດຍັງໄດ້ສະເໜີໃຫ້ພາກລັດຊ່ວຍເນື້ອທີ່ບຸກເບີກຕື່ມອີກ 40 ເຮັກຕາ ເພື່ອຈະຂະຫຍາຍໂຮງງານຕື່ມ, ເພື່ອເຮັດຂອດການບໍລິການ ແລະ ການທ່ອງທ່ຽວ, ຈາກນັ້ນ ຕາງໜ້າແຕ່ລະພາກສ່ວນແຂກເຂົ້າຮ່ວມກໍ່ໄດ້ພັດປ່ຽນກັນປະກອບຄໍາຄິດຄໍາເຫັນເຈາະຈີ້ມບັນຫາຕ່າງໆຢ່າງກົງໄປກົງມາ,

ຕອນທ້າຍ ທ່ານ ພົນໂທ ແສງນວນ ໄຊຍະລາດ ຄະນະເລຂາທິການສູນກາງພັກ, ຮອງປະທານສະພາແຫ່ງຊາດ ຊຸດທີ 8 ໄດ້ໂອ້ລົມ ແລະ ໃຫ້ທິດເຍື່ອງທາງກ່ອນອື່ນທ່ານໄດ້ກ່າວຄໍາຍ້ອງຍໍ ແລະຊົມເຊີຍ ທີ່ໄດ້ໃຫ້ການສະໜັບສະໜູນທາງພາກລັດໃນໄລຍະຜ່ານມາໂດຍສະເພາະແມ່ນພໍ່ແມ່ປະຊາຊົນໄດ້ມີວຽກເຮັດງານທໍາ, ນອກນັ້ນ, ທ່ານກໍ່ໄດ້ສະເໜີໃຫ້ບໍລິສັດເອົາໃຈໃສ່ 6 ບັນຫາຫລັກ ຄື: ໃຫ້ບໍລິສັດເອົາໃຈໃສ່ສຶບຕໍ່ປະຕິບັດຕາມບົດບັນທຶກສັນຍາ ລະຫວ່າງ ພາກລັດເມືອງ,ແຂວງ, ສູນກາງຮ່ວມກັບບໍລິສັດ ໃຫ້ເຂັ້ມງວດ, ສະເໜີໃຫ້ ບໍລິສັດກັບເມືອງພົວພັນກັນຢ່າງສະໜິດແໜ້ນ ເພື່ອປືກສາຫາລືລະດົມປະຊາຊົນຮັບຮູ້ຢ່າງທົ່ວເຖີງ, ເອົາໃຈໃສ່ບັນຫາສະໜອງທາງດ້ານສະບຽງອາຫານເຄື່ອງບໍລິໂພກຈໍາພວກຜັກປອດສານພິດ, ໄຂ່, ຊີ້້ນ, ປາ, ໝາກກ້ວຍ ແລະອື່ນໆໃຫ້ໂຮງງານເກັບຊື້ຈາກປະຊາຊົນ, ສະເໜີໃຫ້ບໍລິສັດຊ່ວຍ ເຫລືອທາງພັດທະນາທາງດ້ານພື້ນຖານໂຄ່ງລ່າງຂອງບ້ານ, ເມືອງ ເຊັ່ນ: ເສັ້ນທາງ, ດ້ານເຕັກນິກ, ທຶນຮອນ, ເອົາໃຈໃສ່ລະບົບນິເວດ, ສີ່ງແວດລ້ອມຕ່າງໆຢ່າງເຂັ້ມງວດ, ບັນຫາບໍລິສັດ ຂໍສໍາປະທານເນື້ອທີ່ດີນຈໍານວນ 40ເຮັກຕາເພື່ອຈະຂະຫຍາຍໂຮງງານ, ເຮັດຂອດການບໍລິການ ແລະ ການທ່ອງທ່ຽວແມ່ນຈະນໍາໄປຄົ້ນຄ້ວາສະເໜີທາງຂັ້ນເທີງຕື່ມອີກ.

Editor: ກຳປານາດ ລັດຖະເຮົ້າ