ໂຄງການກໍ່ສ້າງແກະສະຫຼັກເສົາໄມ້ດູ 1.000 ປີ ທີ່ແຂວງສາລະວັນ ພາຍຫຼັງທີ່ໄດ້ເລີ້ມລົງມືກໍ່ສ້າງຈັດຕັ້ງປະຕິບັດມາແຕ່ວັນທີ 15 ມິນາ 2017 ຫາວັນທີ 15 ສິງຫາ 2018 ໃຊ້ເວລາໃນການຈັດຕັ້ງປະຕິບັດ 18 ເດຶອນ, ເນື້ອທີ່ໂຄງການມີຂະໜາດ ( 9 m x 9 m ) ໃນມູນຄ່າ 2 ຕື້ກີບ, ໂດຍແມ່ນບໍລິສັດ ຕິ່ງວິໄລ ກໍ່ສ້າງ ແລະສ້ອມແປງເຄຫາສະຖານ ຈຳກັດຜູ້ດຽວ ເປັນຜູ້ຮັບເໝົາກໍ່ສ້າງ. ເຊິ່ງມີ 5 ໜ້າວຽກຄື: ວຽກດິນ, ວຽກເບຕົງ, ວຽກກໍ່ໂບກ, ວຽກຕິດຫິນອ່ອນ ແລະ ວຽກປະດັບປະດາ, ຜ່ານການຕິດຕາມກວດກາຂອງຄະນະກຳມະການຄຸ້ມຄອງການລົງທຶນຂັ້ນແຂວງ ແມ່ນຖືກຕ້ອງຕາມເຕັກນິກ ແລະ ໄດ້ມາດຖານມາຮອດປະຈຸບັນນີ້ບັນດາໜ້າວຽກທັງໝົດແມ່ນສຳເລັດ 100%
ທ່ານ ຟາມວັນເຫຼ່ ຕ່າງໜ້າບໍລິສັດ ຕິ່ງວິໄລ ກໍ່ສ້າງເຄຫາສະຖານຈຳກັດຜູ້ດຽວ ກໍ່ໄດ້ລົງນາມເຊັນສັນຍາມອບ-ຮັບ ກັບ ທ່ານ ມະໄລວອນ ສີປະເສີດ ຮອງຫົວໜ້າພະແນກຖະ ແຫຼ່ຂ່າວ-ວັດທະນະທຳ ແລະ ທ່ອງທ່ຽວແຂວງສາລະວັນ ເຊິ່ງເປັນເຈົ້າຂອງໂຄງການ, ໂດຍຊ້ອງຄະນະກຳມະການລົງທຶນຂັ້ນແຂວງ ແລະ ພະນັກງານວິຊາການເຂົ້າຮ່ວມ.
ພິທີດັ່ງກ່າວໄດ້ຈັດຂຶ້ນໃນວັນທີ 13 ກັນຍາ 2018 ຜ່ານມາ ຢູ່ທີ່ຫ້ອງປະຊຸມຂອງພະແນກຖະແຫຼງຂ່າວ-ວັດທະນະທຳ ແລະ ທ່ອງທ່ຽວແຂວງສາລະວັນ.
Editor: ກຳປານາດ ລັດຖະເຮົ້າ
